ଭୁବନେଶ୍ୱର, ୯।୨(ବ୍ୟୁରୋ)/ ନରସିଂହପୁର(ସ୍ବ.ପ୍ର.): ହାତୀ ମୃତ୍ୟୁକୁ ନେଇ ପୁଣି ଚର୍ଚ୍ଚାରେ ଆଠଗଡ଼ ବନଖଣ୍ଡ। ହାତୀ ମୃତ୍ୟୁ ପାଇଁ କର୍ତ୍ତବ୍ୟରେ ଅବହେଳା ଅଭିଯୋଗରେ ଆଠଗଡ଼ ରେଞ୍ଜ ଅଫିସର ନିଲମ୍ବିତ ହୋଇଥିବାବେଳେ ସେହି ଆଠଗଡ଼ ବନଖଣ୍ଡ ଅଧୀନ ନରସିଂହପୁର ୱେଷ୍ଟ ରେଞ୍ଜରୁ ପୁଣି ଏକ ହାତୀ ମୃତ୍ୟୁ ଘଟଣା ସାମ୍ନାକୁ ଆସିଛି। ଏହି ରେଞ୍ଜରେ ଥିବା ବାରାସିଂଘା ବିଟ୍ରୁ ମାତ୍ର ଏକ କିଲୋମିଟର ଦୂର ବାଲିକିଆରି ରିଜର୍ଭ ଜଙ୍ଗଲରେ ଏକ ହାତୀର ଗଳିତ ମୃତଦେହ କ୍ରାଇମବ୍ରାଞ୍ଚ ଏସ୍ଟିଏଫ୍ ଜବତ କରିଛି। ସୋମବାରଠାରୁ ଏସ୍ଟିଏଫ୍ର ଦୁଇଟି ଟିମ୍ ନରସିଂହପୁର ୱେଷ୍ଟ ରେଞ୍ଜ ଅଞ୍ଚଳରେ ଡେରା ପକାଇଥିଲା। ସେହି ରେଞ୍ଜରେ ୨ଟି ହାତୀଙ୍କୁ ମାରି ଦାନ୍ତ କାଟି ନିଆଯାଇଥିବା ଏସ୍ଟିଏଫ୍କୁ ଗୋଇନ୍ଦା ସୂଚନା ମିଳିଥିଲା। ସୋମବାର ପ୍ରଥମେ ଜୟପୁର ବିଟ୍ରେ ଥିବା ନର୍ସରିରେ ୮ ଜଣ ୱାଚରଙ୍କୁ ଏସ୍ଟିଏଫ୍ ପୂର୍ବ ନିର୍ଦ୍ଧାରିତ ଯୋଜନା ଅନୁସାରେ ଉଠାଇ ନେଇ ନରସିଂହପୁର ଥାନାରେ ରଖି ପଚରାଉଚରା କରି କିଛି ତଥ୍ୟ ସଂଗ୍ରହ କରିଥିଲା। ତେବେ ମଙ୍ଗଳବାର ସକାଳୁ ନର୍ସରି ପଛପଟେ ଏଛ ସ୍ଥାନକୁ ଖୋଳିବାକୁ ଯିବା ପୂର୍ବରୁ ଜୟପୁର ଓ ବାରାସିଂଘା ବିଟ୍ର ୱାଚରମାନେ ଏସ୍ଟିଏଫ୍ କାର୍ଯ୍ୟାନୁଷ୍ଠାନ ବିରୋଧରେ ଜୋରଦାର ନାରାବାଜି କରିଥିଲେ। ଯେହେତୁ ଏହି ହାତୀ ମୃତ୍ୟୁ ଘଟଣାରେ ବନ କର୍ମଚାରୀଙ୍କ ସମ୍ପୃକ୍ତି ଥିବା ଗୋଇନ୍ଦା ସୂଚନା ଏସ୍ଟିଏଫ୍କୁ ମିଳିଥିଲା, ତେଣୁ ସେଠାରେ କାହା ସହ ଯୁକ୍ତି ନ କରି ଚୁପଚାପ ବାରାସିଂଘା ବିଟ୍ ଆଡ଼କୁ ଏସ୍ଟିଏଫ୍ ଟିମ୍ ମୁହାଁଇଥିଲେ। ବାରାସିଂଘା ବିଟ୍ରେ ସନ୍ଦେହଘେରରେ ଥିବା ସ୍ଥାନ ପାଖରେ ପହଞ୍ଚତ୍ବା ପରେ ଜେସିବି ଦ୍ୱାରା ମାଟି ଖୋଳାଗଲା ଏବଂ ନାଟକୀୟ ଘଟଣା କ୍ରମରେ ଏକ ଛୋଟ ହାତୀର କଙ୍କାଳ ଦେଖାଯାଇଥିଲା।
