ଭୁବନେଶ୍ୱର, ୩ା୧୦ (ବ୍ୟୁରୋ): କରୋନା କଟକଣା ଓ ନବୀକରଣ ପାଇଁ ବନ୍ଦ ରହିଥିବା ‘ଏକାମ୍ର ହାଟ’ ବର୍ଷକ ପରେ ନୂଆ ରୂପରେ ଶନିବାରଠାରୁ ଖୋଲିଛି। ରଙ୍ଗିନ ଆଲୋକମାଳା ଓ ସାଜସଜ୍ଜାରେ ହାଟ ଝଲସୁଛି। ହାଟକୁ ‘ଏକାମ୍ର କୁଟୀର’ ଓ ‘ଏକାମ୍ର ବଜାର’ ଭାବେ ଦୁଇଟି ଜୋନ୍ରେ ବିଭକ୍ତ କରାଯାଇଛି। ଏକାମ୍ର କୁଟୀରରେ ୮ଟି କଳା ପ୍ରଦର୍ଶନ ଷ୍ଟଲ୍କୁ ମିଶାଇ ୫୦ଟି ଷ୍ଟଲ ରହିଥିବାବେଳେ ଏକ ଖୋଲା ଜାଗା ପରିବେଷ୍ଟିତ ‘ଏକାମ୍ର ବଜାର’ରେ ୩୩ ଷ୍ଟଲ ରହିଛି। ସମୁଦାୟ ୮୩ ଷ୍ଟଲ ମଧ୍ୟରୁ ୫୬ଟି ହସ୍ତଶିଳ୍ପ ପାଇଁ ଓ ୨୭ଟି ହସ୍ତତନ୍ତ ପାଇଁ ଉଦ୍ଦିଷ୍ଟ ଅଛି। ପରିଦର୍ଶକମାନେ ହସ୍ତଶିଳ୍ପୀ ଓ ବୁଣାକାରଙ୍କଦ୍ବାରା ହସ୍ତଶିଳ୍ପ ତଥା ହସ୍ତତନ୍ତର ପ୍ରତ୍ୟକ୍ଷ ପ୍ରଦର୍ଶନ ଦେଖି ପ୍ରତ୍ୟକ୍ଷ ଜ୍ଞାନ ଆହରଣ କରିପାରିବେ। ହାଟରେ ବୟନିକା, ଅମ୍ଳାନ, ସମ୍ବଲପୁରୀ ବସ୍ତ୍ରାଳୟ ଓ ଉତ୍କଳିକା ଆଦି ସଂସ୍ଥାର ଷ୍ଟଲ ଖୋଲାଯାଇଛି ା ଏହାବ୍ୟତୀତ ହାଟରେ ୧୦ଟି ସ୍ବତନ୍ତ୍ର ଜଳପାନ ଷ୍ଟଲ ରହିଛି। ଏଠାରେ ପାରମ୍ପରିକ ଓଡ଼ିଆ ଖାଦ୍ୟ ସହିତ ଭାରତର ବିଭିନ୍ନ ପ୍ରାନ୍ତର ସୁସ୍ବାଦୁ ଖାଦ୍ୟମାନ ଗୋଟିଏ ଛାତତଳେ ଉପଲବ୍ଧ ହୋଇପାରୁଛି। ପରିଦର୍ଶକ, ଗ୍ରାହକଙ୍କ ସୁବିଧା ଓ ମନୋରଞ୍ଜନ ପାଇଁ ହାଟ ପରିସରରେ ସମ୍ମିଳନୀ କକ୍ଷ, ମୁକ୍ତାକାଶ ମଞ୍ଚ, ଏଟିଏମ୍, ପାର୍କିଂ ସ୍ଥଳ ଓ କିଓସ୍କ ଆଦିର ବ୍ୟବସ୍ଥା ରହିଛି।
ଗତବର୍ଷ ଅକ୍ଟୋବରରେ ଓଡ଼ିଶାରେ ଥିବା ଅର୍ବାନ୍ ହାଟଗୁଡ଼ିକର ପରିଚାଳନା ଦାୟିତ୍ବ ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ନିଜ ହାତକୁ ନେଇଥିଲା। ଏହାପରେ ୟୁନିଟ୍-୩ସ୍ଥିତ ଏକାମ୍ର ହାଟକୁ କାରିଗର ଓ ବୁଣାକାରଙ୍କ ବ୍ୟବସାୟ ଉଦ୍ଦେଶ୍ୟରେ ନୂତନ ଭାବରେ ପ୍ରସ୍ତୁତ କରାଯାଇଛି। ଏକାମ୍ର ହାଟ ଏପରି ଗୋଟିଏ ସୁନ୍ଦର ପରିକଳ୍ପନା ଯେଉଁଠାରେ ଓଡ଼ିଶାର ପୁରାତନ ସଂସ୍କୃତି ଓ ପରମ୍ପରା ସହିତ ହସ୍ତଶିଳ୍ପ ଓ ହସ୍ତତନ୍ତ ତଥା ପାରମ୍ପରିକ ସୁସ୍ବାଦୁ ଖାଦ୍ୟକୁ ଉପଲବ୍ଧ କରାଯାଇ ପାରିବ ବୋଲି ବିଭାଗ ପକ୍ଷରୁ କୁହାଯାଇଛି। କରୋନା କଟକଣାରେ ପ୍ରତ୍ୟେକ ଦିନ ୧୦ଟାରୁ ରାତି ୯ଟା ପର୍ଯ୍ୟନ୍ତ ହାଟ ଖୋଲା ରହିବ। ତେବେ ପାର୍ବଣକୁ ଦୃଷ୍ଟିରେ ରଖି ସରକାରଙ୍କ କୋଭିଡ୍ ନିୟମ ଅନୁଯାୟୀ ଆସନ୍ତା ୧୧ରୁ ୨୦ ତାରିଖ ପର୍ଯ୍ୟନ୍ତ ହାଟର ଖୋଲିବା ସମୟରେ ପରିବର୍ତ୍ତନ କରାଯିବ। ଏକାମ୍ର ହାଟର ପରିଚାଳନା ଦାୟିତ୍ବ, ରାଜ୍ୟ କଳା ଓ ହସ୍ତଶିଳ୍ପ ବିକାଶ ଅନୁଷ୍ଠାନ (ସିଡାକ୍) ଉପରେ ନ୍ୟସ୍ତ ହୋଇଛି।