ମୋରଡ଼ା,୧୧ା୬(ଡି.ଏନ୍.ଏ.): ବର୍ଷ ତମାମ ହାତୀ ଉପଦ୍ରବ ମୟୂରଭଞ୍ଜ ଜିଲା ମୋରଡ଼ା ବ୍ଲକରେ ଲାଗି ରହିଥିବା ବେଳେ ଏହାକୁ ନେଇ ଲୋକେ ଅତିଷ୍ଠ ହୋଇପଡ଼ିଲେଣି। ହାତୀ ଆକ୍ରମଣରେ ଧନଜୀବନ ନଷ୍ଟ ଘଟଣା ମୋରଡ଼ା ବ୍ଲକରେ ଯେମିତି ଏକ ନିତିଦିନିଆ ଘଟଣା ପାଲଟିଛି। ହାତୀ ଉପଦ୍ରବକୁ ରୋକିବାରେ ବନବିଭାଗ ବିଫଳ ହେଉଥିବାର ସାଧାରଣରେ ଅଭିଯୋଗ ହୋଇଛି। ତେବେ ଶନିବାର ବିଳମ୍ବିତ ରାତିରେ ବ୍ଲକର କୋହି ପଞ୍ଚାୟତରେ ହାତୀପଲ ଏକାଧିକ ଘର ଭାଙ୍ଗିଛନ୍ତି । ଉକ୍ତ ପଞ୍ଚାୟତର ସୋନପୁରିଆ ଗ୍ରାମର କାହ୍ନୁଚରଣ ମାରାଣ୍ଡି ତାଙ୍କ ସ୍ତ୍ରୀ ମତି ଘରେ ଶୋଇଥିବା ବେଳେ ବିଳମ୍ବିତ ରାତିରେ ଏକ ୭ ଟିକିଆ ହାତୀପଲ ତାଙ୍କ ଘର ଉପରେ ଆକ୍ରମଣ କରିଥିଲେ। ଘରକୁ ସମ୍ପୂର୍ଣ୍ଣ ଭାଙ୍ଗିବା ସହ ଘରେ ଥିବା ଧାନ, ଚାଉଳ ଖାଇ ନଷ୍ଟ କରିବା ସହିତ ଏକ ବଳଦକୁ କଚାଡ଼ି ମାରି ଦେଇଥିଲେ l ସେହିପରି ଉକ୍ତ ଗ୍ରାମର ବାଜୁନ ମାରାଣ୍ଡିଙ୍କ ଘର ମଧ୍ୟ ହାତୀପଲ ଭାଙ୍ଗିବା ସହିତ ଘରେ ଥିବା ଧାନ, ଚାଉଳ ଖାଇ ନଷ୍ଟ କରିଥିଲେ ଏବଂ ଘରେ ଥିବା ଆସବାବପତ୍ର ମଧ୍ୟ ନଷ୍ଟ କରିଛନ୍ତି।
ସେହିପରି ଉକ୍ତ ପଞ୍ଚାୟତର ବଡ଼ଫେରା ଗ୍ରାମର ସାନ ଫୁଲରାୟ ମୁର୍ମୁଙ୍କ ଘର କାନ୍ଥ ଭାଙ୍ଗି ଧାନ, ଚାଉଳ ଏବଂ ଅନନ୍ତ ହେମ୍ବ୍ରମଙ୍କର ମଧ୍ୟ ଧାନ, ଚାଉଳ ଖାଇ ନଷ୍ଟ କରିଛନ୍ତି।
ତେବେ ହାତୀ କ୍ଷତିଗ୍ରସ୍ତ ପରିବାରକୁ ଯଥାଶୀଘ୍ର ସରକାରୀ ସହାୟତା ଯୋଗାଇ ଦେବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି। ଏମିତି ହାତୀ ଉପଦ୍ରବ ଜାରି ରହିଲେ ଏବଂ ପ୍ରଶାସନ ଏହା ଉପରେ ରୋକୋ ନ ଲଗାଇଲେ ଅଞ୍ଚଳରେ ଜନଆନ୍ଦୋଳନ ଦେଖାଯିବ। ଲୋକେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
ସୂଚନାଯୋଗ୍ୟ,ଗତ ୮ତାରିଖରେ ହାତୀ ଆକ୍ରମଣରେ ଜଣେ ବୃଦ୍ଧାଙ୍କ ମୃତ୍ୟୁ ହୋଇଥିବା ବେଳେ ହାତୀପଲ ପୁଣି ୯ ତାରିଖରେ ଆଣୁଆ ଗ୍ରାମରେ ପଶି ଜଣଙ୍କ ଘର ନଷ୍ଟ କରିଥିଲେ।