ହାତୀର କଙ୍କାଳ ଖୋଳି ବାହାର କରିବା ସମୟରେ ଏସ୍ଟିଏଫ୍ର ଅନୁରୋଧ କ୍ରମେ ନରସିଂହପୁର ତହସିଲଦାର ଆଲୋକ କୁମାର ଦେହୁରୀ ଉପସ୍ଥିତ ଥିଲେ। ଆଠଗଡ଼ ଡିଏଫ୍ଓ ଛୁଟିରେ ଥିବାରୁ ଦାୟିତ୍ୱରେ ଥିବା କଟକ ଡିଏଫ୍ଓ ସଞ୍ଜୟ କୁମାର ସ୍ବାଇଁ ମଧ୍ୟ ଘଟଣାସ୍ଥଳରେ ପହଞ୍ଚତ୍ଥିଲେ। ମାଟିତଳୁ ସମସ୍ତ ହାଡ଼ ଓ ଅବଶିଷ୍ଟାଂଶକୁ ବାରାସିଂଘା ବିଟ୍ କାର୍ଯ୍ୟାଳୟରେ ରଖାଯାଇଛି। ବୁଧବାର ଓୟୁଏଟି ଭେଟେରିନାରି କଲେଜରୁ ପ୍ରାଣୀ ପୋଷ୍ଟ ମର୍ଟମ୍ ବିଶେଷଜ୍ଞ ତଥା ପାଥୋଲୋଜି ବିଭାଗର ପ୍ରଫେସର ଡା. ସୁଶେନ କୁମାର ପଣ୍ଡା ତାଙ୍କ ଟିମ୍ ଧରି ପହଞ୍ଚତ୍ବା ପରେ ବ୍ୟବଚ୍ଛେଦ କରାଯିବ। ବ୍ୟବଚ୍ଛେଦ ରିପୋର୍ଟ ଆସିବା ପରେ କେଉଁ କାରଣରୁ ହାତୀଟିର ମୃତ୍ୟୁ ହେଲା ତାହା ଜଣାପଡ଼ିବ।
ଅନ୍ୟପକ୍ଷରେ ବନ୍ୟପ୍ରାଣୀ ବିଶେଷଜ୍ଞମାନେ ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି। ଜଙ୍ଗଲରେ ଶିକାରୀମାନେ ହାତୀକୁ ମାରିବା ପରେ ଯେତେ ଶୀଘ୍ର ସମ୍ଭବ ଦାନ୍ତ କାଟିନେଇ ସେହି ସ୍ଥାନ ଛାଡ଼ି ପଳାନ୍ତି। ହେଲେ ଏହି ଘଟଣାରେ ଜେସିବି ବିନା ହାତୀକୁ ପୋତିବା ଏବଂ ଜଙ୍ଗଲରେ ଏହି କାମ ବନ କର୍ମଚାରୀଙ୍କ ଛଡ଼ା ଆଉ କେହି କରିବା ସମ୍ଭବ ନୁହେଁ ବୋଲି ବିଶେଷଜ୍ଞମାନେ କହିଛନ୍ତି। ତେବେ ନରସିଂହପୁର ୱେଷ୍ଟ ରେଞ୍ଜ ଅଫିସର ଅଶୋକ କୁମାର ବେହେରା କହିଛନ୍ତି, ବାଲିକିଆରି ସଂରକ୍ଷିତ ଜଙ୍ଗଲ ଭିତରେ ଏହି କାମ ହୋଇନାହିଁ। ସେହିପରି ଚଢ଼ାଉ ବେଳେ ଉପସ୍ଥିତ ଥିବା ଖୋର୍ଦ୍ଧା ଜିଲାର ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ କହିଛନ୍ତି, ନରସିଂହପୁର ବ୍ଲକ ପ୍ରାଣୀଧନ ଅଧିକାରୀ ୨୦୨୧ରେ ମାତ୍ର ଗୋଟିଏ ହାତୀର ମୃତଦେହ ବ୍ୟବଚ୍ଛେଦ କରିଥିଲେ। ତେଣୁ ଏହି ହାତୀଟି ବିନା ବ୍ୟବଚ୍ଛେଦରେ ପୋତା ହୋଇଥିବା ସ୍ପଷ୍ଟ ହେଉଛି। ଅର୍ଥାତ୍ ଉକ୍ତ ଘଟଣାରେ ସ୍ଥାନୀୟ ବନ କର୍ମଚାରୀଙ୍କ ହାତ ରହିଛି। ଏ ସମ୍ପର୍କରେ ପିସିସିଏଫ୍(ବନ୍ୟପ୍ରାଣୀ) ଶଶୀ ପଲ୍ କହିଛନ୍ତି, ଡିଏଫ୍ଓଙ୍କୁ ତୁରନ୍ତ ଘଟଣାସ୍ଥଳକୁ ଯାଇ ତଦନ୍ତ କରିବାକୁ କୁହାଯାଇଛି। ଯଦି କେଉଁ କର୍ମଚାରୀଙ୍କ ଏଥିରେ ସମ୍ପୃକ୍ତି ଥିବା ପ୍ରମାଣ ମିଳିବ ତା’ହାଲେ ତାଙ୍କ ବିରୋଧରେ ନିଶ୍ଚୟ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ।