ମୁମ୍ବାଇ,୨ ।୭: ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଧେ ଶନିବାର ଗୋଆ ପହଞ୍ଚିଛନ୍ତି । ଯେଉଁଠାରେ ଶିବସେନାର ସମସ୍ତ ଅସନ୍ତୁଷ୍ଟ ବିଧାୟକ ରହିଛନ୍ତି ସେହିଠାରେ ପହଞ୍ଚିଛନ୍ତି ସିନ୍ଧେ । ଏମାନେ ସମସ୍ତେ ସିନ୍ଧେଙ୍କ ସହ ମିଶି ଉଦ୍ଧବ ଠାକରେ ସରକାରକୁ ଭାଙ୍ଗି ଦେଇଛନ୍ତି । କୁହାଯାଉଛି କି ଏକନାଥ ସମସ୍ତ ବିଧାୟକଙ୍କୁ ସାଙ୍ଗରେ ଧରି ମୁମ୍ବାଇ ଫେରିବେ । ତେବେ ଏହା ପୂର୍ବରୁ ଏମାନଙ୍କର ଏକ ବୈଠକ ହୋଇପାରେ ବୋଲି କୁହାଯାଉଛି । ଏହା ପୂର୍ବରୁ ବି ଏକନାଥ ସିନ୍ଧେ ଗୋଆ ଯାଇଥିଲେ । ଏବେ ଫ୍ଲୋର ଟେଷ୍ଟ ଓ ବିଧାନସଭା ସ୍ପିକର ନିର୍ବାଚନ ପୂର୍ବରୁ ବିଧାୟକମାନେ ମୁମ୍ବାଇ ଫେରିବେ ।
ମିଳିଥିବା ସୂଚନା ଅନୁଯାୟୀ, ସିନ୍ଧେ ଗ୍ରୁପର ସମସ୍ତ ୫୦ ଜଣ ବିଧାୟକ ଦିନ ପ୍ରାୟ ୨ଟାରେ ଏକ ବିଶେଷ ଚାର୍ଟର ବିମାନରେ ମୁମ୍ବାଇ ଫେରିବେ । ଏହା ପୂର୍ବରୁ ଦିନ ୧୨ଟାରେ ବିଧାୟକ ଦୀପକ କେସରକର ଏକ ଖବରଦାତା ସମ୍ମିଳନୀର ଆୟୋଜନ କରିଛନ୍ତି । ରବିବାର ଅର୍ଥାତ୍ ୩ ଜୁଲାଇରେ ବିଧାନସଭାର ବିଶେଷ ଅଧିବେଶନରେ ବିଧାନସଭା ସ୍ପିକର ନିର୍ବାଚନ ହେବ । ସେଥିପାଇଁ ସମସ୍ତ ୫୦ ବିଧାୟକ ଶନିବାର ମୁମ୍ବାଇ ଫେରି ଆସିବେ ।
