ଲଣ୍ଡନ, ୭।୫(ପି.ଟି.)-
ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ଅବଶିଷ୍ଟ ୩୧ ମ୍ୟାଚ ଆୟୋଜନ ପାଇଁ ୪ ଇଂଲିଶ ପ୍ରିମିୟର କାଉଣ୍ଟି ଆଗ୍ରହ ପ୍ରକାଶ କରିଛନ୍ତି। ସେମାନେ ହେଲେ ମିଡିଲସେକ୍ସ, ସରେ, ଓ୍ବାରଓ୍ବିକଶାୟାର ଓ ଲଙ୍କାଶାୟାର। ଜୈବ ସୁରକ୍ଷିତ ପରିବେଶରେ ୪ ଖେଳାଳି ଓ କିଛି ସପୋର୍ଟ ଷ୍ଟାଫ୍ କରୋନା ସଂକ୍ରମିତ ହେବାରୁ ଭାରତରେ ଆୟୋଜିତ ଆଇପିଏଲର ୧୪ତମ ସଂସ୍କରଣକୁ ଅଧାରୁ ବନ୍ଦ ରଖାଯାଇଛି। ଚଳିତ ବର୍ଷ ଶେଷ ଭାଗରେ ଭାରତରେ କରୋନାର ତୃତୀୟ ଲହର ଆସିବା ସମ୍ଭାବନା ଥିବାରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଟିମ୍ ଇଣ୍ଡିଆର ଇଂଲଣ୍ଡ ଟୁର୍ ପରେ ସେପ୍ଟେମ୍ବରରେ ଏକ ଓ୍ବିଣ୍ଡୋ ବାହାର କରିବାକୁ ଚେଷ୍ଟା କରୁଛି। ଭାରତୀୟ କ୍ରିକେଟ ଦଳର ଇଂଲଣ୍ଡ ଗସ୍ତ ସେପ୍ଟେମ୍ବର ୧୪ରେ ଶେଷ ହେବ। ଇଏସ୍ପିଏନ୍ ରିପୋର୍ଟ ଅନୁସାରେ ଲଡର୍ସ, ଓଭାଲ (ଉଭୟ ଲଣ୍ଡନ), ଏଜ୍ବାଷ୍ଟନ (ବର୍ମିଂହାମ) ଏବଂ ଏମିରେଟ୍ସ ଓଲ୍ଡ ଟ୍ରାଫୋର୍ଡ (ମାଞ୍ଚେଷ୍ଟର) ଏହି ଗ୍ରୁପ୍ର ଅଂଶବିଶେଷ ଭାବେ ଇସିବି (ଇଂଲଣ୍ଡ ଆଣ୍ଡ ଓ୍ବେଲ୍ସ କ୍ରିକେଟ ବୋର୍ଡ)କୁ ସେମାନଙ୍କ ଆଗ୍ରହ ଦେଖାଇଛନ୍ତି। ସେପ୍ଟେମ୍ବର ଦ୍ୱିତୀୟ ସପ୍ତାହରେ ୨ ସପ୍ତାହ ମଧ୍ୟରେ ଟୁର୍ନାମେଣ୍ଟ ଶେଷ କରିବା ଯୋଜନା ରହିଛି। ପ୍ରତିଦିନ ୨ଟି ଲେଖାଏ ମ୍ୟାଚ କରି ଲିଗ୍କୁ ୨୦ ଦିନ ମଧ୍ୟରେ ଶେଷ କରିବାକୁ ବିସିସିଆଇ ଲକ୍ଷ୍ୟ ରଖିଛି। ଅନ୍ତର୍ଜାତୀୟ କ୍ରିକେଟ କାଉନ୍ସିଲ୍ (ଆଇସିସି) ମୁଖ୍ୟ କାର୍ଯ୍ୟନିର୍ବାହୀ ବୈଠକରେ ବିସିସିଆଇ ଏବଂ ଇସିବି ପ୍ରତିନିଧିଙ୍କ ମଧ୍ୟରେ ଏ ସମ୍ପର୍କରେ ଆଲୋଚନା ହେବା ସମ୍ଭାବନା ରହିଛି। ଟୁର୍ନାମେଣ୍ଟ ଆୟୋଜନ ସପକ୍ଷରେ ଯୁକ୍ତି ହେଲା ସବୁ ଖେଳାଳି ଟି୨୦ ବିଶ୍ୱକପ ପାଇଁ ନିଜକୁ ପ୍ରସ୍ତୁତ କରିପାରିବେ। ଏହି ମେଗା ଇଭେଣ୍ଟ ଭାରତରୁ ୟୁନାଇଟେଡ ଆରବ ଏମିରେଟ୍ସ (ୟୁଏଇ)କୁ ସ୍ଥାନାନ୍ତର ହେବା ସମ୍ଭାବନା ରହିଛି। ଯଦି ଉଭୟ ଆଇପିଏଲ ଏବଂ ଟି୨୦ ବିଶ୍ୱକପ ୟୁଏଇରେ ଖେଳାଯାଏ ତେବେ ବିଶ୍ୱକପର ଦ୍ୱିତୀୟାର୍ଦ୍ଧ ବେଳକୁ ପିଚ୍ ସ୍ଲୋ ହୋଇଯିବା ସମ୍ଭାବନା ରହିଛି। ତେଣୁ ଆଇପିଏଲ ଆୟୋଜନ ପାଇଁ ଇଂଲଣ୍ଡ ପ୍ରକୃଷ୍ଟ ବିକଳ୍ପ ହୋଇପାରେ। ତେବେ କେତେକ ସମସ୍ୟା ମଧ୍ୟ ମୁଣ୍ଡ ଟେକିବା ସମ୍ଭାବନା ରହିଛି। ସେପ୍ଟେମ୍ବର ୧୪ରେ ଭାରତର ଇଂଲଣ୍ଡ ଗସ୍ତ ଶେଷ ବେଳକୁ ସେଠାରେ ୩୦ ଭାରତୀୟ କ୍ରିକେଟର ଉପସ୍ଥିତ ଥିବେ। ମାତ୍ର କ୍ୱାରାଣ୍ଟାଇନ୍ ନିୟମ ଦେଖିବାକୁ ଗଲେ ଅନ୍ୟ ଖେଳାଳିମାନେ ଯିବା କଷ୍ଟକର ହୋଇପଡ଼ିବ। ଲିଗ୍ ଯଦି ଚଳିତ ବର୍ଷ ନ ହୁଏ ତେବେ ବିସିସିଆଇ ୨୦୦୦ରୁ ୨୫୦୦ କୋଟି କ୍ଷତି ସହିବ। ତେଣୁ ବିଶ୍ୱର ସବୁଠାରୁ ଧନୀ କ୍ରିକେଟ ବୋର୍ଡ କୌଣସି ପ୍ରକାରେ ଏହି ପ୍ରତିଯୋଗିତା ଆୟୋଜନ ପାଇଁ ନିଶ୍ଚିତ ଉଦ୍ୟମ କରିବ।
