ଭବାନୀପାଟଣା,୧୬।୧୨(ସ୍ବ.ପ୍ର.): ସମାଜରେ ଅନେକ ଶିକ୍ଷକ ଅଛନ୍ତି, ଯାହାଙ୍କୁ ଦୁଗର୍ମ ଅଞ୍ଚଳକୁ ଯଦି ବଦଳି କରାଯାଏ ତାହେଲେ ସ୍କୁଲକୁ ଯାଆନ୍ତି ନାହିଁ। ଦିନେ ଚକ ଖଡ଼ି ଧରି ନ ଥିବା ଶିକ୍ଷକ କେବଳ ଦରମା ପାଇବା ଆଶାରେ ମାସକୁ ଥରେ ଯାଇ ଉପସ୍ଥାନ ଖାତାରେ ଦସ୍ତଖତ କରି ଚାଲି ଆସନ୍ତି। କିନ୍ତୁ ଏବେ ବି କିଛି ଦାୟିତ୍ୱବାନ ଶିକ୍ଷକ ଅଛନ୍ତି, ଯାହାଙ୍କ ପାଇଁ ଶିକ୍ଷା ଦାନ ହିଁ ସବୁ କିଛି। ଏମିତି ଜଣେ ଶିକ୍ଷକ ଅଛନ୍ତି ଯିଏକି ଦୀର୍ଘ ୨୦ ବର୍ଷ ହେଲା ନିରନ୍ତର ଭାବେ ଗୋଟିଏ ସ୍କୁଲରେ ପାଠ ପଢ଼ାଉଛନ୍ତି। ସେ ହେଲେ କଳାହାଣ୍ଡି ଜିଲା ଭବାନୀପାଟଣା ବ୍ଲକ ଅନ୍ତର୍ଗତ କାପସରା ଗ୍ରାମର ରାଜାରାମ ଧଙ୍ଗଡାମାଝି। ମାଓବାଦୀ ଅଧ୍ୟୁଷିତ ଅଞ୍ଚଳ ପିଲାଙ୍କୁ ଶିକ୍ଷିତ କରିବା ପାଇଁ ସେ ଲାଗିପଡିଛନ୍ତି। ଜଙ୍ଗଲ ଭିତରେ ଯାଇ ସେ ନଦୀ ପାର କରି ଛାତ୍ରୀଛାତ୍ରଙ୍କୁ ନେଇ ସ୍କୁଲରେ ପାଠ ପଢେଇ ପୁଣିଥରେ ଘରେ ଛାଡ଼ି ଆସୁଛନ୍ତି।
୨୦୦୧ ମାର୍ଚ୍ଚ ୧୭ ତାରିଖରେ ଜୁନାଗଡ଼ ବ୍ଲକ ଅନ୍ତର୍ଗତ ଦେଦର ପଞ୍ଚାୟତ ମାଓବାଦୀ ଅଧ୍ୟୁଷିତ ସୁର୍ଲି ପ୍ରାଥମିକ ବିଦ୍ୟାଳୟରେ ସେ ଶିକ୍ଷକତା ଜୀବନ ଆରମ୍ଭ କରିଥିଲେ। ୭ ବର୍ଷ ସେଠାରେ ରହିବା ପରେ ୨୦୦୮ ଅଗଷ୍ଟ ୧ରେ ସେହି ପଞ୍ଚାୟତ ସୁପେଲ ପ୍ରାଥମିକ ବିଦ୍ୟାଳୟକୁ ବଦଳି ହୋଇଗଲେ। ପୁଣିଥରେ ୨୦୦୯ ସେପ୍ଟେମ୍ବର ୨୩ ତାରିଖରେ ସୂର୍ଲି ସ୍କୁଲରେ ଯୋଗଦେଲେ। ଶିକ୍ଷକ ଧଙ୍ଗଡାମାଝି ତାଙ୍କ ଗାଁରୁ ସ୍କୁଲକୁ ଆସିବାକୁ ହେଲେ ଜାତୀୟ ରାଜପଥ ୨୬ ଦେଇ ୧୩ କିମି ଆସିଥାନ୍ତି। ପରେ ପାହାଡିଆ ରାସ୍ତାରେ ୪ କି.ମି. ଯାଇ ଜଙ୍ଗଲ ହରଡାଗୁଡ଼ା ଗ୍ରାମରେ ଥିବା ଏକ ଘରେ ବାଇକ୍ ରଖି ଦିଅନ୍ତି। ପରେ ହରଡାଗୁଡା ଗ୍ରାମର ଛାତ୍ରୀଛାତ୍ରଙ୍କୁ ଧରି ୨ କି.ମି. ଜଙ୍ଗଲ ରାସ୍ତାରେ ଚାଲି ଯାଇଥାନ୍ତି। ମଝିରେ ଶଗଡା ନଦୀ ପ୍ରବାହିତ ହୋଇଥିବାରୁ ଛାତ୍ରୀଛାତ୍ରଙ୍କୁ ନଦୀ ପାର କରି ସ୍କୁଲକୁ ଯାଇଥାନ୍ତି। ବର୍ଷା ଋତୁରେ ନଦୀ ଫୁଲିବା ସହିତ ପାଣିର ସ୍ରୋତ ବଢିଥାଏ, ତେଣୁ ଗ୍ରାମବାସୀଙ୍କ ସାହାଯ୍ୟରେ ଛାତ୍ରୀଛାତ୍ରଙ୍କୁ ନଈ ପାର କରି ସ୍କୁଲ ନେଇ ଶିକ୍ଷାଦାନ କରନ୍ତି। ସ୍କୁଲ ଛୁଟି ହେଲେ ପୁଣିଥରେ ଘରକୁ ଆଣି ଛାତ୍ରୀଛାତ୍ରଙ୍କୁ ଛାଡି ଗାଁକୁ ଫେରିଆସନ୍ତି। ଶିକ୍ଷକ ରାଜାରାମଙ୍କ ନା ଅଛି ରାଗ ନା ଅଛି କ୍ରୋଧ କିମ୍ବା କିଛି ପାଇବା ଆଶା। କେବଳ ମାଓବାଦୀ ଅଧ୍ୟୁଷିତ ଅଞ୍ଚଳର ଛାତ୍ରୀଛାତ୍ର କିଭଳି ଶିକ୍ଷିତ ହେବେ, ଭଲ ମଣିଷ ହେବେ, ନିଜ ଭବିଷ୍ୟତ ଗଢି ଗାଁରୁ ବାହାରି ସହରରେ ନିଜର ସୁନାମ ଅର୍ଜନ କରିପାରିବେ ସେ ନେଇ ଅହରହ ଉଦ୍ୟମ କରୁଛନ୍ତି। ରାଜାରାମଙ୍କ ଭଳି ଆଉ କିଛି ଶିକ୍ଷକ ବାହାରନ୍ତି ତେବେ ଶିକ୍ଷା କ୍ଷେତ୍ରରେ କଳାହାଣ୍ଡି ଜିଲା ଆହୁର ଆଗକୁ ବଢିପାରିବେ ଓ ଶିକ୍ଷକ ସମାଜରେ ଏହା ଏକ ନୂଆ ଅଧ୍ୟାୟ ସୃଷ୍ଟି କରିବ ଏହା ତିଳେ ମାତ୍ର ସନ୍ଦେହ ନାହିଁ।