ଟେନ୍ସା,୯।୮(ଡି.ଏନ.ଏ.): ଗୋଠଛଡ଼ା ଦନ୍ତା ହାତୀକୁ ଟ୍ରାଙ୍କୁଲାଇଜ କରୁନିି ବଣାଇ ବନ ବିଭାଗ। ଦିନରାତି ଗାଁରେ ଆତଙ୍କ ଚଳାଉଛି ଗୋଠଛଡ଼ା ଦନ୍ତା ହାତୀ। ରବିବାର ବିଳମ୍ବିତ ରାତିରେ ସୁନ୍ଦରଗଡ଼ ଜିଲା କୋଇଡ଼ା ବନାଞ୍ଚଳ ରାଣୀଶାଳ ଫରେଷ୍ଟ ବିଟ୍ ଅନ୍ତର୍ଗତ ବଳଡିହି ଓ ପୋଡା ଗ୍ରାମରେ ଦନ୍ତା ହାତୀ ଆତଙ୍କ ଖେଳାଇଛି। ବଳଡିହି ଗ୍ରାମର ରବି ପାତ୍ର (୩୫) ତାଙ୍କ ସ୍ତ୍ରୀ ରୀତା(୨୮) ଓ ୪ ଜଣ ପିଲାଙ୍କୁ ନେଇ ଶୋଇଥିବାବେଳେ ହଠାତ ଦନ୍ତାହାତୀ ପଶି ଆସି ଘର ଉପରେ ଆକ୍ରମଣ କରିଥିଲା। ସ୍ବାମୀ, ସ୍ତ୍ରୀ ଉଠିପଡ଼ି ଛୁଆ ପିଲାଙ୍କୁ ଧରି ଦୌଡ଼ି ପଳେଇଥିଲେ। ଛୋଟ ଝିଅଟି ଭୟରେ ଦୌଡ଼ି ଯାଇ ମକା କିଆରି ଭିତରେ ଲୁଚିଯିବାରୁ ଅଳ୍ପକେ ବର୍ତ୍ତି ଯାଇଥିଲା। ଶବ୍ଦ ଶୁଣି ସାହିପଡ଼ିଶା ହୋହଲ୍ଳା କରି ବାଣ ଫୁଟାଇ ହାତୀକୁ ଘଉଡ଼ାଇବାରୁ ହାତୀଟି ଚାଲି ଯାଇ ପୋଡା଼ଡିହି ଗ୍ରାମରେ ପହଞ୍ଚିଥିଲା। ସେଠାରେ ମୋହନ ଦେହୁରୀ ଓ ତାଙ୍କ ସ୍ତ୍ରୀ ଇନ୍ଦୁ ଦେହୁରୀ ଘରେ ଥିବାବେଳେ ହାତୀ ଆକ୍ରମଣ କରି ଘର ଭାଙ୍ଗି ଦେଇଥିଲା। ଭୟରେ ସେମାନେ ଦୌଡ଼ି ପଳେଇବାରୁ ଅଳ୍ପକେ ବର୍ତ୍ତି ଯାଇଥିଲେ। ଗାଁ ଲୋକେ ସମସ୍ତେ ମିଶି ହାତୀକୁ ଘଉଡାଇବାରୁ ହାତୀଟି ପଳାଇ ଯାଇଥିଲା ।
ହେଲେ ହାତୀଟି ଗାଁଗାଁ ବୁଲୁଛି। ଲୋକେ ଭୟଭୀତ ଅବସ୍ଥାରେ ରହୁଛନ୍ତି। ଏପରି କି ବାରମ୍ବାର ହାତୀ ଆକ୍ରମଣରେ ପ୍ରାଣ ହାନି ନେଇ ଅଞ୍ଚଳବାସୀ ହାତୀକୁ ଟ୍ରାଙ୍କୁଲାଇଜ କରିବା ପାଇଁ ବନ ବିଭାଗକୁ ଅଭିଯୋଗ କରି ଆସୁଥିବାବେଳେ ବିଭାଗୀୟ ଅଧିକାରୀମାନେ ଚୁପ୍ ହୋଇ ବସିଛନ୍ତି। ଏହାର ପ୍ରତିବାଦ କରି ବଳଡିହି ଓ ପୋଡାଡିହି ଗ୍ରାମ ସମେତ ଅଞ୍ଚଳର ଅନ୍ୟ ୪ଟି ଗାଁର ଲୋକ ଏକତ୍ରିତ ହୋଇ କୋଇଡା ରେଞ୍ଜ ଅଫିସ ଘେରାଉ କରି ଧାରଣା ଦେଇଥିଲେ। ଘଟଣାର ତଦନ୍ତ କରି ହାତୀକୁ ଟ୍ରାଙ୍କୁଲାଇଜ କରି ଅନ୍ୟତ୍ର ଛଡ଼ାଯାଉ, କ୍ଷତିଗ୍ରସ୍ତ ପରିବାରକୁ ତୁରନ୍ତ କ୍ଷତିପୂରଣ ଦେବା ଲାଗି ଦାବି କରିଛନ୍ତି। ଏନେଇ ଜିଲା କର୍ତ୍ତୃପକ୍ଷ ତୁରନ୍ତ ଦୃଷ୍ଟି ଦେବାକୁ ଗ୍ରାମବାସୀ ଅନୁରୋଧ କରିଛନ୍ତି।