କେନ୍ଦୁଝର,୨୬ା୮(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲାରେ ହାତୀମାନଙ୍କ ସୁରକ୍ଷା ପାଇଁ ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ବିଶେଷକରି ରେଳ ଦୁର୍ଘଟଣାରେ ନୀରିହ ହାତୀମାନଙ୍କ ଜୀବନ ଯାଉଥିବାରୁ ଆଉ ଯେଭଳି ଦୁର୍ଘଟଣା ନ ଘଟେ ସେଥିପ୍ରତି ବନ ବିଭାଗ ଓ ରେଳ ବିଭାଗ ମିଳିତ କାମ କରୁଛନ୍ତି। ଏଥିପାଇଁ ବନ ବିଭାଗ ପକ୍ଷରୁ ରେଳଲାଇନର ଯୁଗ୍ମ ନିରୀକ୍ଷଣ କରି ହାତୀମାନଙ୍କ ଯାତାୟାତ ସ୍ଥାନଗୁଡ଼ିକ ଚିହ୍ନଟ କରିବା ସହ ସେସବୁ ସ୍ଥାନରେ କିଭଳି ଦୁର୍ଘଟଣା ରୋକାଯାଇ ପାରିବ ସେ ନେଇ ଅନୁଧ୍ୟାନ କରୁଛନ୍ତି। ପୂର୍ବତଟ ରେଲଲାଇନ ତୁଳସୀଚଉରାଠାରୁ ସୀତାବିଞ୍ଜ ପର୍ଯ୍ୟନ୍ତ ବସନ୍ତପୁର ରେଳ ଷ୍ଟେଶନର କନିଷ୍ଠ ଯନ୍ତ୍ରୀ ଅମିତ କୁମାର ଓ ସଦର ରେଞ୍ଜ ଅଧିକାରୀ ବିଜୟ କୁମାର ମହାନ୍ତ ଟ୍ରଲିରେ ବସି ନିରୀକ୍ଷଣ କରିଛନ୍ତି। ପୂର୍ବରୁ ଦୁର୍ଘଟଣା ରୋକିବା ପାଇଁ ଉଭୟ ବିଭାଗ ପକ୍ଷରୁ ଆଲୋଚନା କରି ଟ୍ରେନ୍ ଚଳାଚଳକୁ ନେଇ ଏସ୍ଓପି ଜାରି କରିଛନ୍ତି।