ବରଗଡ଼ ଅଫିସ,୨୨ା୯: ବରଗଡ଼ ଜିଲା ଅତାବିରା ଥାନା ଅନ୍ତର୍ଗତ ରେଙ୍ଗାଲି କ୍ୟାମ୍ପ ଛକରେ ସ୍ଥାନୀୟ ଲୋକଙ୍କ ବିରୋଧ ସତ୍ତ୍ୱେ ଏକ ବାର୍ (ଅନ୍ ଅଫ୍ ବିଦେଶୀ ମଦ ଦୋକାନ) ଖୋଲିବାକୁ ଉଦ୍ୟମ ଚାଲିଛି। ଏହାକୁ ନେଇ ରେଙ୍ଗାଲି କ୍ୟାମ୍ପ ଅଞ୍ଚଳରେ ଚାପା ଉତ୍ତେଜନା ଲାଗି ରହିଥିବା ବେଳେ ଗୁରୁବାର ରେଙ୍ଗାଲି କ୍ୟାମ୍ପରେ ବନ୍ଦ ପାଳନ କରାଯାଇଛି। ବନ୍ଦକୁ ସ୍ବତଃସ୍ଫୁର୍ତ୍ତ ସମର୍ଥନ ମିଳିଥିବାବେଳେ ସକାଳୁ ଦୋକାନ, ବଜାର ବନ୍ଦ ରହିଛି। ସ୍ଥାନୀୟ ଲୋକେ ପ୍ରସ୍ତାବିତ ଦୋକାନ ଆଗରେ ଏକାଠି ହୋଇ ଧାରଣା ଦେଇଛନ୍ତି।
ପ୍ରକାଶ ଥାଉକି, ସ୍ଥାନୀୟ ଲୋକଙ୍କ ଦସ୍ତଖତ ଜାଲିଆତି କରିବା ସହିତ ମିଥ୍ୟା ରିପୋର୍ଟ ପ୍ରଦାନ କରି ରେଙ୍ଗାଲି କ୍ୟାମ୍ପ ଛକରେ ବାର୍ ଖୋଲାଯିବା ପାଇଁ ଅବକାରୀ ବିଭାଗ ଗତବର୍ଷରୁ ଲାଇସେନ୍ସ ପ୍ରଦାନ କରିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏଥିରେ ସମ୍ପୃକ୍ତ ଅବକାରୀ ଅଧିକାରୀଙ୍କ ଭୂମିକା ସନ୍ଦେହଜନକ ହୋଇ ପଡ଼ିଥିବା ବେଳେ ମୋଟାଅଙ୍କର ଡିଲ୍ ହୋଇଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ସ୍ଥାନୀୟ ଲୋକେ ଜିଲାପାଳ, ଏସ୍ପି, ଅବକାରୀ କମିଶନରଙ୍କଠାରୁ ଆରମ୍ଭ କରି ଓଡ଼ିଶା ମାନବାଧିକାର କମିଶନ(ଓଏଏଚ୍ଆର୍ସି)ଙ୍କ ଠାରେ ପିଟିଶନ ଦାଖଲ କରିଛନ୍ତି। ଉକ୍ତ ମାମଲାର ସମାଧାନ ନ ହେବା ପର୍ଯ୍ୟନ୍ତ ସମ୍ପୃକ୍ତ ବାର୍ ନ ଖୋଲିବା ପାଇଁ (ଓଏଏଚ୍ଆରସି)ଙ୍କ ନିର୍ଦ୍ଦେଶ ରହିଛି। କିନ୍ତୁ ଏହା ବିଚାରାଧୀନ ଥିବାବେଳେ ଗତ ୧୭ ତାରିଖ ସମ୍ପୃକ୍ତ ବାର୍ ଖୋଲା ଯାଇଥିଲା। ଏହାକୁ ବିରୋଧ କରି ସ୍ଥାନୀୟ ଲୋକେ ବାର୍ ସମ୍ମୁଖରେ ଧାରଣାରେ ବସିଥିଲେ ଏବଂ ଅବକାରୀ ଅଧିକାରୀମାନେ ସେଠାକୁ ପହଞ୍ଚି ବାର୍ ବନ୍ଦ କରିବା ସହିତ ଲିଖିତ ପ୍ରତିଶ୍ରୁତି ଦେବା ପରେ ଧାରଣାରୁ ଉଠିଥିଲେ। ଅନ୍ୟପକ୍ଷରେ ବାର୍ ବିରୋଧରେ ଧାରଣାକୁ ଓହ୍ଲାଇଥିବା ୧୧ଜଣଙ୍କ ବିରୋଧରେ ପୋଲିସ ମାମଲା ରୁଜୁ କରିଥିଲା। ତେବେ ଓଏଏଚ୍ଆର୍ସି ନିର୍ଦ୍ଦେଶନାମାକୁ ଉଲ୍ଲଂଘନ କରିଥିବା ସମ୍ପୃକ୍ତ ବ୍ୟବସାୟୀଙ୍କୁ ପୋଲିସର ଅନୁକମ୍ପା ଏବଂ ବାର୍ ଖୋଲାଯିବା ପ୍ରତିବାଦରେ ଧାରଣାକୁ ଓହ୍ଲାଇଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ସାଧାରଣରେ ଆଲୋଚନାର ବିଷୟ ହୋଇଛି।