ଲୋଇସିଂହା,୧୩।୪(ଡି.ଏନ.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ବାଦିମୁଣ୍ଡା ପଞ୍ଚାୟତର ଏକ ବୃଦ୍ଧ ଦମ୍ପତି ଗତ ଦୁଇସପ୍ତାହ ହେଲା ପିଡବ୍ଲ୍ୟୁଡି ରାସ୍ତାର କଲଭର୍ଟରେ ଆଶ୍ରୟ ନେଇଥିଲେ। ସେମାନେ ହେଲେ ବିରକେଲ ଗ୍ରାମର ହଜାରୁ କାଲସାଏ(୭୦) ଓ ତାଙ୍କ ସ୍ତ୍ରୀ ଝିରିଲି ସାହୁ(୬୫)। ମଙ୍ଗଳବାର ପ୍ରଶାସନିକ ଅବହେଳାକୁ ଦାୟୀ କରି ସାମାଜିକ ଗଣମାଧ୍ୟମରେ ଏହିଦୃଶ୍ୟ ଭାଇରାଲ ହୋଇଥିଲା। ଏହାକୁ ଗଁାର ଜଣେ ବ୍ୟକ୍ତି ଏହିି ଫଟୋଚିତ୍ରକୁ ଜିଲା ପ୍ରଶାସନକୁ ଟ୍ୟାଗ୍ କରି ଟୁଇଟ କରିଥିଲେ। ଏହାପରେ ଉପଜିଲାପାଳ କୁମାରନାଗ ଭୂଷଣଙ୍କ ନିର୍ଦ୍ଦେଶରେ ବୁଧବାର ଲୋଇସିଂହା ଅତିରିକ୍ତ ତହସିଲଦାର ସମ୍ପୂର୍ଣ୍ଣାନନ୍ଦ ବେଜ ବିରକେଲକୁ ଯାଇ ସମ୍ପୃକ୍ତ ବୃଦ୍ଧା ଦମ୍ପତିଙ୍କୁ ଭେଟିଥିଲେ। ସେମାନଙ୍କ ସହ ଆଲୋଚନା ପରେ ଥଇଥାନ ପାଇଁ ଦେଓଗାଁ ବ୍ଲକ ସାଲେପାଲିସ୍ଥିତ ବୃଦ୍ଧାଶ୍ରମ ନିଆଯାଇଛି ା
ବିରକେଲ ଗ୍ରାମର ବୃଦ୍ଧ କାଲସାଏ ଦମ୍ପତି ା ତାଙ୍କର ଦୁଇ ଝିଅ ବାହା ହୋଇ ସାରିଛନ୍ତି। ଭୂମିହୀନ ଏହି ଦମ୍ପତି ମୂଲଲାଗି ପରିବାର ପରିପୋଷଣ କରନ୍ତି। ପୁଅ ନଥିବାରୁ ଜଣେ ଝିଅଜ୍ୱାଇଁଙ୍କୁ ପାଖରେ ରଖିଛନ୍ତି। ଅଭାବୀ ପରିବାର ହୋଇଥିବାରୁ ପରିଣତ ବୟସରେ ମଧ୍ୟ ଏହି ବୃଦ୍ଧ ଦମ୍ପତିଙ୍କୁ ମୂଲ ଲାଗିବାକୁ ପଡୁଛି ା ହେଲେ ମାସକ ତଳେ କୌଣସି କାରଣକୁ ନେଇ ପରିବାରରେ ବିବାଦ ସୃଷ୍ଟି ହୋଇଥିଲା। ଅତିଷ୍ଠ ହୋଇ ବୃଦ୍ଧ ଦମ୍ପତି ଘର ଛାଡି ଗାଁଠାରୁ ୧ କିମି ଦୂରରେ ଏକ ଝୁମ୍ପୁଡି ଘରେ ଆଶ୍ରୟ ନେଇଥିଲେ। ଦୁଇ ସପ୍ତାହତଳେ ଝଡବର୍ଷାରେ ସେହି ଝୁମ୍ପୁଡିଘର ଭାଙ୍ଗି ଯାଇଥିଲା। ଅନ୍ୟନୋପାୟ ହୋଇ ଏହି ବୃଦ୍ଧ ଦମ୍ପତି ତଲିଉଡାର-ସରଗାଡ ପିଡବ୍ଲ୍ୟୁଡି ରାସ୍ତାର ବିରକେଲ ଗାଁ ନିଟସ୍ଥ ତିହାଡି ଘର କ୍ଷେତସୀମାରେ ଥଇବା କଲଭର୍ଟରେ ଆଶ୍ରୟ ନେଇଥିଲେ। ସେଠାରେ ରନ୍ଧାବଢା କରି ରହିଆସୁଥିଲେ। କଲଭର୍ଟର ଉଭୟପଟରେ ବାଉଁଶ ଚାଞ୍ଚିରି ଦେଇଥିଲେ। ମଙ୍ଗଳବାର ଗ୍ରାମର ସାମଜିକ କର୍ମୀ ସାଇଦେବ ପଟେଲଙ୍କ ନଜରକୁ ଆସିବା ପରେ ସେ ସାମଜିକ ଗଣମାଧ୍ୟମରେ ଏଇ ଦୟନୀୟ ସ୍ଥିତିର ସେୟାର କରିଥିଲେ। ଏହି ପୋଷ୍ଟକୁ ନେଇ ଅମରଜିଦ ପଟେଲ ନାମକ ଜଣେ ଯୁବକ ରାଜ୍ୟ ସରକାରଙ୍କ ୫ଟି ସଚିବ, ଜିଲାପାଳ, ସ୍ଥାନୀୟ ବିଧାୟକଙ୍କୁ ବୁଧବାର ଟୁଇଟ କରିଥିଲେ ା ଉକ୍ତ ପୋଷ୍ଟ ଜିଲାପାଳଙ୍କ ଦୃଷ୍ଟିକୁ ଆସିବା ପରେ ଉଦ୍ଧାର ପାଇଁ ପଦକ୍ଷେପ ନିଆଯାଇଥିଲା। ଏ ସମ୍ପର୍କରେ ବିଡିଓ ଆକାଶ ରଞ୍ଜନ ସାହୁ କହିଛନ୍ତି, ବୃଦ୍ଧ ଦମ୍ପତି, ବାର୍ଦ୍ଧକ୍ୟ ଭତ୍ତା,ଖାଦ୍ୟ ସୁରକ୍ଷା ଯୋଜାନରେ ଅନ୍ତର୍ଭୁକ୍ତ ହୋଇଛନ୍ତି। ୨୦୧୭-୧୮ ଆର୍ଥିକ ବର୍ଷରେ ହଜାରଙ୍କୁ ପ୍ରଧାନମନ୍ତ୍ରୀ ଆବାସ ଘର ମିଳିଛି। ପାରିବାରିକ କଳହରୁ ସେମାନେ କଲଭର୍ଟରେ ଆଶ୍ରୟ ନେଇଥିଲେ ବୋଲି ସେ କହିଛନ୍ତି। ଅତିରିକ୍ତ ତହସିଲଦାର ବେଜଙ୍କୁ ପଚାରିବାରୁ ବୃଦ୍ଧ ଦମ୍ପତି ଏବଂ ଝିଅଜ୍ୱାଇଁ ପୃଥକ ଘର ପାଇଛନ୍ତି। ତଦନ୍ତ ବେଳେ ଝିଅଜ୍ୱାଇଁ ନିଜ ଘରେ ରହୁଥିବାବେଳେ ବୃଦ୍ଧ ଦମ୍ପତିଙ୍କ ଘରେ ତାଲା ପଡିଥିଲା ା ହେଲେ ବୃଦ୍ଧ ଦମ୍ପତି ଘର ଚାବି ରଖି ନ ଥିବା କହିଥିବା ତଦନ୍ତ ଅଧିକାରୀଙ୍କୁ କହିଥିଲେ। କେଉଁ ପରିସ୍ଥିତିରେ ବୃଦ୍ଧ ଦମ୍ପତିଙ୍କ ଘରୁ ଚାଲିଗଲେ ଏବଂ ଘରେ ତାଲା ପଡିବାର କାରଣ କ’ଣ ତାହାର ତଦନ୍ତ କରିବାକୁ ଗ୍ରାମବାସୀ ଦାବି କରିଛନ୍ତି।