ଅସ୍ତରଙ୍ଗ,୬।୧୦ (ମମତା ଜେନା): ପୁରୀ ଜିଲାର ଅସ୍ତରଙ୍ଗ ଠାରୁ ପର୍ଯ୍ୟଟନ କ୍ଷେତ୍ର ପିର ଜହାନିଆ ବେଳାଭୂମି ପର୍ଯ୍ୟନ୍ତ ୫ କିଲୋମିଟର ରାସ୍ତାର ସମ୍ପ୍ରସାରଣ କାର୍ଯ୍ୟରେ ବାଧକ ସାଜିଛି ରାସ୍ତା ଉପରେ ଥିବା ବିଦ୍ୟୁତ ଖୁଣ୍ଟ ଓ ଜବରଦଖଲ। ବିଦୁତ ଖୁଣ୍ଟ ଉଠାଇବା ପାଇଁ ବିଭାଗୀୟ ଅଧିକାରୀ ଗ୍ରାମ୍ୟ ଉନ୍ନୟନ ବିଭାଗକୁ ଚିଠି ଲେଖିବା ସହ ରାସ୍ତା କଡ଼ରେ ଥିବା ଜବରଦଖଲ ଉଚ୍ଛେଦ ପାଇଁ ଅସ୍ତରଙ୍ଗ ତହସିଲଦାରଙ୍କୁ ଜଣାଇଥିଲେ ମଧ୍ୟ ଅଦ୍ୟାବଧି କିଛି ସୁଫଳ ମିଳିନାହିଁ। ଏହାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ଏହି ସମ୍ବେଦନଶୀଳ ରାସ୍ତା କାର୍ଯ୍ୟ ୨୦୨୪ ମାର୍ଚ୍ଚ ସୁଦ୍ଧା ସାରିବାକୁ ଧାର୍ଯ୍ୟ ହୋଇଥିବା ବେଳେ ବିଦ୍ୟୁତ ଖୁଣ୍ଟ, ଜବରଦଖଲ ବାଧକ ଥିବାରୁ ରାସ୍ତା କାର୍ଯ୍ୟ କିପରି ସରିବ ତାହା ଅଦ୍ୟାବଧି ଜଣାପଡ଼ିନାହିଁ। ଆହୁରି ମଧ୍ୟ କୋଟି କୋଟି ଟଙ୍କା ବ୍ୟୟରେ ଗଙ୍ଗାଦେବୀ ମନ୍ଦିର ନିକଟରେ ଚାଲୁଥିବା ପର୍ଯ୍ୟଟକଙ୍କ ରହଣି ପାଇଁ ସ୍ଥାୟୀ ଇକୋ ରିଟ୍ରିଟ୍ କାର୍ଯ୍ୟ ଡିସେମ୍ବର ସୁଦ୍ଧା ସରିଲେ ମୁଖ୍ୟନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଉଦ୍ଘାଟନ୍ କରାଯିବାର ପ୍ରସ୍ତାବ ରହିଛି ବୋଲ ପୁରୀ ଜିଲା ବନ ଅଧିକାରୀ ତଥା ଡିଏଫଓ ପି. ରାମାସ୍ବାମୀ କହିଛନ୍ତି। ଏ ବିଷୟରେ ନିମାପଡ଼ାର ଗ୍ରାମ୍ୟ ଉନ୍ନୟନ ବିଭାଗର ଅଧୀକ୍ଷଣ ଯନ୍ତ୍ରୀ ସତ୍ୟଜିତ ଦଳାଇ, କାକଟପୁର ସହକାରୀ ଯନ୍ତ୍ରୀ ତ୍ରିଲୋଚନ ପାତ୍ର ଓ ଅସ୍ତରଙ୍ଗ ବ୍ଲକ କନିଷ୍ଠ ଯନ୍ତ୍ରୀ କୃଷ୍ଣଚନ୍ଦ୍ର ତାଡ଼ କହିଛନ୍ତି କି ଆମେ ଚିଠି ଲେଖି ଜଣାଇଛୁ, ଯେତେଶୀଘ୍ର ବିଦ୍ୟୁତ୍ ଖୁଣ୍ଟ ଓ ରାସ୍ତା ଜବରଦଖଲ ହଟିବ ଆମେ ନିର୍ଦ୍ଧାରିତ ସମୟ ପୂର୍ବରୁ ରାସ୍ତା କାର୍ଯ୍ୟ ସରିବା ପାଇଁ ପ୍ରସ୍ତୁତ ରହିଛୁ। ଏହାକୁ ଗୁରୁତର ସହ ବିଚାର କରି ଜିଲାପାଳ ତଥା ୫-ଟି ସଚିବ ଦୃଷ୍ଟି ଦେବା ପାଇଁ ସାଧାରଣରେ ଦାବି ହୋଇଛି।