ଭୁବନେଶ୍ୱର,୫।୩: ପାଖେଇ ଆସିଲାଣି ଲୋକସଭା ନିର୍ବାଚନ। ଆଉ ଦିନ କେଇଟା ପରେ ତାରିଖ ଘୋଷଣା ହେବ। ତାରିଖ ଘୋଷଣା ପୂର୍ବରୁ କେନ୍ଦ୍ରରୁ ଆରମ୍ଭ କରି ରାଜ୍ୟ ପର୍ଯ୍ୟନ୍ତ ସରକାର ପ୍ରକଳ୍ପ ପ୍ରକଳ୍ପ ଶିଳାନ୍ୟାସ କରିଚାଲିଛନ୍ତି। ତାରିଖ ଘୋଷଣା ପରେ ଆରମ୍ଭ ହୋଇଯିବ ଜୋରସୋର ପ୍ରସ୍ତୁତି। ତେବେ ନିର୍ବାଚନକୁ ଦୃଷ୍ଟିରେ ରଖି ଭାଜପା ତା’ର ପ୍ରଥମ ପ୍ରର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛି। କିନ୍ତୁ ସବୁଠାରୁ ଆଶ୍ଚର୍ଯ୍ୟକର କଥା ହେଉଛି ଯେଉଁମାନଙ୍କୁ ଓଡିଶାରେ ପ୍ରାର୍ଥୀ କରିବ ବୋଲି ଚର୍ଚ୍ଚା ହେଉଥିଲା ସେମାନଙ୍କର ନାଁ ତାଲିକାରେ ନାହିଁ। ସେପଟେ ଏଯାଏଁ ମେଣ୍ଟ କଥା ଜୋରସୋରରେ ଚର୍ଚ୍ଚା ଥମୁ ନ ଥିବାବେଳେ ଦୁଇ ଦଳ ଭାଜପା-ବିଜେଡି ଏହାକୁ ଖୋଲାଖୋଲି ଖଣ୍ଡନ କରୁଛନ୍ତି। ତେବେ ଏହାରି ଭିତରେ ଶୁଣିବାକୁ ମିଳୁଛି କି, ଖୁବଶୀଘ୍ର ବିଜେଡି ତା’ର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିବ। ଯାହାକୁ ନେଇ ରାଜ୍ୟ ରାଜନୀତି କଳ୍ପନା ଜଳ୍ପନା ଲାଗି ରହିଛି।
ରାଜନୈତିକ ବିଶେଷଜ୍ଞମାନେ ଅନୁମାନ କରୁଛନ୍ତି କି, ୫୦ ପ୍ରତିଶତ ଆସନରେ ପ୍ରାର୍ଥୀଙ୍କୁ ଗ୍ରୀନ ସିଗନାଲ ଦେଇ ସାରିଛି ଦଳ । କାରଣ ଅଧିକାଂଶ ସ୍ଥାନରେ ନେତା ଏବେ ନିର୍ବାଚନମଣ୍ଡଳୀରେ କାମ ଆରମ୍ଭ କରିଦେଲେଣି । ଯେଉଁଠି ପ୍ରାର୍ଥୀଙ୍କୁ ସିଗନାଲ ମିଳିସାରିଛି ସେଠାରେ ବାଦ ପଡ଼ିଥିବା ନେତା ଦଳ ଛାଡୁଥିବା ଜଣାପଡ଼ିଛି । କୁହାଯାଉଛି ମାର୍ଚ୍ଚ ଦ୍ବିତୀୟ କିମ୍ବା ତୃତୀୟ ସପ୍ତାହ ମଧ୍ୟରେ ବିଜେଡି ପ୍ରାର୍ଥୀଙ୍କ ତାଲିକା ରିଲିଜ କରିବ।