ବ୍ରଜରାଜନଗର,୨୭।୩ (ଡି.ଏନ୍.ଏ.): ଝାରସୁଗୁଡ଼ା ଜିଲାର ବ୍ରଜରାଜନଗର ପରେ ଶନିବାର ରାତିରେ ଝାରସୁଗୁଡ଼ା ସହରରେ ପଶିଥିଲେ ହାତୀପଲ। ସହରରେ ହାତୀ ପ୍ରବେଶ କରିବା ଜାଣିବା ପରେ ଲୋକମାନେ ରାତ୍ରି ସାରା ଆତଙ୍କିତ ଅବସ୍ଥାରେ ଥିଲେ। ବନ କର୍ମଚାରୀ, ପୋଲିସ ପ୍ରଶାସନ ଓ ସ୍ବତନ୍ତ୍ର ସ୍କ୍ବାଡ୍ ରାତିସାରା ହାତୀପଲ ଉପରେ ନଜର ରଖିଥିଲେ। ଏହି ପଲରେ ଶାବକ ସହ ୧୨ଟି ହାତୀ ଥିବା ଜଣାପଡିଛି। ହାତୀପଲ କୌଣସି କ୍ଷତି କରି ନ ଥିବା ଜଣାପଡ଼ିଛି।
ଶୁକ୍ରବାର ମଧ୍ୟରାତ୍ରିରେ ବ୍ରଜରାଜନଗର ଦେଇ ଇବ୍ ନଦୀ ପାର ହୋଇ ଜମେରା ଜଙ୍ଗଲରେ ରହିଥିଲେ ଏହି ହାତୀପଲ। ବିଜୁ ଏକ୍ସପ୍ରେସ ଓ୍ବେ ପାରହୋଇ ଶନିବାର ରାତି ପ୍ରାୟ ସାଢେ ଗୋଟାଏ ସମୟରେ ଝାରସୁଗୁଡ଼ା ସହରର ସରବାହାଲ ଅଞ୍ଚଳରେ ପ୍ରବେଶ କରିଥିଲେ। ବନ କର୍ମଚାରୀମାନେ ରବିବାର ପ୍ରତ୍ୟୁଷରେ ହାତୀପଲକୁ ଭାଜିମାଲ ଜଙ୍ଗଲକୁ ତଡ଼ିଦେଇଥିଲେ। ଦିନ ସାରା ସେହି ଜଙ୍ଗଲରେ ରହିଥିଲେ। ସନ୍ଧ୍ୟାରେ ସମ୍ବଲପୁର ସୀମାକୁ ଲାଗିଥିବା ସିରିପୁରା ଜଙ୍ଗଲକୁ ତଡ଼ିଦେଇଥିଲେ। ସମ୍ବଲପୁର ଜଙ୍ଗଲକୁ ହାତୀପଲ ଛାଡିବାର ଯୋଜନା ରହିଥିବା ବନ କର୍ମଚାରୀମାନେ ସୂଚନା ଦେଇଛନ୍ତି।