ଢେଙ୍କାନାଳ ଅଫିସ,୧୩ା୩: କି ଦିନ କି ରାତି, ଗାଁ ରାସ୍ତାରେ ପଲପଲ ହୋଇ ବୁଲୁଛନ୍ତି ହାତୀ। କେତେବେଳେ ଘର ଭାଙ୍ଗୁଛନ୍ତି ତ ଆଉ କେବେ ଶୁଣ୍ଢରେ ଟେକି ନେଉଛନ୍ତି ଘରେ ସାଇତି ରଖାଯାଇଥିବା ଧାନ, ଚାଉଳ ବସ୍ତା। ରୋଷେଇ ଘରେ ହାଣ୍ଡିରେ ଥିବା ପଖାଳ ମଧ୍ୟ ସେମାନଙ୍କ ମୁହଁରେ ବାଦ୍ ପଡୁନାହିଁ। ବନ ବିଭାଗ ହାତୀ ଘଉଡ଼ାଇବାରେ ବିଫଳ ହୋଇଥିବାବେଳେ ଜୀବନ ବଞ୍ଚାଇବାକୁ ଛାତ ଉପରେ ଦିନ କାଟୁଛନ୍ତି ଢେଙ୍କାନାଳ ସଦର ରେଞ୍ଜ୍ ଅଧୀନ ବଲାଙ୍ଗିପାଟଣା ଜୁଆଙ୍ଗ ସାହିବାସୀ। କେବଳ ଏତିକି ନୁହେଁ, ଚାଳଘରେ ରହୁଥିବା ବହୁ ପରିବାର ନିକଟରେ ବିକଳ୍ପ ନ ଥିବାରୁ ସେମାନେ ଭିଟାମାଟି ଛାଡ଼ି ନିଜ ସମ୍ପର୍କୀୟଙ୍କ ଘରେ ମୁଣ୍ଡ ଗୁଞ୍ଜିଛନ୍ତି।
ଅଞ୍ଚଳବାସୀଙ୍କ କହିବା କଥା, ପ୍ରାୟ ମାସେ ହେଲା ଏକ ପଲରେ ୩୦ ହାତୀ ଜନବସତିରେ ଉପଦ୍ରବ ସୃଷ୍ଟି କରିଚାଲିଛନ୍ତି। ବାଡ଼ିବଗିଚାରେ ପଶି ଫସଲ ଉଜାଡ଼ି ଦେଉଛନ୍ତି। ଭୋର୍ ସମୟ ଏବଂ ସନ୍ଧ୍ୟାରେ ପ୍ରମୁଖ ରାସ୍ତାରେ ଡେରା ପକାଇ ରହୁଥିବାରୁ ଜରୁରୀ କାମରେ ଲୋକେ ବାହାରକୁ ଯାଇପାରୁନାହାନ୍ତି। ଏକପ୍ରକାର ଗୃହବନ୍ଦୀ ଅବସ୍ଥାରେ ଦିନ କାଟିବାକୁ ବାଧ୍ୟ ହେଉଛନ୍ତି। ସେମାନଙ୍କୁ ଘଉଡ଼ାଇବା ଲାଗି ସମସ୍ତ ଉଦ୍ୟମ ଫେଲ୍ ମାରିଲାଣି। ସମ୍ଭାବ୍ୟ ହାତୀମୃତ୍ୟୁ ଆଶଙ୍କା ଏଡ଼ାଇବାକୁ ବିଦ୍ୟୁତ୍ ବିଭାଗ ରାତିରେ ବିଦ୍ୟୁତ୍ ବିଚ୍ଛିନ୍ନ କରିଦେଉଛି। ଅନ୍ଧାରରେ ହାତୀଙ୍କ ଉପରେ ନଜର ରଖିବା ସମ୍ଭବପର ହେଉନାହିଁ। ଗତ ୧୦ ଦିନ ହେଲା ଉକ୍ତ ପଲରେ ଥିବା ହାତୀ ଅଧିକ ହିଂସ୍ର ଆଚରଣ ପ୍ରଦର୍ଶନ କରୁଛନ୍ତି। ତେଣୁ ଘରୁ ଗୋଡ଼କାଢ଼ିଲେ ଜୀବନ ପ୍ରତି ବିପଦ ଆଶଙ୍କା ଦେଖାଦେଇଛି। ଏ ସଂକ୍ରାନ୍ତରେ ବନ ବିଭାଗ ବିଦ୍ୟୁତ୍ ବିଭାଗକୁ ଅବଗତ କରାଇବା ସତ୍ତ୍ୱେ କୌଣସି ସୁଫଳ ମିଳୁନାହିଁ। ତେଣୁ ଉପଦ୍ରୁତ ଅଞ୍ଚଳବାସୀ ଜିଲାପାଳଙ୍କୁ ତାଙ୍କ କାର୍ଯ୍ୟାଳୟରେ ଭେଟି ଫେରାଦ ହୋଇଛନ୍ତି। ହାତୀ ଉପଦ୍ରବ ରୋକିବା ଲାଗି ବନ ବିଭାଗ ପଦକ୍ଷେପ ନ ହେଲେ ସେମାନେ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।
