ବଅଁରପାଳ,୫।୬(ଡି.ଏନ.ଏ.)- ବଅଁରପାଳ ବ୍ଲକ କୁଲାଡ଼ ଆଞ୍ଚଳିକ କଲେଜକୁ ଯାଇଥିବା ରାସ୍ତା ପାର୍ଶ୍ୱରେ ଏକ ବିଦ୍ୟୁତ୍ ଖୁଣ୍ଟ ବିପଦପୂର୍ଣ୍ଣ ଅବସ୍ଥାରେ ରହିଛି। ଖୁଣ୍ଟଟି ବଙ୍କ ହୋଇଯାଇଥିବାବେଳେ ଏକ ଲୁହା ତାର ସହାୟତାରେ ତାହାକୁ ନିକଟସ୍ଥ ଶୁଖିଲା ଗଛରେ ବନ୍ଧାଯାଇଛି। ଉକ୍ତ ଖୁଣ୍ଟଟି ଢଳି ରହିଥିବାରୁ ଶୁଖିଲା ଗଛ ଭାଙ୍ଗିଗଲେ ତାହା ରାସ୍ତା ଉପରକୁ ଖସିପଡ଼ିବ। ଏହି ରାସ୍ତା ଦେଇ କଲେଜକୁ ଦୈନିକ ବହୁ ଛାତ୍ରୀଛାତ୍ର ଯାତାୟାତ କରୁଥିବାରୁ ଅଘଟଣ ଆଶଙ୍କା କରାଯାଉଛି। ସେହିପରି ଶୁଖିଲା ଗଛକୁ କଟା ନ ଯାଇ ବିଦ୍ୟୁତ୍ ଖୁଣ୍ଟ ସହ ବନ୍ଧା ଯାଇଥିବାରୁ ଏହା ମଧ୍ୟ ବିପଦ ଆଶଙ୍କା ବଢ଼ାଉଛି। ତୁରନ୍ତ ବିଦ୍ୟୁତ୍ ବିଭାଗ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।
