ଭୁବନେଶ୍ୱର,୧୦ା୧୨(ଅନିଲ ଦାସ): ଗତ ୧୦ ବର୍ଷ(୨୦୧୪-୧୫ରୁ ୨୦୨୩-୨୪) ମଧ୍ୟରେ ରାଜ୍ୟର ବିଭିନ୍ନ ଜଙ୍ଗଲରେ ୮୫୭ ହାତୀଙ୍କର ମୃତ୍ୟୁ ହୋଇଛି । ସେଥିମଧ୍ୟରୁ ୩୦୫ ହାତୀ ରୋଗର ଶିକାର ହୋଇ ମୃତ୍ୟୁବରଣ କରିଥିବା ବେଳେ ୧୪୯ ହାତୀ ବିଦ୍ୟୁତ ଆଘାତ, ପ୍ରାକୃତିକ କାରଣରୁ ୨୨୯, ଶିକାର ଦ୍ୱାରା ୩୦, ବିଷ ଦ୍ୱାରା ୨, ରେଳ ଦୁର୍ଘଟଣା ଦ୍ୱାରା ୨୯, ସଡ଼କ ଦୁର୍ଘଟଣା ଦ୍ୱାରା ୭, ପ୍ରତିହିଂସା ପରାୟଣ ଦ୍ୱାରା ୧୬ ମରିଛନ୍ତି। ତେବେ ୯୦ଟି ହାତୀ କେଉଁ କାରଣରୁ ମରିଛନ୍ତି ତାହା ଅସ୍ପଷ୍ଟ ରହିଛି।
ଭାଜପା ସଭ୍ୟ ପ୍ରଶାନ୍ତ ଜଗଦ୍ଦେବଙ୍କ ଏକ ଲିଖିତ ପ୍ରଶ୍ନର ଉତ୍ତରରେ ମଙ୍ଗଳବାର ବିଧାନସଭାରେ ଜଙ୍ଗଲ, ପରିବେଶ ଓ ଜଳବାୟୁ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ଏହି ସୂଚନା ଦେଇଛନ୍ତି । ମନ୍ତ୍ରୀ କହିଛନ୍ତି, ୨୦୨୪ ନେଭେମ୍ବର ସୁଦ୍ଧା ରାଜ୍ୟରେ ୨୧୦୩ ହାତୀ ଅଛନ୍ତି। ୨୦୧୫ରେ ୧୯୫୪ ହାତୀ ଥିବାବେଳେ ୨୦୧୭ରେ ୧୯୭୬, ୨୦୨୪ ମେ’ରେ ୨୦୯୮ ଏବଂ ୨୦୨୪ ନଭେମ୍ବର ସୁଦ୍ଧା ରାଜ୍ୟରେ ହାତୀ ସଂଖ୍ୟା ୨୧୦୩ରେ ପହଞ୍ଚିଛି । ଶିମିଳିପାଳ ଅଭୟାରଣ୍ୟରେ ସର୍ବାଧିକ ୧୦୩ଟି ହାତୀ ଅଛନ୍ତି ବୋଲି ମନ୍ତ୍ରୀ କହିଛନ୍ତି।
