କେନ୍ଦୁଝର,୩୦ା୧୧(ସ୍ବ.ପ୍ର.): ଚମ୍ପୁଆ ଥାନା ଅନ୍ତର୍ଗତ ଚମ୍ପୁଆ ସେକ୍ସନର କାଳିକା ପ୍ରସାଦ ବିଟ୍ ଅଧିନସ୍ଥ ମିରିଗିସିଙ୍ଗା ଜଙ୍ଗଲରେ ହାତୀ ଟ୍ରାକିଂ କାମରେ ଯାଇଥିବା ବେଳେ ବୁଧବାର ଅପରାହ୍ନରେ ଏକ ଦନ୍ତା ଆକ୍ରମଣରେ ଜଣେ ଗଜ ସାଥୀଙ୍କ ମୃତ୍ୟୁ ଘଟିଛି। ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଚମ୍ପୁଆ ଡାକ୍ତରଖାନା ଓ ପରେ କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାକୁ ଅଣାଯାଉଥିବା ବେଳେ ବାଟରେ ମୃତ୍ୟୁ ଘଟିଥିବା ଜଣାପଡ଼ିଛି। ମୃତକଙ୍କ ନାମ ସଞ୍ଜୟ ମୁଣ୍ଡା (୨୦) ବୋଲି ଜଣାପଡ଼ିଛି। ତାଙ୍କ ଘର ସ୍ଥାନୀୟ ମିରିଗିସିଙ୍ଗା ଗ୍ରାମରେ ବୋଲି ଜଣାପଡ଼ିଛି। ଉକ୍ତ ହାତୀପଲରେ ୧୦ଟି ହାତୀ ଥିଲେ। ତେବେ ସେ ଅନ୍ୟ ୫ ଜଣଙ୍କ ସହିତ ଯାଇଥିବା ବେଳେ ଦନ୍ତା ହାତୀଟି ହଠାତ୍ ଆକ୍ରମଣ କରି ଛାତିରେ ଦଳି ଦେଇଥିଲା।
