କଟକ ଅଫିସ,୫ା୧: ରାଜ୍ୟ ବାର କାଉନ୍ସିଲ ନିର୍ବାଚନ ପାଇଁ ପ୍ରକ୍ରିୟା ଆରମ୍ଭ କରିବା ସହ ୬ସପ୍ତାହ ମଧ୍ୟରେ ଶେଷ କରିବାକୁ ମଙ୍ଗଳବାର ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ପୂର୍ବ ଭୋଟର ତାଲିକା ଅନୁସାରେ ନିର୍ବାଚନ ଆୟୋଜନ କରିବାକୁ ଜଷ୍ଟିସ ଅରିନ୍ଦମ ସିହ୍ନାଙ୍କୁ ନେଇ ଗଠିତ ଖଣ୍ଡପୀଠ ରାଜ୍ୟ ବାର କାଉନ୍ସିଲକୁ କହିଛନ୍ତି। ଶେଷଥର ପାଇଁ ୨୦୧୪ ରେ ବାର କାଉନ୍ସିଲ ନିର୍ବାଚନ ହୋଇଥିଲା। ୨୦୧୯ ମେ’ ୫ରୁ କାଉନ୍ସିଲର କାର୍ଯ୍ୟକାଳ ଶେଷ ହୋଇଯାଇଛି। ଅବଧି ଶେଷ ପରେ ମଧ୍ୟ ଦୀର୍ଘ ଦିନ ଧରି ନିର୍ବାଚନ କରାଯାଉ ନାହିଁ। ଫଳରେ ହଜାର ହଜାର ଆଇନଜୀବୀ ବିଭିନ୍ନ ସୁବିଧା ପାଇବାରୁ ବଞ୍ଚତ୍ତ ହେଉଥିଲେ। ତେଣୁ ତୁରନ୍ତ ନିର୍ବାଚନ କରିବା ପାଇଁ ନିର୍ଦ୍ଦେଶ ଦେବାକୁ ଆବେଦନକାରୀ ତଥା ବାର୍ କାଉନ୍ସିଲର ପୂର୍ବତନ ଅଧ୍ୟକ୍ଷ ଚିନ୍ମୟ ମହାନ୍ତି ଏବଂ ବାର କାଉନସିଲର ୩ଥର ସଦସ୍ୟ ରହିଥିବା ସିତାଂଶୁ ଦ୍ୱିବେଦୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟଙ୍କ ଏହି ରାୟକୁ ଆଇନଜୀବୀ ମହଲରେ ସ୍ବାଗତ କରାଯାଇଛି। ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ଅଶୋକ ମହାନ୍ତି ଓ ଜି.ଏମ୍. ରଥ ମାମଲା ପରିଚାଳନା କରୁଥିଲେ।