ଚିତ୍ରକୋଣ୍ଡା,୧୩।୧୧: ଓଡ଼ିଶାରେ ଶିଶୁ ମୃତ୍ୟୁର ଏକ ପ୍ରମୁଖ କାରଣ ହେଉଛି ନିମୋନିଆ। ଯାହା ମାଲକାନଗିରି ଜିଲାର ଅଧିକାଂଶ ସ୍ଥାନରେ ଦେଖିବାକୁ ମିଳୁଛି। ବିଗତ ଦିନରେ ଉକ୍ତ ଜିଲାରେ ମ୍ୟାଲେରିଆ ରୋକିବାକୁ ସ୍ବାସ୍ଥ୍ୟ ବିଭାଗକୁ ନାକେଦମ୍ ହେବାକୁ ପଡ଼ିଥିଲା। ବିଶେଷକରି ଚିତ୍ରକୋଣ୍ଡା ବିଛିନ୍ନାଞ୍ଚଳରେ କାର୍ଯ୍ୟରତ ଡାକ୍ତର, ମହିଳା ଓ ପୁରୁଷ ସ୍ବାସ୍ଥ୍ୟ କର୍ମୀ, ଆଶାକର୍ମୀ, ଫାର୍ମାସିଷ୍ଟ, ଅଙ୍ଗନଓ୍ବାଡି କର୍ମୀ, ସ୍ବେଚ୍ଛାସେବୀ ଅନୁଷ୍ଠାନ ପାଇଁ ଆଜି ବହୁ ପରିମାଣରେ ମ୍ୟାଲେରିଆକୁ ରୋକାଯାଇ ପାରିଛି। ସେହିପରି ଶିଶୁ ମୃତ୍ୟୁହାରକୁ ରୋକିବା ତଥା ନିରାକରଣ ନିମନ୍ତେ ୟୁନିସେଫ୍ ଏବଂ ସ୍ବାସ୍ଥ୍ୟ ବିଭାଗର ମିଳିତ ଆନୁକୂଲ୍ୟରେ କରାଯାଇଛି ଏକ ଅଭିନବ ପ୍ରୟାସ। ଆଦିବାସୀ ଅଧ୍ୟୁଷିତ ମାଲକାନଗିରି ଜିଲା ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳ ଯୋଡ଼ାମ୍ବଠାରେ ନିମୋନିଆକୁ ନେଇ ଶିଶୁ ମୃତ୍ୟୁହାର ନିରାକରଣ ସଚେତନତା ଶିବିର ଅନୁଷ୍ଠିତ ହୋଇଯାଇଛି l
ସ୍ବାଭିମାନ ଅଞ୍ଚଳ ଯୋଡ଼ାମ୍ବଠାରେ ଯୋଡ଼ାମ୍ବ ସରପଞ୍ଚ ପିଙ୍କି ହନ୍ତାଳ, ଚିତ୍ରକୋଣ୍ଡା ଉପଖଣ୍ଡ ଚିକିତ୍ସାଳୟର ଅଧ୍ୟକ୍ଷ ଡାକ୍ତର କ୍ଷୀରୋଦ ଚନ୍ଦ୍ର ମହନ୍ତ, କୁଡୁମୁଲୁଗୁମ୍ମା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ସ୍ବାସ୍ଥ୍ୟ ଅଧିକାରୀ ଡାକ୍ତର ସନ୍ତୋଷ କୁମାର ଷଡ଼ଙ୍ଗୀ, ୟୁନିସେଫ୍ ଆର୍ଆର୍ସି କନ୍ସଲଟାଣ୍ଟ ନୀହାର ରଞ୍ଜନ ଜେନା, ଏସ୍ଏଲ୍ଏନ୍ ମେଡିକାଲ କଲେଜ କୋରାପୁଟ, ବିପିଏମ୍ ପଦ୍ମନାଭ ରାଓ, ସମୀର ରଞ୍ଜନ ବେପାରୀ, ଏଲ୍ଟି ପଦ୍ମରଞ୍ଜନ ପଣ୍ଡା ଓ ଦିଲୀପ କୁମାର ବେହେରା ପ୍ରମୁଖ ଉପସ୍ଥିତ ଥିଲେ। କାର୍ଯ୍ୟକ୍ରମକୁ ଯୋଡ଼ାଆମ୍ବ ସେକ୍ଟର ସୁପରଭାଇଜର ରତି ରଞ୍ଜନ ବାରିକ ଏବଂ ଜାନବାଇ ସେକ୍ଟର ସୁପରଭାଇଜର ଶଶାଙ୍କ ଶେଖର କର ପରିଚାଳନା କରିଥିଲେ। ଯୋଡ଼ାଆମ୍ବ ଓ ଜାନବାଇ ସେକ୍ଟରର ସମସ୍ତ ଆଶାକର୍ମୀ ଓ ଅଙ୍ଗନଓ୍ବାଡି କର୍ମୀ ତଥା ୨ ଶହରୁ ଊଦ୍ଧର୍ବ ଗର୍ଭବତୀ ଓ ପ୍ରସୂତି ମା’ ଯୋଗଦେଇଥିଲେ।