କେନ୍ଦୁଝର/ଆନନ୍ଦପୁର,୧୧ା୬(ସ୍ବ.ପ୍ର.): ଆନନ୍ଦପୁର ବନ୍ୟପ୍ରାଣୀ ଡିଭିଜନ ଅନ୍ତର୍ଗତ ହଦଗଡ଼ ହସ୍ତୀ ଅଭୟାରଣ୍ୟରୁ ବନ ବିଭାଗ ଏକ ଗଳିତ ଦନ୍ତାହାତୀ ମୃତଦେହ ଶନିବାର ସକାଳେ ଜବତ କରିଥିଲା। ହାତୀଟି ୩ /୪ ଦିନ ତଳେ ମରିଥିବା ସନ୍ଦେହ କରାଯାଉଛି। ହଦଗଡ଼ ହସ୍ତି ଅଭୟାରଣ୍ୟ ମଧ୍ୟରେ ଥିବା କାଠକଟା ସଂରକ୍ଷିତ ଜଙ୍ଗଲରେ ଏହି ଦନ୍ତା ହାତୀ ମରିଥିବାର ଖବର ପାଇ ବନ ବିଭାଗ କର୍ମଚାରୀ ତଥା ପ୍ରାଣୀ ଚିକିତ୍ସକ ସକାଳେ ଘଟଣାସ୍ଥଳକୁ ଯାଇ ମୃତଦେହ ଠାବ କରିଥିଲା। ଆନନ୍ଦପୁର ଡିଏଫ୍ଓ ଅଜିତ୍ ଶତପଥୀ କହିଛନ୍ତି, ଦୁଇ ଦନ୍ତା ହାତୀ ମଧ୍ୟରେ ଲଢେଇ ଯୋଗୁ ଏହି ହାତୀଟି ପାହାଡ଼ ତଳକୁ ଖସି ପଡ଼ିବାରୁ ମୃତ୍ୟୁ ହୋଇଥିଲା। ତେବେ ଲଢେଇ କରିଥିବା ଅନ୍ୟ ଦନ୍ତାହାତୀ କ୍ଷତବିକ୍ଷତ ହୋଇଥିବା ଆଶଙ୍କା ଥିବାରୁ ତାହାର ଅବସ୍ଥା ଉପରେ ନଜର ରଖିବାକୁ ଦାବି ହେଉଛି।