ନୂଆଦିଲ୍ଲୀ,୨୫।୪: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗିରଫ ହୋଇ ଜେଲ୍ ଯିବା ପରେ ତାଙ୍କ ପତ୍ନୀ ସୁନୀତା କେନ୍ଦ୍ର ସରକାରଙ୍କୁ ସମାଲୋଚନା କରି ଆସୁଛନ୍ତି। ସେ ପ୍ରଥମେ ଏକ ଖବରଦାତା ସମ୍ମିଳନୀ କରି ସାଧାରଣ ଲୋକଙ୍କ ନିକଟକୁ ତାଙ୍କ ସ୍ବାମୀଙ୍କ ବାର୍ତ୍ତା ପହଞ୍ଚାଇଥିଲେ। ଏହା ପରେ ସେ ରାଞ୍ଚିରେ ‘ଇଣ୍ଡିଆ ’ ମେଣ୍ଟର ରାଲିରେ କେନ୍ଦ୍ର ସରକାରଙ୍କୁ କଟାକ୍ଷ କରିଥିଲେ। ଏବେ ସେ ଦିଲ୍ଲୀର ଆମ ଆଦମୀ ପାର୍ଟି (ଏଏପି) ପ୍ରାର୍ଥୀଙ୍କ ପାଇଁ ଏକ ରୋଡ ଶୋ’ କରିବାକୁ ଯାଉଛନ୍ତି।
ଦିଲ୍ଲୀରେ ଆମ ଆଦମୀ ପାର୍ଟିର ୪ ଜଣ ପ୍ରାର୍ଥୀଙ୍କ ପାଇଁ ସୁନୀତା ଏକ ସାଧାରଣ ସଭାରେ ଉଦ୍ବୋଧନ ଦେବେ। ସେ ଶନିବାର ଏବଂ ରବିବାର ଏକ ରୋଡ୍ ଶୋ’ ଆୟୋଜନ କରିବେ ଏବଂ ଦିଲ୍ଲୀର ୪ ଲୋକ ସଭା ପ୍ରାର୍ଥୀଙ୍କ ପାଇଁ ଭୋଟ ମାଗିବେ, ଯାହାର ଆରମ୍ଭ ପୂର୍ବ ଦିଲ୍ଲୀରୁ ହୋଇପାରେ। ପାର୍ଟି ସୂତ୍ରରୁ ଜଣାପଡ଼ିଛି ଯେ ସୁନୀତା ପ୍ରଥମେ କୋଣ୍ଡଲି ଅଞ୍ଚଳରେ ଏକ ରୋଡ ଶୋ’ କରିବେ। ଏହି ପୂର୍ବ ଦିଲ୍ଲୀ ଲୋକ ସଭା ଆସନରୁ ବିଧାୟକ କୁଲଦୀପ କୁମାର ନିର୍ବାଚନ ମଇଦାନରେ ଅଛନ୍ତି। ଏହା ପୂର୍ବରୁ ସଞ୍ଜୟ ସିଂ ଖବରଦାତା ସମ୍ମିଳନୀରେ କହିଥିଲେ ଯେ ସୁନୀତା ଶୁକ୍ରବାରଠାରୁ ଦିଲ୍ଲୀରେ ହେବାକୁ ଥିବା ଲୋକ ସଭା ନିର୍ବାଚନ ପାଇଁ ପ୍ରଚାର କରିବେ।
ମାର୍ଚ୍ଚରେ ମନି ଲଣ୍ଡରିଂ ମାମଲାରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଦ୍ୱାରା କେଜ୍ରିିୱାଲଙ୍କୁ ଗିରଫ କରାଯିବା ପରେ ସୁନୀତା ଧୀରେ ଧୀରେ ତାଙ୍କ ଭାବମୂର୍ତ୍ତିରୁ ବାହାରି ପ୍ରଚାର ଅଭିଯାନକୁ ଗତି ଦେବା ପାଇଁ ଏକ ବଡ଼ ଭୂମିକା ତୁଲାଉଛନ୍ତି। ମାର୍ଚ୍ଚ ୨୧ରେ କେଜ୍ରିୱାଲଙ୍କୁ ଗିରଫ କରାଯାଇଥିଲା ଏବଂ ସେ ମେ ୭ ପର୍ଯ୍ୟନ୍ତ ନ୍ୟାୟିକ ହେପାଜତରେ ଅଛନ୍ତି।