ପାଟଣା,୧୧ା୧୧(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ଥାନା ଡିଆନାଳି ବିଦ୍ୟୁତ୍ ସବ୍ଷ୍ଟେଶନରୁ ଗତ ଅକ୍ଟୋବର ୨୪ ବିଳମ୍ବିତ ରାତିରେ ସଶସ୍ତ୍ର ଆକ୍ରମଣ ଓ ଭୟଭୀତ କରାଇ ଲକ୍ଷାଧିକ ଟଙ୍କାର ଆଲୁମିନିୟମ ବିଦ୍ୟୁତତାର ଚୋରି ଘାଟଣାର ପାଟଣା ପୋଲିସ ଶନିବାର ପର୍ଦ୍ଦାଫାଶ କରିଛି। ୧୧ଜଣିଆ ଏହି ଚୋର ଗ୍ୟାଙ୍ଗ୍ରୁ ୫ ଜଣଙ୍କୁ ପାଟଣା ପୋଲିସ ଗିରଫ କରି କୋର୍ଟ ଚାଲାଣ କରିଥିବା ଏକ ପ୍ରେସ୍ ରିଲିଜରେ ଘଟଗାଁ ଏସ୍ଡିପିଓ ସୁଦର୍ଶନ ଗଙ୍ଗୋଇ ସୂଚନା ଦେଇଛନ୍ତି। ଗିରଫ ୫ ଜଣ ଚୋର ହେଉଛନ୍ତି କେନ୍ଦ୍ରାପଡ଼ା ଜିଲା ଟାଉନ ଥାନା ମହୀପାଳ ଗାଁର ଶେଖ୍ ସୌକାତ (୨୭), ମାର୍ଶାଘାଇ ଥାନା ଶିଳିପୁର ଗାଁର ହରିଶ୍ଚନ୍ଦ୍ର ରାଉତ ଓରଫ ବାପୁ (୨୧) କେନ୍ଦ୍ରାପଡ଼ା ସଦର ଥାନା ଜାମଦର ଗାଁ ସେକ୍ ଇର୍ଫାନ (୨୮), ଉକ୍ତ ଗାଁ ସାଜନ ଖାଁ (୩୮) କଟକ ଜିଲା ସଦର ନେମାଳ ଥାନା ନରେନ୍ଦ୍ରପୁରର ଅରବିନ୍ଦ ମଲ୍ଲିକ ଓରଫ ଧୁଣ୍ଡ (୨୨)। ଆଉ ୬ଜଣ ଚୋର ଫେରାର ଅଛନ୍ତି। ଏହି ଚଢ଼ାଉ ପାଟଣା ଥାନାଧିକାରୀ ଦୀପ୍ତି ରଞ୍ଜନ ସାହୁଙ୍କ ନେତୃତ୍ୱରେ କେନ୍ଦ୍ରାପଡ଼ା ଓ କଟକରେ ଗତ ଗୁରୁବାର ଓ ଶୁକ୍ରବାର ହୋଇଥିଲା। ଏହି ଟିମ୍ରେ ହାବିଲଦାର ରମେଶ ଚନ୍ଦ୍ର ନାଏକ, କନଷ୍ଟେବଳ ନିହାର ରଞ୍ଜନ ନାଏକ, ଜେନା ମୁଣ୍ଡା, ନିହାର ରଞ୍ଜନ ଦ୍ବିବେଦୀ ପ୍ରମୁଖ ସାମିଲ ହୋଇଥିଲେ। ଏମାନଙ୍କଠାରୁ ନଗଦ ୩୭ ହଜାର ୫ଶହ ଟଙ୍କା, ୨ ପିକ୍ଅପ୍, ଗୋଟେ ଟାଟାଏସି,୧ ଭୁଜାଲି, ଓ୍ବେୟାର କଟର୍କୁ ପୋଲିସ ଜବତ କରିଛି।
ସୂଚନା ଯେ, ଏହି ୫ ଜଣ କୁଖ୍ୟାତ ଚୋରଙ୍କ ନାମରେ ଏହା ପୂର୍ବରୁ କେନ୍ଦ୍ରାପଡ଼ା, ମାର୍ଶାଘାଇ ଓ ଜଗତସିଂହପୁରରେ ଏକାଧିକ ଚୋରି, ଡକାୟତି ଓ ରାହାଜାନି ଭଳି ସଙ୍ଗୀନ ମାମଲା ଥିବା ଥାନାଧିକାରୀ ଶ୍ରୀ ସାହୁ କହିଛନ୍ତି। ଏନେଇ ପାଟଣା ଥାନାରେ ୧୯୫/୨୩ ରେ ମାମଲା ରୁଜୁ ହୋଇ ଅଭିଯୁକ୍ତଙ୍କୁ ଗିରିଫ କରି କୋର୍ଟ ଚାଲାଣ କରାଯାଇଛି। ଖୁବ୍ଶୀଘ୍ର ଏହି ଚୋର ଗ୍ୟାଙ୍ଗର ଫେରାର ଥିବା ଅନ୍ୟ ୬ ଜଣ ଚୋରଙ୍କୁ ଗରିଫ କରାଯିବ ବୋଲି ଏସ୍ଡିପିଓ ଗାଙ୍ଗୋଇ କହିଛନ୍ତି।