କେନ୍ଦୁଝର,୩୦ା୩(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲାରେ ହାତୀପଲକୁ ଠେଙ୍ଗାରେ ମାଡ଼ ଘଟଣାରେ ବନ ବିଭାଗ ଅଭିଯୁକ୍ତଙ୍କୁ ଚିହ୍ନଟ କରିଛି। ଭିଡିଓ ଭାଇରାଲ ପରେ ଧରିତ୍ରୀରେ ଖବର ପ୍ରକାଶ ପରେ ବନ ବିଭାଗ ତତ୍ପରତା ଦେଖାଇଥିଲା। ଯୁବକ ପାଟଣା ରେଞ୍ଜ ଅନ୍ତର୍ଗତ ଖିରେଇଟାଙ୍ଗିରୀ ସେକ୍ସନ କଣ୍ଟିଆପଡ଼ା ଗ୍ରାମର ସିପୁନ ବେହେରା ବୋଲି ଚମ୍ପୁଆ ରେଞ୍ଜ ଉଖୁଣ୍ଡା ଫରେଷ୍ଟର ଓ ଅନ୍ୟମାନେ ଚିହ୍ନଟ କରିଥିବା ଡିଏଫ୍ଓ ଧନ୍ରାଜ ଏଚ୍ଡି କହିଛନ୍ତି। ଉକ୍ତ ଯୁବକ ଜଣଙ୍କ ଫେରାର ଅଛନ୍ତି। ବନ୍ୟପ୍ରାଣୀ ସୁରକ୍ଷା ଆଇନ୍ ଅନୁଯାୟୀ ତୁରନ୍ତ ଗିରଫ କରାଯିବ ବୋଲି ଡିଏଫ୍ଓ କହିଛନ୍ତି।
ପ୍ରକାଶ ଯେ, କେନ୍ଦୁଝର ଜିଲାରେ ହାତୀଙ୍କ ଉପଦ୍ରବ ଲାଗି ରହିଛି। ହାତୀଙ୍କ ଗତିପଥ ନୀରିକ୍ଷଣ କରିବାକୁ ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ନିଆଯାଉଛି। ଅନେକ ସମୟରେ ଜନସାଧାରଣ ହାତୀଙ୍କ ଉପରକୁ ନିଆଁ ହୁଳା, ପଥର ଫୋପାଡ଼ିବା, ଠେଙ୍ଗା ଓ ବାଡିରେ ପିଟାପିଟି କରିବା ଘଟଣା ଘଟୁଛି। ଏହାର ସେଲଫି ବା ଭିଡିଓ ଉତ୍ତୋଳନ କରି ସାମାଜିକ ଗଣମାଧ୍ୟମରେ ଛାଡୁଛନ୍ତି। ଏଭଳି ଘଟଣା ଯୋଗୁ ହାତୀପଲ ବ୍ୟତିବ୍ୟସ୍ତ ହୋଇ ଅଧିକ ପ୍ରତିକ୍ରିୟାଶୀଳ ହୋଇପଡୁଛନ୍ତି। ଚିହ୍ନଟ ଯୁବକଙ୍କ ଜଣଙ୍କ ଅନୁରୂପ ହାତୀପଲଙ୍କୁ ବାଡ଼ିରେ ମାଡ଼ ମାରୁଥିବାର ଭିଡିଓ କରି ସୋସିଆଲ ମିଡିଆରେ ଅପଲୋଡ୍ କରିଛନ୍ତି।
ଅନ୍ୟପକ୍ଷେ ହାତୀପଲଙ୍କୁ ଦିନରାତି ଟ୍ରାକିଂ ଓ ମନିଟରିଂ କରିବା ପାଇଁ ବହୁ ସଂଖ୍ୟାରେ କର୍ମଚାରୀ ଏବଂ ବିଭିନ୍ନ ପ୍ରକାରର ଅତ୍ୟାଧୁନିକ ବୈଷୟିକ ଜ୍ଞାନ ବ୍ୟବହାର କରାଯାଉଛି। ମାତ୍ର ଏଭଳି ଘଟଣାକୁ ବନ ବିଭାଗ କର୍ମଚାରୀ କିଭଳି ଧରପଗଡ଼ କରି ରୋକିପାରୁନାହାନ୍ତି ତାହାକୁ ନେଇ ସନ୍ଦେହ ଉପୁଜିଛି। ହାତୀ ଓ ବନ୍ୟପ୍ରାଣୀଙ୍କୁ ବ୍ୟବହାର କରି ସାମାଜିକ ମିଡିଆରେ ଅପଲୋଡ୍ କରାଯାଉଛି। ଏଭଳି ୧୦ରୁ ଊର୍ଦ୍ଧ୍ୱ ସାମାଜିକ ମିଡିଆ ଆକାଉଣ୍ଟ ରହିଥିଲେ ହେଁ ବନ ବିଭାଗ ପଦକ୍ଷେପ ନେଉନାହିଁ। ଫଳରେ ଏଭଳି ଘଟଣା ବଢି ଚାଲିଥିବା ପୂର୍ବତନ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ କହିଛନ୍ତି। ଏହି ଦିଗରେ ଦୃଢ଼ ପଦକ୍ଷେପ ନେବା ଜରୁରୀ ବୋଲି ମତପ୍ରକାଶ ପାଇଛି।
