ପାଟନା,୧୯।୩: ପୁଣିଥରେ ବିହାର ରାଜନୀତି ସରଗରମ। ଚିରାଗ ପାସଓ୍ବାନ ଏବଂ ପଶୁପତି ପାରସଙ୍କ ମଧ୍ୟରେ ଚାଲିଥିବା ରାଜନୈତିକ ଲଢ଼େଇରେ ବର୍ତ୍ତମାନ ପୁତୁରା ବାଜିମାତ କରିଛନ୍ତି। ସୋମବାର ଭାଜପା ରାଜ୍ୟର ୫ ଆସନ ପୁତୁରା ଚିରାଗଙ୍କୁ ଦେବାର ବାଜି ଖେଳିଥିଲା। ଅର୍ଥାତ ଦାଦା-ପୁତୁରାଙ୍କ ମଧ୍ୟରେ ଚାଲିଥିବା ଲଢ଼େଇରେ ପୁତୁରା ବାଜିମାତ କରିନେଇଥିଲେ। ଶେଷରେ ଅନ୍ୟୋପାୟ ନ ପାଇ ପଶୁପତି କେନ୍ଦ୍ରୀୟ ମନ୍ତ୍ରୀମଣ୍ଡଳରୁ ଇସ୍ତଫା ଦେଇଛନ୍ତି।
ଚର୍ଚ୍ଚା ମୁତାବକ, ଭାଜପା ନେତୃତ୍ୱାଧୀନ ଏନ୍ଡିଏରୁ ଅଲଗା ହେବା ପରେ ରାମବିଲାସ ପାସଓ୍ବାନଙ୍କ ଭାଇ ଏବଂ ଚିରାଗ ପାସଓ୍ବାନ୍ଙ୍କ ଦାଦା ପଶୁପତି INDIA ମେଣ୍ଟରେ ସାମିଲ ହୋଇପାରନ୍ତି। ଏମିତିରେ ବିହାରରେ ଏନ୍ଡିଏ ପାଇଁ ପୂର୍ବଥର ଭଳି ସମୀକରଣ ସୃଷ୍ଟି ହୋଇଛି। କହିବାକୁ ଗଲେ ଗତ ଥର ତୁଳନାରେ ଏଥର ସ୍ଥିତି ଅଧିକ ମଜଭୂତ ଅଛି। ୨୦୧୯ ଭଳି ଏଥର ମଧ୍ୟ ଆର୍ଜେଡି ଶୂନରେ ରହିଯାଉ ବୋଲି ଲାଲୁ ଚାହିଁବେ ନାହିଁ। ଏଣୁ ସେ ନିଶ୍ଚିତ ଭାବେ ପଶୁପତିଙ୍କୁ ନିଜ ଦଳରେ ସାମିଲ କରିବା ଲାଗି ଚେଷ୍ଟା କରିବେ ବୋଲି କୁହାଯାଉଛି।
ଦିନଥିଲା ପଶୁପତି ପାରସ୍ ରାଷ୍ଟ୍ରୀୟ ଲୋକ ଜନଶକ୍ତି ପାର୍ଟିର ଅଧ୍ୟକ୍ଷ ଥିବା ସମୟରେ ଖେଳ ଖେଳିଥିଲେ। ସେ ଏଲ୍ଜିପିର ୬ରୁ ୫ ଏମ୍ପିଙ୍କୁ କାଢ଼ି ନେଇଥିଲେ। ଏହାପରେ ଚିରାଗ ଏକୁଟିଆ ହୋଇଯାଇଥିଲେ। ଏବେ ଉକ୍ତ ଏମ୍ପିମାନଙ୍କ ଚିନ୍ତା ବଢ଼ିଛି। କାରଣ ଭାଜପା ପଶୁପତିଙ୍କୁ ଗୋଟିଏ ବି ଆସନ ଦେଇନାହିଁ। ତେଣେ ଚିରାଗ ଉକ୍ତ ଏମ୍ପିଙ୍କ ଉପରେ ଖପ୍ପା ଅଛନ୍ତି। ଚିରାଗ ଏବେ ନୂଆ ମୁହଁ ଖୋଜିପାରନ୍ତି।
କହିରଖୁଛୁ, ପଶୁପତି ପାରସ ଆଗାମୀ ଲୋକ ସଭା ନିର୍ବାଚନରେ ବିହାରରେ ଏନ୍ଡିଏ ମେଣ୍ଟରେ ତାଙ୍କ ଦଳକୁ ସାମିଲ କରା ନ ଯିବାରୁ ଖପ୍ପା ହୋଇ ମନ୍ତ୍ରୀମଣ୍ଡଳରୁ ଇସ୍ତଫା ଦେଇଛନ୍ତି। ହେଲେ ଏଯାବତ ସେ ଏନ୍ଡିଏରେ ରହିବା ନଚେତ ବିହାରରେ ମେଣ୍ଟ ସହ ମିଶି ନିର୍ବାଚନ ଲଢ଼ିବା ପ୍ରଶ୍ନକୁ ନେଇ ମୁହଁ ଖୋଲି ନାହାନ୍ତି। ଏଣୁ ତାଙ୍କର ଆଗାମୀ ରାଜନୈତିକ ପଦକ୍ଷେପ ଉପରେ ସମସ୍ତଙ୍କ ନଜର ରହିଛି।
