ବ୍ରହ୍ମପୁର,୧ା୫(ଅଶୋକ କୁମାର ସାହୁ): ଗଞ୍ଜାମ ଜିଲାରେ ପ୍ରଥମ ପର୍ଯ୍ୟାୟ ନିର୍ବାଚନ ମେ ୧୩ ତାରିଖରେ ହେବ। ଏଥିପାଇଁ ଗାଁଠୁ ସହର ପର୍ଯ୍ୟନ୍ତ ସବୁଠି ବାତାବରଣ ଉଷ୍ମ ହୋଇପଡିଛି। ଚଳିତ ନିର୍ବାଚନରେ ସୋସିଆଲ ମିଡିଆ ତଥା ଡିଜିଟାଲ ପ୍ଲାଟଫର୍ମ ଉପରେ ବିଭିନ୍ନ ଦଳ ଓ ପ୍ରାର୍ଥୀମାନେ ଗୁରୁତ୍ୱ ଦେଉଛନ୍ତି। ଫେସ୍ବୁକ, ଇନଷ୍ଟାଗ୍ରାମ, ୟୁଟ୍ୟୁବ, ହ୍ବାଟ୍ସଆପ ଆଦି ସୋସିଆଲ ମିଡିଆ ଖୋଲୁ ଖୋଲୁ ଆସୁଛି ନିର୍ବାଚନୀ ହାୱା। ବିରୋଧାଭାସଠାରୁ ଆରମ୍ଭ କରି ପ୍ରଚାର, ମିଶ୍ରଣ ପର୍ବ ଏବଂ ଭୋଟର କାହାକୁ ଭୋଟ ଦେବେ, କେଉଁ ଦଳର ପ୍ରଭାବ ରହିଛି ତାହା ଦେଖିବାକୁ ମିଳୁଛି।
ଚଳିତ ନିର୍ବାଚନରେ ଡିଜିଟାଲ ପ୍ଲାଟଫର୍ମ ନେତାଙ୍କ ବିଭିନ୍ନ କାର୍ଯ୍ୟକ୍ରମର ପ୍ରସାର ପାଇଁ ଭଲ ମାଧ୍ୟମ ହୋଇଛି। ଏହା ଉପରେ ନେତାମାନେ ଭରସା କରି ଲୋକସମର୍ଥନ ଯୋଗାଡ କରିବାରେ ବ୍ୟସ୍ତ ରହୁଛନ୍ତି। କାର୍ଯ୍ୟକ୍ରମଗୁଡିକୁ ଡିଜିଟାଲ ପ୍ଲାଟଫର୍ମରେ ଛାଡ଼ିବା ପାଇଁ ଲାଇନ ଲାଗୁଛି।
ଯୁବବର୍ଗ ଡିଜିଟାଲ ପ୍ଲାଟଫର୍ମରେ ଅଭ୍ୟସ୍ତ ହୋଇଥିବାବେଳେ ସେମାନଙ୍କୁ ସବୁ ଦଳ ଆକୃଷ୍ଟ କରିବାକୁ ପ୍ରୟାସ କରୁଛନ୍ତି। ଏପରକି ବିଭିନ୍ନ ଦଳ ପକ୍ଷରୁ ଫୋନ କଲ ବି ଆସୁଛି। ଲୋକଙ୍କୁ ନାନା ପ୍ରତିଶ୍ରୁତି ଦେଇ ପ୍ରାର୍ଥୀମାନେ ଭୋଟଭିକ୍ଷା କରୁଛନ୍ତି। ଯେ କୌଣସି କାର୍ଯ୍ୟକ୍ରମ ଦେଖିଲେ ସେଥିରେ ଦଳୀୟ ବିଜ୍ଞାପନଗୁଡିକ ଆସୁଛି। ନିର୍ବାଚନ ମଇଦାନରେ କାହାର କେତେ ଦମ ଅଛି ସେଥିରେ ଦର୍ଶାଯାଉଛି। ଯୁବପିଢ଼ିଙ୍କୁ ଆଲୋଚନାର ଖୋରାକ ଯୋଗାଇବା ପାଇଁ ଏହା ଏକ ମାଧ୍ୟମ ପାଲଟିଛି। ଏ ସଂକ୍ରାନ୍ତରେ ସ୍ତମ୍ଭକାର ଭାଲଚନ୍ଦ୍ର ଷଡଙ୍ଗୀ କହିଛନ୍ତି, ଚଳିତ ନିର୍ବାଚନରେ ଡିଜିଟାଲକରଣକୁ ଗୁରୁତ୍ୱ ଦିଆଯାଉଥିବା ଦେଖିବାକୁ ମିଳୁଛି। ସୋସିଆଲ ମିଡିଆରେ ଲୋକଙ୍କ ନିକଟତର ହେବା ସହଜ ହୋଇଯାଇଛି। ତେଣୁ ବିଭିନ୍ନ ଦଳ ଓ ନେତା ଏହାକୁ ବାଛି ନେଉଛନ୍ତି। ଫେସବୁକ, ୟୁଟ୍ୟୁବ ଚ୍ୟାନେଲ, ଟ୍ବିଟର ଆକାଉଣ୍ଟ ଭଳି ଡିଜିଟାଲ ପ୍ଲାଟଫର୍ମରେ ଲୋକଙ୍କ ନିକଟତର ହେବା ଅତି ସହଜ। ପ୍ରତ୍ୟେକ ଦଳ ଓ ବ୍ୟକ୍ତିବିଶେଷଙ୍କ ସ୍ବତନ୍ତ୍ର ଡିଜିଟାଲ ସେଲ ବି ରହିଛି। ଯେଉଁ ଛୋଟ ଦଳ କିମ୍ବା ସ୍ବାଧୀନ ପ୍ରାର୍ଥୀଙ୍କ ଏହି ସେଲ ନ ଥିଲେ ବି ଏଥିରେ ସେମାନେ ନିଜକୁ ସାମିଲ କରିବାକୁ ଚେଷ୍ଟା କରୁଛନ୍ତି। ନିଜ ପ୍ରଚାର ସହିତ ପ୍ରତିଦ୍ୱନ୍ଦ୍ୱୀଙ୍କୁ ପଦାରେ ପକାଇବା ପାଇଁ ଏହାକୁ ବ୍ୟବହାର କରାଯାଉଛି। ଡିଜିଟାଲକରଣ ନିର୍ବାଚନରେ ଗୁରୁତ୍ୱ ରଖୁଥିବା ଏଥିରୁ ସ୍ପଷ୍ଟ ହୋଇଛି ବୋଲି ଷଡ଼ଙ୍ଗୀ କହିଥିଲେ। ଭାଜପା ନେତା କାହ୍ନୁ ଚରଣ ପତି କହିଛନ୍ତି, ସୋସିଆଲ ମିଡିଆରେ ଲୋକଙ୍କ ନିକଟତର ହେବା ସହଜ ହେଉଥିବାରୁ ଡିଜିଟାଲକରଣ ନିର୍ବାଚନରେ ଗୁରୁତ୍ୱ ରଖୁଛି। ତେଣୁ ସମସ୍ତ ଦଳ, ନେତା ଓ ପ୍ରାର୍ଥୀମାନେ ତାହାକୁ ଆପଣଉଛନ୍ତି ବୋଲି କହିଥିଲେ। ସେହିପରି ସବୁ ନିର୍ବାଚନୀ ଖବର ଏବେ ମୋବାଇଲ ଫୋନରେ ଆସିଯାଉଛି ବୋଲି ଗୋଷାଣୀ ନୂଆଗାଁ ଅଞ୍ଚଳର ଯୁବ ଭୋଟର
ବସନ୍ତ ସାହୁ କହିଛନ୍ତି।