ପଣଜୀ,୧୯ ।୯: ଗତ ସପ୍ତାହ ଆରମ୍ଭରୁ କଂଗ୍ରେସ ଛାଡି ଭାରତୀୟ ଜନତା ପାର୍ଟି(ଭାଜପା)ରେ ସାମିଲ ହୋଇଥିବା ଗୋଆର ୮ ଜଣ ବିଧାୟକ ସୋମବାର ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ଭାଜପାର ଜଣେ ବରିଷ୍ଠ ନେତାଙ୍କ ସୂଚନା ଅନୁଯାୟୀ, ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ଓ ଭାଜପାର ପ୍ରଦେଶ ଅଧ୍ୟକ୍ଷ ସଦାନନ୍ଦ ତନାବଡେଙ୍କ ନେତୃତ୍ୱରେ ବିଧାୟକମାନେ ସୋମବାର ସକାଳେ ପ୍ରଧାନମନ୍ତ୍ରୀ ମୋଦିଙ୍କୁ ସାକ୍ଷାତ୍ କରିବେ ।
ମିଳିଥିବା ସୂଚନା ଅନୁଯାୟୀ, ରବିବାର ୬ ଜଣ ବିଧାୟକ ବିମାନ ଯୋଗେ ଦିଲ୍ଲୀ ପହଞ୍ଚିଛନ୍ତି । ହେଲେ ବିଧାୟକ ମାଇକେଲ ଲୋବୋ ଓ ଦିଗମ୍ବର କାମତ ସୋମବାର ସକାଳେ ଦିଲ୍ଲୀ ପହଞ୍ଚିବେ । ରବିବାର ଏହି ଦୁଇ ବିଧାୟକ ରାଜ୍ୟ ବାହାରେ ଥିଲେ । ଏହା ପୂର୍ବରୁ ବୁଧବାର କଂଗ୍ରେସ ବିଧାୟକ ଦଳର ବୈଠକରେ ଏକ ପ୍ରସ୍ତାବ ପାରିତ କରିବା ପରେ ଏମାନେ ଭାଜପାରେ ସାମିଲ ହୋଇଥିଲେ ।