ଭୋପାଳ,୧୬।୧୨: କୁହାଯାଏ ଭାଇ ଭାଇଠାରୁ କେହି ମିତ୍ର ନାହିଁ ଭାଇ ଭାଇଠାରୁ କେହି ଶତ୍ରୁ ନାହିଁ। କିଛି ଏଭଳି ଉକ୍ତିର ପ୍ରମାଣ ଦେଖିବାକୁ ମିଳିଛି ମଧ୍ୟପ୍ରଦେଶର ବୈତୁଲରେ। ବୈତୁଲରେ ୩ଶହ ଟଙ୍କାକୁ ନେଇ ଦୁଇ ଭାଇଙ୍କ ମଧ୍ୟରେ ବିବାଦ ହେବା ଯୋଗୁ ବଡ଼ ଭାଇ ସାନ ଭାଇଙ୍କୁ ହତ୍ୟା କରିଥିବା ଜଣାପଡ଼ିଛି। ଖବର ପାଇ ଘଟଣାସ୍ଥଳରେ ସ୍ଥାନୀୟ ପୋଲିସ ପହଞ୍ଚି ଏକ ମାମଲା ରୁଜୁ କରିବା ସହ ଫେରାର ଅଭିଯୁକ୍ତଙ୍କୁ ଖୋଜୁଛି ପୋଲିସ। ସୂଚନାଯୋଗ୍ୟ, କୋତଓ୍ବାଲି ଥାନା ଅଞ୍ଚଳର କୁପ୍ପା ଗ୍ରାମରେ ରହୁଥିବା ୩୬ବର୍ଷୀୟ ସୁମନ ସିଂହ କାକୋଡିଆ ଓ ତାଙ୍କ ବଡ଼ ଭାଇ ରମେଶ କାକୋଡିଆଙ୍କ ମଧ୍ୟରେ ବୁଧବାର ରାତିରେ ୩ଶହ ଟଙ୍କାକୁ ନେଇ ବିବାଦ ହୋଇଥିଲା। ଏହି ବିବାଦ ଏତେ ବଢ଼ିଯାଇଥିଲା ଯେ, ଦୁଇ ଭାଇଙ୍କ ମଧ୍ୟରେ ମାରପିଟ୍ ଆରମ୍ଭ ହୋଇଯାଇଥିଲା। ଏଥିରେ ଉତ୍କ୍ଷିପ୍ତ ହୋଇ ବଡ଼ ଭାଇ ରମେଶ ସାନ ଭାଇ ସୁମନଙ୍କ ମୁଣ୍ଡକୁ ଏକ ପାଇପରେ ଆକ୍ରମଣ କରିଥିଲେ। ଗୁରୁବାର ଭୋରରୁ ଘରେ ଶୋଇବା ଅବସ୍ଥାରେ ସୁମନଙ୍କ ମୃତ୍ୟୁ ହୋଇଥିଲା। ଏନେଇ ପରିବାର ଲୋକେ ପୋଲିସକୁ ଖବର ଦେବା ସହ ତାଙ୍କ ମୃତ୍ୟୁ ପାଇଁ ରମେଶ ଦାୟୀ ବୋଲି ଅଭିଯୋଗ କରିଛନ୍ତି। ଖବର ପାଇ ପାଢ଼ର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ବ୍ୟବଚ୍ଛେଦ କରିବା ସହ ମାମଲା ରୁଜୁ କରି ତଦନ୍ତ ଚଳାଇଛି। ଅନ୍ୟପଟେ ଏହି ଘଟଣା ଘଟିବା ପରେ ରମେଶ ଫେରାର ଥିବା ବେଳେ ପୋଲିସ ତାଙ୍କୁ ଖୋଜୁଛି।