ଦାରିଙ୍ଗବାଡି,୧।୧୧(ଅରୁଣ ସାହୁ): କ୍ଷୁଦ୍ରଦାନା ଶସ୍ୟର ବହୁଳ ବ୍ୟବହାରକୁ ନେଇ ରାଜ୍ୟ ସରକାର ଲୋକଙ୍କ ପାଇଁ ଶ୍ରୀ ଅନ୍ନ ଅଭିଯାନ ମାଧ୍ୟମରେ ଜନସଚେତନ କାର୍ଯ୍ୟ କରୁଛନ୍ତି। ହଜିଯାଇଥିବା ପାରମ୍ପରିକ ଖାଦ୍ୟର ପୁନରୁଦ୍ଧାର ପାଇଁ ପ୍ରୟାସ କରାଯାଉଛି। ଏହି କ୍ରମରେ ମଣିଷ ପାଇଁ ବହୁ ଉପଯୋଗୀ ଶସ୍ୟ ମଧ୍ୟରେ କୁଏରୀ, କାଙ୍ଗୁ, ବାଜେରା, ମାଣ୍ଡିଆ ଆଦି ରହିଥିବା ବେଳେ ଏବେ କନ୍ଧମାଳ ହଳଦୀ ପରେ କନ୍ଧମାଳର ବୁଢା ମାଣ୍ଡିଆକୁ ଜିଆଇ ଟ୍ୟାଗ୍ (ଜେଗ୍ରୋଫିକାଲ ଇଣ୍ଡିକେସନ ଟ୍ୟାଗ୍) ପାଇଁ ଆବେଦନ କରାଯିବାକୁ ଜିଲା ପ୍ରଶାସନ ପକ୍ଷରୁ ସର୍ଭେ କାର୍ଯ୍ୟ ଆରମ୍ଭ କରାଯାଇଛି।
ଜିଲାର ଦାରିଙ୍ଗବାଡି ସମେତ ରାଇକିଆ, ବାଲିଗୁଡା, ତୁମୁଡିବନ୍ଧ, କୋଟଗଡ଼ ଓ ଚକାପାଦ ବ୍ଲକ ଅଞ୍ଚଳରେ ବହୁଳ ଭାବେ ଏହି ବୁଢା ମାଣ୍ଡିଆ ଚାଷ କରାଯାଉଛି, ଯାହାକି ଅନ୍ୟ ମାଣ୍ଡିଆଠାରୁ ଅଧିକା ସ୍ବାଦ ସହ ଅଧିକ ପୋଷାକ ତତ୍ତ୍ୱ ଭରପୂର ହୋଇ ରହିଥିବା କୁହାଯାଇଛି।
ରାଜ୍ୟରେ ମୋଟ ୬୨ ପ୍ରକାରର ମାଣ୍ଡିଆ ରହିଥିବାବେଳେ ଜିଲାରେ ପ୍ରାୟ ୧୦ ରୁ ୧୨ ପ୍ରକାରର ମାଣ୍ଡିଆ ଚାଷ କରଯାଇଥାଏ ସେଗୁଡିକ ମଧ୍ୟରୁ ସିର୍କା ଏବଂ ବୁର୍କା, ହାତ ଭଙ୍ଗା, ଯନ୍ତ୍ରୀ ମାଣ୍ଡିଆ , ଭୈରବୀ, ବୁଢା ମାଣ୍ଡିଆ, ଚାଉଳିଆ, ବଡ଼ ମାଣ୍ଡିଆ,ମାମି ମାଣ୍ଡିଆ,ସାନ ମାଣ୍ଡିଆ, ଭିଆର ମାଣ୍ଡିଆ ଆଦି ଚାଷ କରାଯାଉଥିବା ବେଳେ ସବୁଠାରୁ ବୁଢା ମାଣ୍ଡିଆର ଚାହିଦା ରହିଛି। ଏହା ଚାଷ କରିବାରେ ଯେତିକି ଫାଇଦା ଅମଳ ଓ ବ୍ୟବହାର କରିବାରେ ମଧ୍ୟ ଭଲ ଫାଇଦା ରହିଛି ବୁଢା ମାଣ୍ଡିଆ ବିଶେଷ କରି ଶୀତ ଦିନରେ ରୁଆ ହୋଇଥାଏ ଓ ଏହି ଶୀତ ଥାଇ ଅମଳ ହୋଇଥାଏ। କୁହାଯାଏ ଶୀତ ବାଜିଲେ ଏହାର ସ୍ବାଦ ଦ୍ବିଗୁଣିତ ହୋଇଥାଏ। ଅକ୍ଟୋବର ମାସରେ ଏହା ରୁଆ ଯାଉଛି ଏବଂ ଜାନୁଆରୀରେ ଅମଳ କରାଯାଉଛି, ଯାହାକି ଅନ୍ୟ ମାଣ୍ଡିଆ ଜିଲାରେ ଜୁନ କିମ୍ବା ଜୁଲାଇରେ ରୁଆଯାଇ ନଭେମ୍ବର ସୁଦ୍ଧା ଅମଳ କରାଯାଉଛି।
ଜିଲା ପ୍ରଶାସନର ଶ୍ରୀ ଅନ୍ନ ଅଭିଯାନର ଜିଲା ପ୍ରକଳ୍ପ ସଂଯୋଜିକା ସବିତା ସୁବୁଦ୍ଧି କହିଛନ୍ତି, ବର୍ତ୍ତମାନ ରାଜ୍ୟ ସରକାର ବୁଢା ମାଣ୍ଡିଆକୁ ଜିଆଇ ଟ୍ୟାଗ୍ ଦେବାପାଇଁ ପ୍ରୟାସ ଆରମ୍ଭ କରିଛନ୍ତି ଏଥିପାଇଁ ଜିଲା ପ୍ରଶାସନ ପକ୍ଷରୁ ଏହି ବୁଢା ମାଣ୍ଡିଆ ଚାଷ ହେଉଥିବା ବ୍ଲକ ଅଞ୍ଚଳରେ ସର୍ଭେ କାର୍ଯ୍ୟ ଆରମ୍ଭ କରିଛି ଏଥିପାଇଁ ଜିଲାପ୍ରଶାସନ ସହ ସହାଭାଗିତାରେ କ୍ଷୁଦ୍ରଦାନା ଶସ୍ୟର ବିକାଶ ପାଇଁ କାର୍ଯ୍ୟକରୁଥିବା ଜାଗୃତି, ସାତି ଭଳି ଅନ୍ୟ କିଛି ଅନୁଷ୍ଠାନ ସର୍ଭେ କାର୍ଯ୍ୟରେ ସହଯୋଗ କରୁଛନ୍ତି। ଖୁବଶୀଘ୍ର ସର୍ଭେ କାର୍ଯ୍ୟ ସରିଲେ ଜିଆଇ ଟ୍ୟାଗ୍ ପାଇଁ ଆବେଦନ କରାଯିବ ବୋଲି କୁହାଯାଇଛି। ଏହାର ଜିଆଇ ଟ୍ୟାଗ୍ ହୋଇଗଲେ ଚାଷୀଙ୍କୁ ଆହୁରି ଫାଇଦା ଦେବ ଓ ଏହାର ଚାହିଦା କେବଳ ରାଜ୍ୟ ନୁହେଁ, ରାଜ୍ୟ ଓ ଦେଶ ବାହାରେ ମଧ୍ୟ ବୃଦ୍ଧି ପାଇବ ବୋଲି ଆଶା କରାଯାଇଛି।