ଖୋର୍ଦ୍ଧା ଅଫିସ,୮ା୧୦:ଖୋର୍ଦ୍ଧା ସହରରେ ପୁଣି ପଶିଲା ହାତୀ। ଗତ ୪ତାରିଖ ପରେ ବୁଧବାର ରାତିରେ ପଲ୍ଲା ଛକରେ ବରୁଣେଇ ୟୁପି ସ୍କୁଲ ନିକଟରେ ୨ଟି ଦନ୍ତା ହାତୀ ପଶିଛନ୍ତି। ସ୍କୁଲ ନିକଟରେ ହସ୍ତତନ୍ତ ଓ ବୟନ ଶିଳ୍ପ ବିଭାଗ କାର୍ଯ୍ୟାଳୟର ଏକ ପାଚେରି ଭାଙ୍ଗିଛନ୍ତି। ଖବରପାଇ ପୋଲିସ ଏବଂ ବନ ବିଭାଗ ଟିମ୍ ପହଞ୍ଚତ୍ ସ୍ଥିତି ଅନୁଧ୍ୟାନ କରୁଛନ୍ତି। ଖାଦ୍ୟ ଅନ୍ବେଷଣରେ କାଇପଦର ଜଙ୍ଗଲ ପଟୁ ହାତୀ ଆସିଥିବା ବନ ବିଭାଗ ଅନୁମାନ କରିଛି। ଅନ୍ୟପଟେ ଅଞ୍ଚଳରେ ହାତୀ ଥିବା ଜାଣି ସ୍ଥାନୀୟ ଲୋକେ ଭୟଭିତ ହୋଇପଡ଼ିଛନ୍ତି। ଫଳରେ ପୋଲିସ ପକ୍ଷରୁ ସେହି ରାସ୍ତା ଦେଇ ଯାତାୟାତ ବନ୍ଦ କରାଯାଇଛି।
ସୂଚନା ଅନୁଯାୟୀ, ବୁଧବାର ରାତି ସାଢ଼େ ୮ଟାବେଳେ ୨ ଦନ୍ତା ପଲ୍ଲା ସ୍କୁଲ ନିକଟରେ ବୁଲୁଥିବା ସ୍ଥାନୀୟ ଲୋକେ ଦେଖିଥିଲେ। ସେହି ସ୍ଥାନରେ ଲୋକେ ରୁଣ୍ଡ ହେବା ସହ ପାଟିତୁଣ୍ଡ କରିବାରୁ ହାତୀଦ୍ୱୟ ସ୍କୁଲକୁ ପଶିଯାଇଛନ୍ତି। ସ୍କୁଲ ଭିତର ଅନ୍ଧାର ଥିବାରୁ ହାତୀ ସେଠାରୁ ଫେରିବା ବାଟ ନ ପାଇ ଗର୍ଜନ କରିବାକୁ ଲାଗିଥିଲେ। ଫଳରେ ହାତୀକୁ ଘଉଡ଼ାଇବା ଲାଗି ଲୋକେ ଟାୟାର ଜାଳି ନିଆଁ ଲଗାଇଥିଲେ। ପରେ ପୋଲିସ ଆସି ଲୋକଙ୍କୁ ଭୟଭୀତ ନ ହେବା ପାଇଁ କହିଛନ୍ତି। ତେବେ ବନ ବିଭାଗ ବିଳମ୍ବରେ ପହଞ୍ଚତ୍ବା ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଦୀର୍ଘ ସମୟ ଧରି ହାତୀ ସ୍କୁଲ ଭିତରେ ରହିବା ପରେ ରାସ୍ତା ଉପରକୁ ଆସି ସ୍କୁଲ ନିକଟରେ ଥିବା ହସ୍ତତନ୍ତ ବିଭାଗର ଏକ ପାଚେରି ଭାଙ୍ଗି ରାସ୍ତାରେ ଅଟକି ରହିଛନ୍ତି। ଅନ୍ୟପକ୍ଷେ ଗାଁ ମୁହଁା ଛାଡ଼ି ହାତୀ ସହରରେ ପ୍ରବେଶ କରିବା ନେଇ ବନ ବିଭାଗର ଅପାରଗତାକୁ ଦର୍ଶାଉଛି। ନିକଟରେ ହାତୀ ସହରରେ ପ୍ରବେଶ କରିଥିଲେ ମଧ୍ୟ ହାତୀଙ୍କ ଗତିବିଧି ଉପରେ ନଜର ରଖିବାରେ ବନ ବିଭାଗ ଦାୟିତ୍ୱହୀନତାକୁ ସୁଚାଉଛି ବୋଲି ସାଧାରଣରେ ମତ ପ୍ରକାଶ ପାଇଛି। ହାତୀକୁ ନିୟନ୍ତ୍ରଣ କରିବାରେ ବନ ବିଭାଗ ସମ୍ପୂର୍ଣ୍ଣ ଭାବେ ବିଫଳ ହୋଇଛନ୍ତି ବୋଲି ପରିବେଶବିତ୍ ଧନେଶ୍ୱର ବିଧାର କହିଛନ୍ତି।