ଲଣ୍ଡନ: ସାଧାରଣତଃ ଭାରତରେ ଗୋଟିଏ ଅଣ୍ଡା ୮ରୁ ୧୨ ଟଙ୍କା ମଧ୍ୟରେ ବିକ୍ରି ହୋଇଥାଏ। ତେବେ ନିକଟରେ ବ୍ରିଟେନ୍ରେ ଆୟୋଜିତ ଏକ କାର୍ଯ୍ୟକ୍ରମରେ ଗୋଟିଏ ଅଣ୍ଡା ୨୦୦ ପାଉଣ୍ଡ (ପ୍ରାୟ ୨୧ ହଜାର ଟଙ୍କା)ରେ ବିକ୍ରି ହୋଇଛି, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସମ୍ପୂର୍ଣ୍ଣ ଗୋଲାକାର ଆକୃତିର ହୋଇଥିବାରୁ ଏହି ଅଣ୍ଡାକୁ ‘ୱାନ୍ ଇନ୍ ଏ ବିଲିୟନ ଏଗ୍’ ବୋଲି ମଧ୍ୟ କୁହାଯାଏ।
ଏହି ଗୋଲାକାର ଅଣ୍ଡାକୁ ପ୍ରଥମେ ସ୍କଟ୍ଲାଣ୍ଡର ଏକ ସ୍ଥାନୀୟ ବଜାରରୁ ଜଣେ ମହିଳା କିଣିଥିଲେ। ୧୫ଟି ଅଣ୍ଡା ଥିବା ଗୋଟିଏ ବାକ୍ସ ମଧ୍ୟରେ ଏହି ନିଆରା ଅଣ୍ଡା ମିଳିଥିଲା। ପରେ ମହିଳା ଜଣକ ଉକ୍ତ ଅଣ୍ଡାକୁ ୟର୍କଶାୟରସ୍ଥିତ ଲେମ୍ବୋର୍ନ ଅଞ୍ଚଳରେ ରହୁଥିବା ଏଡ୍ ପାୱେଲଙ୍କୁ ବିକ୍ରି କରିଥିଲେ। ଆକର୍ଷଣୀୟ ଆକୃତିର ଏହି ଅଣ୍ଡାକୁ ଦେଖି ଏଡ୍ ବିମୋହିତ ହୋଇଯାଇଥିଲେ ଓ ଏହାକୁ ୧୫୦ ପାଉଣ୍ଡ ମୂଲ୍ୟରେ କିଣିଥିଲେ। ତେବେ ପରେ ସେ ଏହି ଅଣ୍ଡାକୁ ଲୁଭେଣ୍ଟସ୍ ଫାଉଣ୍ଡେଶନକୁ ଦାନ କରିଥିଲେ। ଲୁଭେଣ୍ଟସ୍ ଫାଉଣ୍ଡେଶନ ଏକ ପରୋପକାରୀ ସଙ୍ଗଠନ ହୋଇଥିବାବେଳେ ଏହା ୟର୍କଶାୟରର ଯୁବକମାନଙ୍କୁ ଲାଇଫ୍ଷ୍ଟାଇଲ କୋଚିଂ, ପରାମର୍ଶ ଏବଂ ମାନସିକ ସ୍ବାସ୍ଥ୍ୟ ସହାୟତା ଯୋଗାଇଥାଏ। ଉକ୍ତ ଫାଉଣ୍ଡେଶନର ସଦସ୍ୟମାନେ ମଧ୍ୟ ଏହି ଅଦ୍ଭୁତ ଅଣ୍ଡା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ସେମାନେ ବିଭିନ୍ନ ଦାନ କାର୍ଯ୍ୟ ପାଇଁ ଏହି ଅଣ୍ଡାକୁ ପୁଣି ଥରେ ନିଲାମ କରିବାକୁ ସ୍ଥିର କରିଥିଲେ। ବୁଧବାର ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଏହି ଅଣ୍ଡା ୨୦୦ ପାଉଣ୍ଡ ମୂଲ୍ୟରେ ବିକ୍ରି ହୋଇଛି।
