ଘଣ୍ଟାପଡ଼ା,୨୯ା୯(ପ୍ରଭାତ କୁମାର ସାହୁ): ଜଙ୍ଗଲ ଯିବାକୁ ନା ଧରୁନାହାନ୍ତି ହାତୀପଲ। ରାତିରେ ଚାଷୀଙ୍କ ଜମିରୁ ଫସଲ ଖାଇ ସକାଳୁ ପୁଣି ନଦୀ ତଟରେ ରହୁଛନ୍ତି। ଏହାକୁ ନେଇ ବୌଦ୍ଧ ଜିଲା କଣ୍ଟମାଳ ରେଞ୍ଜ ଅଧୀନ ଘଣ୍ଟାପଡ଼ା ଓ କଣ୍ଟାମାଳ ସେକ୍ସନର ତେଲ ନଦୀ ତଟରେ ରହୁଥିବା ଲୋକେ ଭୟଭୀତ ଅବସ୍ଥାରେ ଅଛନ୍ତି।
ମିଳିଥିବା ସୂଚନା ମୁତାବକ, ୫ଦିନ ହେବ ଉକ୍ତ ହାତୀପଲ ନଦୀ ଆରପଟ ତରଭା ବନାଞ୍ଚଳକୁ ଯିବାକୁ ଚେଷ୍ଟା କରୁଛନ୍ତି। କିନ୍ତୁ ହାତୀପଲରେ ଅନେକ ଛୁଆ ଥିବାରୁ ସେମାନେ ତେଲ ନଦୀ ସ୍ରୋତରେ ଆରପାରିକୁ ଯାଇପାରୁନାହାନ୍ତି। ଫଳରେ ରାତିରେ ଚାଷୀଙ୍କ ଫସଲ ଖାଇ ଦଳି ନଷ୍ଟ କରି ସକାଳୁ ପାଖ ନଦୀତଟ ଜଙ୍ଗଲରେ ଆଶ୍ରୟ ନେଉଛନ୍ତି। କଣ୍ଟାମାଳ ରେଞ୍ଜର କ୍ଷୀରାବ୍ଧି ପ୍ରଧାନଙ୍କ ନେତୃତ୍ୱରେ ବନ କର୍ମଚାରୀ ହାତୀଙ୍କ ଗତିବିଧି ଲକ୍ଷ୍ୟ କରୁଥିଲେ ସୁଦ୍ଧା ଜଙ୍ଗଲକୁ ଘଉଡ଼ାଇବାରେ ଅସଫଳ ହେଉଛନ୍ତି। ଗୁରୁବାର ହାତୀପଲ ମାଣିକପୁର ନଦୀତଟ ଜଙ୍ଗଲରେ ଆଶ୍ରୟ ନେଇଥିବା ବେଳେ ଶୁକ୍ରବାର ଶ୍ରୀମାଳ ନଦୀତଟ ଶାଗୁଆନ ଜଙ୍ଗଲରେ ଆଶ୍ରୟ ନେଇଛନ୍ତି। ବନ ବିଭାଗର ଉଚ୍ଚ ପଦାଧିକାରୀ ହାତୀ ଘଉଡ଼ାଇବାକୁ ପଦକ୍ଷେପ ନେବା ସହ କ୍ଷତିଗ୍ରସ୍ତ ଚାଷୀଙ୍କୁ ଶୀଘ୍ର କ୍ଷତିପୂରଣ ଦେବାକୁ ଦାବି କରିଛନ୍ତି।