ବ୍ରହ୍ମପୁର,୨ା୧୦(ନରସିଂହ ସାହୁ):ସାଧାରଣ ନିର୍ବାଚନ ପାଇଁ ଏବେଠୁ ଗଞ୍ଜାମ ଜିଲାରେ ରାଜନୈତିକ ଉଷ୍ମତା ଦେଖାଦେଇଛି। ଶାସକ ବିଜେଡି ସଙ୍ଗଠନକୁ ଆହୁରି ଅଧିକ ଶକ୍ତିଶାଳୀ କରିବା ପାଇଁ ରୋଡମ୍ୟାପ ପ୍ରସ୍ତୁତ କରିଛି। ବିଜେଡିକୁ ଟକ୍କର ଦେବା ନିମନ୍ତେ ମୁଖ୍ୟ ବିରୋଧୀ ଦଳ ଭାଜପା ମଧ୍ୟ ସଜବାଜ ହେଉଛି। ତେବେ ସର୍ବପୁରାତନ କଂଗ୍ରେସ ଦଳ ଏ କ୍ଷେତ୍ରେରେ ପଛରେ ପଡ଼ିଥିବା ଲକ୍ଷ୍ୟ କରାଯାଇଛି। ଗାନ୍ଧୀ ଜୟନ୍ତୀରୁ ବିଜେଡି ଜନ ସମ୍ପର୍କ ପଦଯାତ୍ରା ଆରମ୍ଭ କରିବା ସହ ଘରେ ଘରେ ଶଙ୍ଖ କାର୍ଯ୍ୟକ୍ରମକୁ ଜୋରଦାର କରିବ। ଜିଲାର ସମସ୍ତ ୧୩ଟି ଯାକ ବିଧାନସଭା ନିର୍ବାଚନ ମଣ୍ଡଳୀରେ ଏହା ଅନୁଷ୍ଠିତ ହେବ।
ଜିଲା ବିଜେଡି ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ କହିଛନ୍ତି, ୨୦୧୯ ନିର୍ବାଚନରେ ଦଳ ଜିଲାର ୧୨ଟି ବିଧାନସଭା ଆସନ ହାତେଇଥିଲା। କେବଳ ସାନଖେମୁଣ୍ଡି ଆସନ ଖସି ଯାଇଥିଲା। ୨୦୨୪ ନିର୍ବାଚନରେ ସେହି ଆସନ ଛଡ଼ାଇ ଆଣିବା ଲକ୍ଷ୍ୟ ରଖାଯାଇଛି। ଜିଲାରେ ଶତ ପ୍ରତିଶତ ସଫଳତା ହାସଲ ପାଇଁ ଏବେଠୁ ପ୍ରୟାସ ଆରମ୍ଭ କରାଯାଇଛି। ଅପରପକ୍ଷରେ ଗୋପାଳପୁର ବିଧାୟକ ଅଢ଼େଇ ବର୍ଷ ତଳୁ ବିଜେଡିରୁ ବହିଷ୍କୃତ ହୋଇଛନ୍ତି। ସେଠାରେ ନୂଆ ଚେହେରା ପ୍ରାର୍ଥୀ ହେବେ। ସେହିପରି ଦିଗପହଣ୍ଡି ବିଧାୟକଙ୍କ ପରଲୋକ ଯୋଗୁ ସେଠାରେ ମଧ୍ୟ ନୂଆ ପ୍ରାର୍ଥୀ ଲଢ଼ିବେ। ସଭାପତି ତଥା ମୁଖ୍ୟମନ୍ତ୍ରୀ ଯାହାଙ୍କୁ ପ୍ରାର୍ଥୀ କରିବେ ତାଙ୍କ ଜିତାପଟ ଲାଗି ସବୁ କର୍ମୀ ଓ ନେତା ଲାଗିପଡ଼ିବେ। ଆଉ କେତେକ ନିର୍ବାଚନ ମଣ୍ଡଳୀରେ ବିବାଦ ଦେଖାଦେଇଥିବା ସତ୍ତ୍ୱେ ତା’ର ଆଲୋଚନା ଦ୍ୱାରା ସମାଧାନ କରାଯିବ ଏବଂ ବିଜେଡିର ବିଜୟ ସୁନିଶ୍ଚିତ ବୋଲି ଜିଲା ସଭାପତି ଆଶାବାଦୀ ଅଛନ୍ତି।
ଭାଜପା ପକ୍ଷରୁ ମଧ୍ୟ ବିଜେଡିକୁ ମୁକାବିଲା ନିମନ୍ତେ ରଣନୀତି ଆରମ୍ଭ ହୋଇଛି। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ପ୍ରଚାର ବିଭିନ୍ନ ମଣ୍ଡଳରେ ଚାଲିଛି। ଇତିମଧ୍ୟରେ ରାଜ୍ୟ ସଭାପତି ମନମୋହନ ସାମଲ ଓ ଅନ୍ୟ ପଦାଧିକାରୀ ଏକାଧିକ ଥର ଜିଲା ଗସ୍ତରେ ଆସି ନେତା ଓ କର୍ମୀଙ୍କୁ ମନ୍ତ୍ର ଫୁଙ୍କିଛନ୍ତି। ସଂଗଠନ ବଢ଼ିଥିବା ଚିକିଟି, ପୋଲସରା ଓ ସୋରଡ଼ାକୁ ଅଧିକ ଫୋକସ କରାଯାଇଛି।
ସୂଚନାଯୋଗ୍ୟ, ଅତୀତରେ ଏହି ଜିଲା କଂଗ୍ରେସର ଦୁର୍ଗ ହୋଇଥିଲା। ଆଞ୍ଚଳିକ ଦଳ ବିଜେଡି ଗଠନ ପରେ କଂଗ୍ରେସର ସ୍ଥିତିର ରସାତଳଗାମୀ ହେବାରେ ଲାଗିଛି। ବିଜେଡି ରାଜନୀତି ଆରମ୍ଭ ପରେ ପ୍ରଥମ ୨୦୦୦ ନିର୍ବାଚନରେ ସୋରଡ଼ା ଓ ଜଗନ୍ନାଥପ୍ରସାଦରୁ କଂଗ୍ରେସ ବିଧାୟକ ନିର୍ବାଚିତ ହୋଇଥିଲେ। ୨୦୦୪ ନିର୍ବାଚନରେ ଗୋପାଳପୁରରୁ କଂଗ୍ରେସ ଜିିତିଥିଲା। ୨୦୦୯ ନିର୍ବାଚନରେ ନୂଆ ନିର୍ବାଚନ ମଣ୍ଡଳୀ ସାନଖେମୁଣ୍ଡିରୁ କଂଗ୍ରେସ ପ୍ରାର୍ଥୀ ନିର୍ବାଚିତ ହୋଇଥିଲେ। ୨୦୧୪ ନିର୍ବାଚନରେ କଂଗ୍ରେସ ୧୩ ନିର୍ବାଚନ ମଣ୍ଡଳୀରେ ପରାଜିତ ହୋଇଥିଲା। ୨୦୧୯ ନିର୍ବାଚନରେ ମଧ୍ୟ ସେହି ସାନଖେମୁଣ୍ଡି କଂଗ୍ରେସ ଦଖଲକୁ ଯାଇଛି। ଆଗାମୀ ନିର୍ବାଚନରେ କଂଗ୍ରେସ ସ୍ଥିତି କଣ ହେବ ସେନେଇ ଏବେଠୁ ଚର୍ଚ୍ଚା ଆରମ୍ଭ ହୋଇଯାଇଛି।