ବସ୍ତା,୨୨ା୮(ଡି.ଏନ.ଏ.)-ବାଲେଶ୍ୱର ଜିଲା ବସ୍ତା ବ୍ଳକ ପତ୍ରଝଡ଼ା ପଞ୍ଚାୟତରେ ହାତୀ ଉପଦ୍ରବ ଯୋଗୁ ଗ୍ରାମବାସୀ ଭୟଭୀତ ହୋଇଥିବା ଜଣାପଡ଼ିଛି। କିଛି ମାସ ଧରି ବାଲେଶ୍ୱର-ମୟୂରଭଞ୍ଜ ଜିଲା ସୀମାନ୍ତ ରାସଗୋବିନ୍ଦପୁର ବ୍ଲକରେ ହାତୀପଲଙ୍କ ଉପଦ୍ରବ ଦେଖିବାକୁ ମିଳିଛି। ହାତୀମାନେ ଦିନରେ ବଣ ଭିତରେ ରହୁଥିବାବେଳେ ରାତିରେ ଗ୍ରାମ ଭିତରକୁ ପଶି ଉପଦ୍ରବ କରୁଛନ୍ତି। ଏହି ହାତୀ ଦଳରୁ ଏକ ଦନ୍ତା ହାତୀ ଶୁକ୍ରବାର ରାତିରେ ପତ୍ରଝଡ଼ା ପଞ୍ଚାୟତର ସରଡ଼ିହା, ମଙ୍ଗଳପୁର, ମୁକୁନ୍ଦପୁର ଓ ପତ୍ରଝଡ଼ା ଗ୍ରାମରେ ପଶିବା ପରେ ଗ୍ରାମବାସୀ ଭୟଭୀତ ହୋଇ ତାକୁ ନିଆଁ ଜଳାଇ ଘଉଡ଼ାଇ ଥିଲେ। ଖବରପାଇ ଫରେଷ୍ଟର ବିବେକାନନ୍ଦ ଜେନାଙ୍କ ସମେତ ଏକ ଟିମ୍ ସେହି ଗ୍ରାମରେ ପହଞ୍ଚତ୍ ହାତୀକୁ ସୁରକ୍ଷିତ ଭାବେ ଅନ୍ୟତ୍ର ପଠାଇବାକୁ ଉଦ୍ୟମ କରିଥିଲେ। ରାତିସାରା ଘଉଡ଼ାଇବା ପରେ ହାତୀଟି ବିଲ ଭିତରକୁ ପଳାଇଥିଲା। ମାତ୍ର ସକାଳେ ପୁଣି ହାତୀଟି ପତ୍ରଝଡ଼ା ମୁଖ୍ୟ ରାସ୍ତା ଦେଇ ରାସଗୋବିନ୍ଦପୁର ବ୍ଲକର ଗୋବରା ଗ୍ରାମ ଆଡ଼କୁ ପଳାଇଯାଇଥିଲା। ହାତୀଟି କିଛି କ୍ଷୟକ୍ଷତି କରିନଥିବା ଜଣାପଡ଼ିଛି। ପୂର୍ବରୁ ଏହି ହାତୀଟି ନିଜର ପରାକ୍ରମ ଦେଖାଉଥିବା ବେଳେ ଏବେ କୌଣସି କାରଣରୁ ଶାନ୍ତ ହୋଇଯାଇଥିବା ବନ ବିଭାଗ ପକ୍ଷରୁ କୁହାଯାଇଛି।
