![](https://www.dharitri.com/wp-content/uploads/2024/03/Untitled-1-201.jpg)
ମେଙ୍ଗାଲୁରୁ,୧୯ା୩: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏବଂ ଆୟକର ବିଭାଗ ରାଡାରରେ ଥିବା କର୍ପୋରେଟ୍ କମ୍ପାନୀ ଓ ବ୍ୟବସାୟୀମାନଙ୍କଠାରୁ ଇଲେକ୍ଟୋରାଲ ବଣ୍ଡ୍ ଜରିଆରେ ଭାଜପା ବିପୁଳ ଅର୍ଥ ଦାନ ଆକାରରେ ଗ୍ରହଣ କରିଛି। ଏହା ବିଶ୍ୱର ସର୍ବବୃହତ୍ ଦୁର୍ନୀତି ବୋଲି ଲୋକପ୍ରିୟ ଅଭିନେତା ପ୍ରକାଶ ରାଜ କହିଛନ୍ତି। ତାଙ୍କ ମତରେ ଭାଜପାକୁ ଦାନ ଦେଇଥିବା କମ୍ପାନୀଗୁଡ଼ିକୁ ଠିକା ପ୍ରଦାନ କରିବା ହେଉଛି ବିଶ୍ୱର ସବୁଠୁ ବଡ଼ ଦୁର୍ନୀତି। ଏହା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ଦେଶବାସୀଙ୍କ ଆଗରେ ସ୍ପଷ୍ଟୀକରଣ ରଖନ୍ତୁ। କେନ୍ଦ୍ର ସରକାର ଏତେଦିନ ପର୍ଯ୍ୟନ୍ତ ଇଲେକ୍ଟୋରାଲ ବଣ୍ଡ୍ ତଥ୍ୟକୁ କାହିଁକି ଲୁଚାଇ ରଖିଥିଲେ। ଏହା କ’ଣ ଲୁଟ୍ ନୁହେଁ କି ବୋଲି ପ୍ରକାଶ ପ୍ରଶ୍ନ କରିବା ସହ ପ୍ରଧାନମନ୍ତ୍ରୀଙ୍କୁ ମନ୍ କୀ ବାତ୍ରେ ଏହାର ଉତ୍ତର ମାଗିଛନ୍ତି। ସେ ଆହୁରି କହିଛନ୍ତି, ଭାଜପାକୁ ଏତେ ଟଙ୍କା କ’ଣ ପାଇଁ ଦରକାର। ଭୋଟରଙ୍କୁ ଲାଞ୍ଚ ଦେବାକୁ ନା ବିଧାୟକ ଏବଂ ଏମ୍ପିମାନଙ୍କୁ କିଣିବା ପାଇଁ? ରାଜନୈତିକ ଦଳଗୁଡ଼ିକୁ କେଉଁମାନେ ଟଙ୍କା ଦେଇଛନ୍ତି, ନାଗରିକ ଭାବେ ଆମେ ଜାଣିବା ଦରକାର।