କେନ୍ଦୁଝର, ୩୧।୮(ସ୍ବ.ପ୍ର.): କେନ୍ଦୁଝର ସଦର ରେଞ୍ଜ୍ ଅଧୀନ ଜୁଡିଆ ନିକଟ ଓୟୁଏଟି ପରିସରରେ ବିଦ୍ୟୁତ୍ ଆଘାତରେ ୨ ମାଈ ହାତୀଙ୍କ ମୃତ୍ୟୁ ପରେ ହାତୀଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କମ ଉଚ୍ଚତାରେ ଥିବା ବିଦ୍ୟତ୍ ତାରରେ ଲତା ଲାଗିଥିଲେ ହେଁ ନିୟମିତ ବନ ଏବଂ ବିଦ୍ୟୁତ୍ ବିଭାଗ ପକ୍ଷରୁ ଯାଞ୍ଚ କରାଯାଉନାହିଁ। ଜଣେ ଜଣେ ଫରେଷ୍ଟ ଗାର୍ଡଙ୍କୁ ଏକାଧିକ ବିଟ୍ ଦାୟିତ୍ୱ ଦିଆଯାଇଥିବାରୁ ଜଙ୍ଗଲ ସୁରକ୍ଷା ଠିକ୍ ଭାବରେ ହୋଇପାରୁନାହିଁ। ଅନ୍ୟପକ୍ଷେ ହାତୀ ମୃତ୍ୟୁ ଘଟଣାରେ ବିଦ୍ୟୁତ୍ ବିଭାଗର କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି।
ସୂଚନାଯୋଗ୍ୟ, ଗତ ୨୫ ତାରିଖ ଭୋର ସମୟରେ ୯ଟିକିଆ ହାତୀପଲ ନିକଟସ୍ଥ ସାନଘାଗରା ଡିପିଏଫ୍ ଜଙ୍ଗଲରେ ରହି ଆସୁଥିବାବେଳେ ସେଥିମଧ୍ୟରୁ ୨ଟି ମାଈ ହାତୀ ଓୟୁଏଟି ପରିସରକୁ ଖାଦ୍ୟ ଅନ୍ବେଷଣରେ ଆସି ଲତା ଖାଇବାବେଳେ ଲାଗିଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ମୃତ୍ୟୁବରଣ କରିଥିଲେ। ୨.୪ ମିଟର ଉଚ୍ଚତାରେ ଏଲ୍ଟି ଲାଇନ ଥିବାରୁ ହାତୀ ସହଜରେ ତାର ସଂସ୍ପର୍ଶରେ ଆସି ମୃତ୍ୟୁବରଣ କରିଥିଲେ ମଧ୍ୟ ଲାଇନ ଟ୍ରିପ୍ ହୋଇ ନ ଥିଲା। ବିଦ୍ୟୁତ୍ ତାର ଉପରେ ଡାଳ ଖଣ୍ଡେ ପଡିଲେ ଲାଇନ କଟୁଥିଲେ ମଧ୍ୟ ହାତୀ ଦୁଇଟି ମରିଥିଲେ ମଧ୍ୟ ଲାଇନ ଟ୍ରିପ୍ ନ ହେବା ସାଧାରଣରେ ଚର୍ଚ୍ଚା ଜୋର୍ ଧରିଛି। ନିକଟସ୍ଥ ସବଷ୍ଟେଶନରେ କଟ୍ଆଉଟ ନ ଦିଆଯାଇ ସିଧାସଳଖ ୧୧ କେଭିକୁ ସଂଯୋଗ ଦିଆଯାଇଥିଲା। ସାନଘାଗରା ଡିପିଏଫ୍ ନିକଟରେ ଖୋଲା ଟ୍ରାନ୍ସଫର୍ମର ରହିଥିଲେ ମଧ୍ୟ ଏହାର ପ୍ରତିକାର ପାଇଁ କୌଣସି ପଦକ୍ଷେପ ନିଆଯାଇନାହିଁ। ଉକ୍ତ ଅଞ୍ଚଳ ଦେଇ ଯାଇଥିବା ୧୧ କେଭି ତାର ଇନସୁଲେଟେଡ କେବୁଲ ମାଧ୍ୟମରେ ବିଛା ଯାଇଥିବାବେଳେ ୫୫ମିଟର ଲୋ-ଟ୍ରାନ୍ସମିଶନ(ଏଲଟି) ଲାଇନ କେବୁଲ କରାଯାଇ ନ ଥିବାରୁ ଏଭଳି ଅଘଟଣ ଘଟିଛି। ତେବେ ହାତୀ ମତ୍ୟୁ ପରେ ୨୫ ତାରିଖ ରାତିରେ ବିଦ୍ୟୁତ୍ ବିଭାଗର ଏକ ଟିମ୍ ହାତୀ ମରିଥିବା ସ୍ଥାନଠାରୁ ଅଳ୍ପ ଦୂରରେ ଥିବା ସବଷ୍ଟେଶନରେ କଟ୍ଆଉଟ ଲଗାଇଥିବା ଜଣାପଡିଛି। ଏହି ଘଟଣା ପରେ ହାତୀଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।