ନରସିଂହପୁର,୨୯।୭: ଶେଷରେ ଆଖି ବୁଜିଲା ଗୁଳିବିଦ୍ଧ ଦନ୍ତା। ଆଠଗଡ଼ ବନଖଣ୍ଡ ନରସିଂହପୁର ଜଙ୍ଗଲରେ ବୁଲୁଥିବା ଗୁଳିବିଦ୍ଧ ଦନ୍ତାଟି ଚିକିତ୍ସାଧୀନ ଅବସ୍ଥାରେ ଶୁକ୍ରବାର ଆଖି ବୁଜିଛି। ଏନେଇ ଆଠଗଡ଼ ଡିଏଫଓ ସୂଚନା ଦେଇଛନ୍ତି।
ପ୍ରକାଶ ଯେ, ଗତ ମାସରେ ଏହି ଅଞ୍ଚଳରେ ଏକ ଗୁଳିବିଦ୍ଧ ଦନ୍ତାହାତୀ ବୁଲୁଥିବା ନେଇ ବିଧାୟକ ଦେବୀପ୍ରସାଦ ମିଶ୍ର ନିଜ ଫେସବୁକ ଆକାଉଣ୍ଟରେ ପୋଷ୍ଟ କରିଥିଲେ। ଏହାପରେ ବନ ବିଭାଗ ତତ୍ପରତା ଦେଖାଇ ଚିକିତ୍ସା କରିଥିଲା। ହେଲେ ବିଳମ୍ବ ହେହାଇଯାଇଥିବାରୁ କିଛି ଦିନ ପରେ ସେ ଆଖି ବୁଜିଥିଲା। ସେହିଭଳି ଗତ ୬ ଦିନ ଧରି ଦନ୍ତା ବୁଲୁଥିବା ନେଇ ଗ୍ରାମବାସୀ ବନବିଭାଗକୁ ଜଣାଇଥିଲେ। ଅନ୍ୟ ହାତି ସହ ଲଢ଼େଇରେ ଆହତ ହୋଇଥିବା ବନ ବିଭାଗ କହି କଥାକୁ ଖଣ୍ଡନ କରିଥିଲା। ହେଲେ ହାତୀଟି ଗୁରୁବାର ବାରିସିଂଗା ଜଙ୍ଗଲରେ ପଡ଼ିଥିବା ଦେଖିବାକୁ ମିଳିଥିଲା। ଶରୀରର ବିଭିନ୍ନ ସ୍ଥାନରେ ଗୁଳି ବାଜିଥିବା ଜଣାପଡ଼ିଥିଲା। ଏହାପରେ ତାର ଚିକିତ୍ସା କରାଯାଇଥିଲା।
