ନୂଆଦିଲ୍ଲୀ, ୨୬।୫ : ଦେଶରେ ୨୧୦୦ ଅଣ ମାନ୍ୟତା ପ୍ରାପ୍ତ ରାଜନୈତିକ ଦଳ ବିରୋଧରେ ନିର୍ବାଚନ କମିଶନ ପଦକ୍ଷେପ ଗ୍ରହଣ କରିବେ। ଏସବୁ ଦଳଗୁଡ଼ିକ ଅଡ଼ିଟ ରିପୋର୍ଟ ଏବଂ ନିର୍ବାଚନ ଖର୍ଚ୍ଚ ରିପୋର୍ଟ, ଠିକଣା ସୂଚନା ପରିବର୍ତ୍ତନ ସମ୍ବିଧାନିକ ଆବଶ୍ୟକତାକୁ ପାଳନ କରିନାହାନ୍ତି। ଏହି ଦଳଗୁଡ଼ିକ କୌଣସି ରିପୋର୍ଟ ଦାଖଲ କରିନାହାଁନ୍ତି। ଏସବୁ ଦଳଗୁଡ଼ିକ ବିରୋଧରେ ଜନପ୍ରତିନିଧି ଅଧିନିୟମର ଧାରା ୨୯ ଅନ୍ତର୍ଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଟାଇମ୍ସ ଅଫ ଇଣ୍ଡିଆ ସୂତ୍ରରୁ ପ୍ରକାଶ ଯେ, ୨୦୦୧ ରେ ଏହି ଦଳଗୁଡ଼ିକର ସଂଖ୍ୟା ୬୯୪ ଥିଲା, ଯାହା ୨୦୨୧ରେ ୨୧୦୦କୁ ବୃଦ୍ଧି ପାଇଥିଲା। ତେବେ ୨୦୧୯ ନିର୍ବାଚନରେ କେବଳ ୬୨୩ ଟି ଦଳ ଅଂଶଗ୍ରହଣ କରିଥିଲେ। ବର୍ତ୍ତମାନ ଏହି ଦଳଗୁଡିକୁ ପଞ୍ଜିକୃତ କରିବା ପାଇଁ ସରକାରଙ୍କ ନିଷ୍ପତ୍ତିକୁ ଅପେକ୍ଷା କରାଯାଇଛି।
ନିର୍ବାଚନ ଆୟୋଗ ଏହାର ନିର୍ଦ୍ଦେଶନାମା ଅନୁଯାୟୀ କହିଛନ୍ତି ଯେ ମୁଖ୍ୟ ନିର୍ବାଚନ କମିଶନରଙ୍କ ଦାୟିତ୍ୱ ଗ୍ରହଣ କରିବାର କିଛି ଦିନ ମଧ୍ୟରେ ପ୍ରାୟ ୮୭ ଟି ପଞ୍ଜିକୃତ ଅଣ ମାନ୍ୟତା ପ୍ରାପ୍ତ ରାଜନୈତିକ ଦଳ ବିଷୟରେ ସୂଚନା ମିଳିଛି। ଏହା ପରେ, ନାମ ଏବଂ ଠିକଣା ଅନୁସନ୍ଧାନରେ ଯାଞ୍ଚ ହୋଇପାରି ନାହିଁ। ବର୍ତ୍ତମାନ ସେସବୁ ଦଳକୁ ଅଣ ମାନ୍ୟତା ପ୍ରାପ୍ତ ପାର୍ଟିର ତାଲିକାରୁ ହଟାଇ ଦିଆଯିବ।
ତେବେ ତାଲିକାରେ ନାମ ଥିବା ଏଭଳି ଦଳ ଗୁଡ଼ିକ ୩୦ ଦିନ ମଧ୍ୟରେ ସମ୍ପୃକ୍ତ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ବ୍ୟାଙ୍କ କାରବାରର ପ୍ରାଧିକୃତ ଦସ୍ତଖତ କପି ସହିତ ବର୍ତ୍ତମାନର ବାର୍ଷିକ ଯୋଗଦାନ ରିପୋର୍ଟ, ଅଡିଟ ଆକାଉଣ୍ଟ ପ୍ରମାଣ ଦାଖଲ କରିପାରିବେ ।