ଖୋର୍ଦ୍ଧା ଅଫିସ,୨୨ା୨: ଖୋର୍ଦ୍ଧାରେ ପୁଣି ପଶିଲା ଦନ୍ତା ହାତୀ। ମଙ୍ଗଳବାର ଅପରାହ୍ନ ୩ଟାରେ ଚନ୍ଦକା ପଟୁ ଏକ ଦନ୍ତା ନିକଟ ଜଙ୍ଗଲ ଦେଇ ଜିଲା ମୁଖ୍ୟ ଚିକିତ୍ସାଳୟ ପଛପଟ କାଜୁ ଜଙ୍ଗଲକୁ ପଶି ଆସିଥିଲା। ଫଳରେ ସ୍ଥାନୀୟ ଲୋକେ ଭୟଭୀତ ହୋଇପଡ଼ିଥିଲେ। ଖବରପାଇ ବନ ବିଭାଗର ଏକ ଟିମ୍ ହାତୀର ଗତିବିଧି ଉପରେ ନଜର ରଖିଥିଲା। ଦୀର୍ଘ ୫ ଘଣ୍ଟା କାଜୁ ଜଙ୍ଗଲ ମଧ୍ୟରେ ରହିବା ପରେ ପାନବରଜ ଦେଇ ଦନ୍ତା ଜରିପୁଟ ଜଙ୍ଗଲ ଆଡ଼କୁ ଯାଇଥିବା ବନ ବିଭାଗ ପକ୍ଷରୁ ସୂଚନା ମିଳିଛି। ଦନ୍ତା ଘଉଡ଼ାଇବା ଲାଗି ବନ କର୍ମଚାରୀଙ୍କୁ ନାକେଦମ୍ ହେବାକୁ ପଡ଼ିଥିଲା। ଏହି ଦନ୍ତା ସୋମବାର ଟାଙ୍ଗିଆପଡ଼ା ଜଙ୍ଗଲ ନିକଟ ଗ୍ରାମୀଣ ଜଙ୍ଗଲରେ ବୁଲୁଥିବା ବେଳେ ଗୁରୁଜଙ୍ଗ ହାଇଟେକ୍ ନର୍ସରୀ ଦେଇ କାଜୁ ଜଙ୍ଗଲକୁ ଆସିଥିଲା।
କି, ପୂର୍ବରୁ ଚନ୍ଦକା ପଟୁ ଦନ୍ତା ମେଡିକାଲ ପଛପଟ କାଜୁ ଜଙ୍ଗଲ ଭିତରେ ପଶିବାର ନଜିର ରହିଛି। ଗତ ଦୁଇ ବର୍ଷ ମଧ୍ୟରେ ଦନ୍ତା ଖୋର୍ଦ୍ଧା ମେଡିକାଲରେ ୩ ଥର ପଶିଥିବା ବେଳେ ସହରରେ ଏହାକୁ ମିଶାଇ ୫ଥର ପଶିଲେଣି। ଜଙ୍ଗଲରେ ଖାଦ୍ୟ ଏବଂ ପାଣିର ଅଭାବ ଯୋଗୁ ହାତୀମାନେ ଏବେ ଗ୍ରାମାଞ୍ଚଳ ଓ ସହରମୁହଁା ହେଉଛନ୍ତି। ଏ ସମ୍ପର୍କରେ ବନ ଅଧିକାରୀ ଜୟକୃଷ୍ଣ ପଣ୍ଡା କୁହନ୍ତି, ଦନ୍ତା ଏବେ ଜରିପୁଟ ଜଙ୍ଗଲରେ ରହିଥିବା ବେଳେ ତା’ର ଗତିବିଧି ଉପରେ ନଜର ରଖାଯାଇଛି। ଆଖପାଖ ଗ୍ରାମର ଲୋକଙ୍କୁ ଅନ୍ଧାରରେ ବାହାରକୁ ନ ବାହାରିବା ଲାଗି ପରାମର୍ଶ ଦିଆଯାଇଛି। ଦନ୍ତାକୁ ଚନ୍ଦକାରେ ଛାଡ଼ିବାକୁ ଚେଷ୍ଟା କରାଯିବ। ଅନ୍ୟପକ୍ଷରେ ପରିବେଶବିତ୍ ଜୟକୃଷ୍ଣ ପାଣିଗ୍ରାହୀ କୁହନ୍ତି, ଚନ୍ଦକା ଜଙ୍ଗଲରେ ରହିଥିବା ଦନ୍ତାଙ୍କ ଉପରେ ନଜର ରଖିବା ଦରକାର। ଜଙ୍ଗଲ ପରିବେଶରେ ସେମାନଙ୍କ ପାଇଁ ପର୍ଯ୍ୟାପ୍ତ ଖାଦ୍ୟ ଓ ପାନୀୟଜଳ ବ୍ୟବସ୍ଥା କରାଗଲେ ସେମାନେ ଗାଁ କିମ୍ବା ସହରମୁହଁା ହେବେନାହିଁ। ହାତୀଙ୍କ ପାଇଁ ସ୍ବତନ୍ତ୍ର ଦୃଷ୍ଟି ଦିଆଯିବା ଜରୁରୀ ବୋଲି ସେ କହିଛନ୍ତି।