ଅମରପାଲି,୨୮ା୮(ପୀତାମ୍ବର ସାହୁ): ପ୍ରଥମ ଓଡ଼ିଆ ଭାବେ ଦକ୍ଷିଣ କୋରିଆରେ ହେବାକୁ ଥିବା ପାଟନରଶିପ୍ ତାଏକୋଣ୍ଡୋ ପ୍ରୋଗ୍ରାମରେ ଅଂଶଗ୍ରହଣ କରିବେ ଓଡ଼ିଶା ବୀରମହାରାଜପୁର ମାଟିର ପୁଅ ଏହେସାସ ହୋତା । ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅଧୀନ ଅମୁଲ୍ୟମଣୀ ରାଣୀପୁର ଗ୍ରାମର ଆନ୍ତର୍ଜାତୀୟ ତାଇକଣ୍ଡୋ କ୍ରୀଡ଼ାବିତ ଏହେସାସ ହୋତାଙ୍କୁ ମିଳିଛି ଆଉ ଏକ ସଫଳତା । ଆସନ୍ତା ସେପ୍ଟେମ୍ବର ୧ ତାରିଖରୁ ୧୧ ତାରିଖ ପର୍ଯ୍ୟନ୍ତ ଦକ୍ଷଣି କୋରିଆ ତାଇକଣ୍ଡୋଓନ ମୁଜୁଠାରେ ବିଶ୍ୱ ତାଇକଣ୍ଡୋ ସଂଘ ପକ୍ଷରୁ ପାଟନରସିପ ତାଇକଣ୍ଡୋ ପ୍ରୋଗ୍ରାମ ଅନୁଷ୍ଠିତ ହେବ ।
ଏଥିରେ ବିଭିନ୍ନ ଦେଶରୁ ବଛାବଛା ତାଇକଣ୍ଡୋ କୋଚଙ୍କୁ ବିଶ୍ୱ ମାନ୍ୟତା ପ୍ରାପ୍ତ କୋଚ ଉନ୍ନତମାନର ତାଲିମ ପ୍ରଦାନ କରିବେ । କାର୍ଯ୍ୟକ୍ରମରେ ଏହେସାସ ଭାରତର ଏକମାତ୍ର ସର୍ବକନିଷ୍ଠ କୋଚ ଭାବେ ତାଲିମ ନେବାପାଇଁ ମନୋନୀତ ହୋଇଛନ୍ତି। ଏନେଇ ଏହସାସଙ୍କୁ ବିଶ୍ୱ ତାଇକଣ୍ଡୋ ମୁଖ୍ୟ କାର୍ଯ୍ୟାଳୟ ଦକ୍ଷିଣ କୋରିଆରୁ ପତ୍ର ମିଳିଛି।
ଏହେସାସ ବହୁବାର ଆନ୍ତର୍ଜାତୀୟ ପ୍ରତିଯୋଗିତାରେ ଅଂଶଗ୍ରହଣ କରି ଭାରତ ପାଇଁ ଗୌରବ ଆଣିଥିବା ବେଳେ ପୂର୍ବରୁ ଦୁଇଥର ଦକ୍ଷିଣ କୋରିଆରେ ତାଲିମ ମଧ୍ୟ ନେଇସାରିଛନ୍ତି । ଏହି ଖବର ଜଣାପଡିବା ପରେ ରାଜ୍ୟ ତାଇକଣ୍ଡୋ ସଂଘ ସମ୍ପାଦକ ମନମୋହନ ଭଞ୍ଜ, ସୁବର୍ଣ୍ଣପୁର ଜିଲା ତାଇକଣ୍ଡୋ ସଂଘ ସଭାପତି ରବୀନ୍ଦ୍ର ହୋତା, ଜିଲା କ୍ରୀଡ଼ା ଅଧିକାରୀ ଚିତ୍ତ ରଞ୍ଜନ ମିଶ୍ର, ବ୍ଲକ ଉପାଧ୍ୟକ୍ଷ ନାରାୟଣ ଲୁହା, ଜିଲା ତାଇକଣ୍ଡୋ ସଂଘର ଆଇନ ପରାମର୍ଶଦାତା ରାଧାକାନ୍ତ ବାଘଙ୍କ ସହ ବହୁ ମାନ୍ୟଗଣ୍ୟ ବ୍ୟକ୍ତି ଏବଂ କ୍ରୀଡ଼ା ଅନୁଷ୍ଠାନ ପକ୍ଷରୁ ଏହେସାସଙ୍କୁ ଶୁଭେଚ୍ଛା ଜ୍ଞାପନ କରିଛନ୍ତି।
