ଝୁମ୍ପୁରା/ଚମ୍ପୁଆ,୨ା୧(ଡି.ଏନ.ଏ): କେନ୍ଦୁଝର ଜିଲା ଚମ୍ପୁଆ ରେଞ୍ଜ, ବାଲିବନ୍ଧ ଫରେଷ୍ଟ ସେକ୍ସନ ନିଶ୍ଚିନ୍ତପୁର ଗ୍ରାମ ଜଙ୍ଗଲରେ ଜଣେ ଯୁବକଙ୍କୁ ଦନ୍ତା ଦଳିଦେଇଛି। ଫଳରେ ଯୁବକଙ୍କ ମୃତ୍ୟୁ ଘଟିଛି। ମୃତକ ଜଣକ ହେଲେ ଗ୍ରାମର ଭୀମ ମୁଣ୍ଡା (୪୫)। ମୃତକଙ୍କ ପରିବାରଙ୍କୁ ସମସ୍ତ ସହାୟତା ମିଳିବ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ବନ ବିଭାଗ ସୂଚନା ଅନୁଯାୟୀ, ଭୀମ ଓ ତାଙ୍କ ସ୍ତ୍ରୀ ଏକ ଭୋଜି କାର୍ଯ୍ୟରେ ଯୋଗଦେଇ ବିଳମ୍ବିତ ରାତିରେ ଘରକୁ ଫେରୁଥିଲେ। ରାସ୍ତାରେ ଦନ୍ତା ହାବୁଡ଼ରେ ପଡ଼ିଯାଇଥିଲେ। ହାତୀ ଭୀମକୁ ଗୋଇଠା ମାରି ପରେ ପାଦରେ ଦଳି ଦେବାରୁ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ତାଙ୍କ ସ୍ତ୍ରୀ ଦୌଡ଼ି ଯାଇ ଗଛ ଉହାଡ଼ରେ ଲୁଚିଯାଇ ପ୍ରାଣରକ୍ଷା କରିଥିଲେ। ସୋମବାର ବନ ବିଭାଗ ପକ୍ଷରୁ ମୃତଦେହ ଜବତ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଥିଲା। ପରିବାର ସଦସ୍ୟଙ୍କୁ ଅନୁକମ୍ପା ରାଶି ୪ଲକ୍ଷ ଟଙ୍କା ମିଳିବ ବୋଲି ଚମ୍ପୁଆ ରେଞ୍ଜର ଶିବ ରାଉତ ସୂଚନା ଦେଇଛନ୍ତି। ପ୍ରକାଶ ଯେ, ୨୪ ଟିକିଆ ହାତୀପଲ କିଛିଦିନ ହେବ ନିଶ୍ଚିନ୍ତପୁର ଅଞ୍ଚଳରେ ଆତଙ୍କ ଖେଳାଉଛନ୍ତି। ପଲରେ ଗୋଟିଏ ଦନ୍ତାହାତୀ ଦଳ ଛାଡ଼ି ଚାଲି ଯାଉଥିବାରୁ ବନ ବିଭାଗ କର୍ମଚାରୀଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି।