ଝାରସୁଗୁଡ଼ା ଅଫିସ, ୨୯।୫: ଝାରସୁଗୁଡ଼ା ଜିଲା ବ୍ରଜରାଜନଗର ଉପନିର୍ବାଚନ ଲାଗି ଆସନ୍ତା ୩୧ରେ ମତଦାନ ହେବାକୁ ଥିବାବେଳେ ରବିବାର ସନ୍ଧ୍ୟାରେ ପ୍ରଚାର ଶେଷ ହୋଇଛି। ଏନେଇ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବାକୁ ଆସିଥିବା ଷ୍ଟାର ପ୍ରଚାରକ ନେତୃବୃନ୍ଦ ରବିବାର ସନ୍ଧ୍ୟାରେ ନିର୍ବାଚନ ମଣ୍ଡଳୀଛାଡି ଚାଲିଯାଇଛନ୍ତି। ଶେଷ ଦିବସରେ ଭାଜପା ପ୍ରାର୍ଥତ୍ନୀ ରାଧାରାଣୀ ପଣ୍ଡା ନିଜ ଦଳର ଷ୍ଟାର ପ୍ରଚାରକଙ୍କ ସହ ଲଖନପୁର ବ୍ଲକ୍, ବେଲପାହାଡ଼ ଓ ବ୍ରଜରାଜନଗର ପୌରାଞ୍ଚଳରେ ପ୍ରଚାର ଚଳାଇଥିଲେ। ଏହିପରି ବିଜେଡି ପ୍ରାର୍ଥିନୀ ଅଳକା ମହାନ୍ତି ଦଳର ଷ୍ଟାର ପ୍ରଚାରକଙ୍କୁ ଧରି କଦମ୍ବଡିହି ଓ ଭଅଁରଖୋଲ ପଞ୍ଚାୟତରେ କର୍ମୀ ସମ୍ମିଳନୀ ସହ ମହିଳା ସମାବେଶ କରିଥିଲେ। ଏଥିରେ ମନ୍ତ୍ରୀ ସୁଶାନ୍ତ ସିଂ, ମନ୍ତ୍ରୀ ଟୁକୁନି ସାହୁ, ଏମ୍ପି ପ୍ରସନ୍ନ ଆଚାର୍ଯ୍ୟ, ବିଧାୟକ ଦେବୀପ୍ରସାଦ ମିଶ୍ର, ଆକାଶ ଦାସ ନାୟକ, ବିକ୍ରମ ପଣ୍ଡା, ଲତିକା ପ୍ରଧାନ, ରୀତା ସାହୁ, ଚନ୍ଦ୍ର ଶେଖର ସାହୁ ପ୍ରମୁଖ ନେତୃବୃନ୍ଦ ଯୋଗଦେଇଥିଲେ। ଏହାକୁ ବିଜେଡି ବ୍ଲକ ସଭାପତି ରବିରନତ୍ ପ୍ରଧାନ ପରିଚାଳନା କରିଥିଲେ। ସେହିପରି କଂଗ୍ରେସ ପ୍ରାର୍ଥୀ କିଶୋର ଚନ୍ଦ୍ର ପଟେଲ ତାଙ୍କ ସମର୍ଥକଙ୍କୁ ସାଙ୍ଗରେ ଧରି ଓ୍ବାର୍ଡକୁ ଓ୍ବାର୍ଡ ବୁଲି ପ୍ରଚାର କରିଥିଲେ। ସେ ରୋଡ଼ ଶୋ’ରେ ସହର ପରିକ୍ରମା କରିଥିଲେ। ଭାରତୀୟ କମ୍ୟୁନିଷ୍ଟ ପାର୍ଟି (ସିପିଆଇ)ପ୍ରାର୍ଥୀ ରମେଶ ତ୍ରିପାଠୀ ରୋଡ ଶୋ’ରେ ବାହାରି ଗାଁକୁ ଗାଁ ବୁଲି ପ୍ରଚାରକୁ ଜୋରଦାର କରିଥିଲେ। ଏସବୁ ଦଳୀୟ ପ୍ରାର୍ଥୀ ସେମାନଙ୍କର ପ୍ରଚାର ଜୋରଦାର ଚଳାଇଥିବା ବେଳେ ସ୍ବାଧୀନ ପ୍ରାର୍ଥୀମାନେ ମଧ୍ୟ ପ୍ରଚାରରେ ପଛରେ ପଡି ନ ଥିଲେ।