ଢେଙ୍କାନାଳ ଅଫିସ,୧୦ା୧: ଅନୁଗୋଳ ଜିଲାରେ ୪ଟି ଜୀବନ ନେଇଥିବା ନରହନ୍ତା ହାତୀ ଢେଙ୍କାନାଳ ଜିଲାରେ ପ୍ରବେଶ କରି ସୋମବାର ହିନ୍ଦୋଳ ରେଞ୍ଜ ତର୍କାବେଡା ଜଙ୍ଗଲରେ ଏକ ହାତୀ ଦଳରେ ମିଶିଯାଇଥିବା ଜଣାପଡିଛି। ତଥାପି ଉକ୍ତ ନରହନ୍ତା ହାତୀକୁ ନେଇ ବନବିଭାଗର ଚିନ୍ତା ବଢିବାରେ ଲାଗିଛି। ହାତୀଟିର ଗତିବିଧି ଉପରେ ବିଭାଗ ପକ୍ଷରୁ କଡ଼ା ନଜର ରଖାଯାଇଛି।
ହାତୀ ଆକ୍ରମଣରେ ଅନୁଗୋଳ ଜିଲାରେ ଗୋଟିଏ ଦିନରେ ୪ଜଣଙ୍କ ମୃତ୍ୟୁ ପରେ ଢେଙ୍କାନାଳ ଜିଲା ପ୍ରଶାସନ ସତର୍କ ହୋଇଉଠିଛି। ଜିଲାର ହାତୀ ଉପଦ୍ରବ ଅଞ୍ଚଳ ଗୁଡିକରେ ଲୋକଙ୍କୁ ସତର୍କ କରାଇବା ପାଇଁ ଡାକବାଜି ଯନ୍ତ୍ର ଦ୍ୱାରା ପ୍ରଚାର କରିବାକୁ ସମସ୍ତ ଉପଖଣ୍ଡର ଉପଜିଲାପାଳ, ସମସ୍ତ ତହସିଲଦାର ଓ ବନ ଅଧିକାରୀଙ୍କୁ ଜିଲାପାଳ ସରୋଜ କୁମାର ସେଠୀ ନିର୍ଦ୍ଦେଶ ଦେଇଛନ୍ତି। ବିଶେଷକରି ସନ୍ଧ୍ୟାରେ, ରାତି ଓ ଭୋର ସମୟରେ ବାହାରକୁ ନ ଯିବା ପାଇଁ ଜିଲାପାଳ ନିବେଦନ କରିଛନ୍ତି। ଏଥିସହିତ ହାତୀ ଉପଦ୍ରବ ଅଞ୍ଚଳର ରାସ୍ତାରେ ଲୋକମାନଙ୍କ ସୁରକ୍ଷା ପାଇଁ ବନବିଭାଗ ପକ୍ଷରୁ ସାଇରନ ବଜାଇବା ସହିତ ପାଟ୍ରୋଲିଂ କଡ଼ାକଡ଼ି କରିବା ପାଇଁ ଜିଲାପାଳ, ଜିଲା ବନଖଣ୍ଡ ଅଧିକାରୀଙ୍କୁ ଜଣାଇଛନ୍ତି। ଏ ସଂକ୍ରାନ୍ତରେ ଜିଲାପାଳ କହିଛନ୍ତି, ଯେହେତୁ ପଡ଼ୋଶୀ ଅନୁଗୋଳ ଜିଲାରେ ହାତୀ ଆକ୍ରମଣରେ ୪ଜଣଙ୍କ ଜୀବନହାନି ଘଟିଛି, ଏହାକୁ ଦୃଷ୍ଟିରେ ରଖି ଢେଙ୍କାନାଳ ଜିଲାରେ ମଧ୍ୟ ସତର୍କତା ଅବଲମ୍ବନ କରାଯାଇଛି ା ସମସ୍ତ ଉପଜିଲାପାଳ ଓ ତହସିଲଦାରଙ୍କୁ ହାତୀ ଥିବା ଅଞ୍ଚଳର ଲୋକମାନଙ୍କୁ ମାଇକ ଦ୍ୱାରା ସଚେତନ କରିବା ପାଇଁ କୁହାଯାଇଛି। ସେହିପରି ବନବିଭାଗ ପକ୍ଷରୁ ମଧ୍ୟ ପାଟ୍ରୋଲିଂକୁ କଡାକଡି କରିବା ସହିତ ଲୋକମାନେ ଯେପରି ହାତୀକୁ ବିଚଳିତ ତଥା ହଇରାଣ କରିବେ ନାହିଁ ସେ ନେଇ ସଚେତନ କରାଇବାକୁ ପରାମର୍ଶ ଦିଆଯାଇଛି। କାରଣ ହାତୀ ବିଚଳିତ ହେଲେ ଅଧିକ ହିଂସ୍ର ହୋଇ କ୍ଷୟକ୍ଷତି କରାଇବ ବୋଲି ଜିଲାପାଳ ପ୍ରକାଶ କରିଛନ୍ତି।