ନୂଆଦିଲ୍ଲୀ,୨୭।୧୧ : ଏଥର ଇଜିପ୍ଟର ରାଷ୍ଟ୍ରପତି ମୁଖ୍ୟ ଅତିଥି ଭାବରେ ଗଣତନ୍ତ୍ର ଦିବସ ଉତ୍ସବରେ ଯୋଗଦେବେ। ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଗଣତନ୍ତ୍ର ଦିବସ ୨୦୨୩ ରେ ଇଜିପ୍ଟର ରାଷ୍ଟ୍ରପତି ଅବଦେଲ ଫତାହ ଅଲ ସିସି ବିଦେଶୀ ଅତିଥି ହେବେ।
ଉଭୟ ଦେଶ ଚଳିତ ବର୍ଷ କୂଟନୈତିକ ସମ୍ପର୍କର ୭୫ ତମ ବାର୍ଷିକୀ ପାଳନ କରିଛନ୍ତି। ଗତ ମାସରେ ଭାରତର ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଇଜିପ୍ଟ ଗସ୍ତରେ ରାଷ୍ଟ୍ରପତି ଏଲ-ସିସିଙ୍କୁ ଭେଟିଥିଲେ।
ଏହାପୂର୍ବରୁ, ୨୦୨୧ ମସିହାରେ ବ୍ରିଟେନର ତତ୍କାଳୀନ ପ୍ରଧାନମନ୍ତ୍ରୀ ବୋରିସ ଜନସନଙ୍କୁ ଗଣତନ୍ତ୍ର ଦିବସରେ ମୁଖ୍ୟ ଅତିଥି ଭାବରେ ଡକାଯାଇଥିଲା। ଅବଶ୍ୟ, ସେତେବେଳେ କରୋନା ମହାମାରୀ ବ୍ରିଟେନରେ ହଇଚଇ ସୃଷ୍ଟି କରିଥିଲା ଏବଂ ଶେଷରେ ଜନସନ ଭାରତ ଆସିବାକୁ ତାଙ୍କର ଅକ୍ଷମତା ପ୍ରକାଶ କରିଥିଲେ। କରୋନାଭାଇରସ ମହାମାରୀ ଯୋଗୁ କ୍ରମାଗତ ଦୁଇ ବର୍ଷ ପାଇଁ ଗଣତନ୍ତ୍ର ଦିବସରେ କୌଣସି ବିଦେଶୀ ନେତାଙ୍କୁ ମୁଖ୍ୟ ଅତିଥି କରାଯାଇ ନ ଥିଲା।
