ଖୋର୍ଦ୍ଧା ଅଫିସ,୨୪।୧: ହାତୀ ପୁଣି ସହରମୁହାଁ ହୋଇଛନ୍ତି। ଶନିବାର ଭୋର ୬ଟାରେ ଭୁବନେଶ୍ୱର-ଚେନ୍ନାଇ ୧୬ନଂ. ଜାତୀୟ ରାଜପଥ ଦଳେଇପୁଟ ଛକରେ ୨ ଦନ୍ତାହାତୀଙ୍କୁ ଦେଖିବାକୁ ମିଳିଥିଲା। ଘନକୁହୁଡ଼ି ଯୋଗୁ ଲୋକେ ହଠାତ୍ ହାତୀକୁ ଦେଖି ପାରି ନ ଥିଲେ। ରାଜପଥରେ ହାତୀଙ୍କୁ ଦେଖି ଉଭୟ ପଟୁ ଆସୁଥିବା ଯାନବାହନ ଅଟକି ରହିଥିଲା। ଲୋକେ ଭୟଭୀତ ହୋଇ କାର୍, ବାଇକ୍ ଛାଡି ଦୌଡିବାକୁ ଲାଗିଥିଲେ। କେତେଜଣ ପଡ଼ି ଆହତ ମଧ୍ୟ ହୋଇଛନ୍ତି। ତେବେ ହାତୀ ଦ୍ୱୟ କାହାର କିଛି କ୍ଷତି କରି ନ ଥିବା ଜଣାପଡ଼ିଛି।
ସୂଚନା ମୁତାବକ, କିଛିଦିନ ହେବ ଏକ ହାତୀପଲ ଜରିପୁଟ, କାଇପଦର ଏବଂ ରାମେଶ୍ୱର ଜଙ୍ଗଲରେ ରହିଛନ୍ତି। ଖାଦ୍ୟ ଲାଳସାରେ ଜନବସତି ମୁହଁା ହେଉଛନ୍ତି। ଦୁଇଦିନ ହେବ ୨ହାତୀ ଜରିପୁଟ ଗ୍ରାମରେ ରହିଥିବା ବେଳେ ଶୁକ୍ରବାର ବିଳମ୍ବିତ ରାତି ପର୍ଯ୍ୟନ୍ତ କୌଣସି କାମରେ ବାହାରକୁ ଯାଇଥିବା ଗ୍ରାମବାସୀ ଗ୍ରାମକୁ ଫେରି ପାରି ନ ଥିଲେ। ଏହି ୨ହାତୀ ଭୋରରୁ ଜାତୀୟ ରାଜପଥ ଦଳେଇପୁଟ ଛକକୁ ଚାଲି ଆସିଥିଲେ। ଘନକୁହୁଡି ଯୋଗୁ ଉଭୟପଟୁ କାର, ବାଇକ୍ର ଲାଇଟ ବ୍ୟତୀତ କିଛି ଦେଖାଯାଉ ନ ଥିଲା। ହଠାତ୍ ରାଜପଥରେ ହାତୀ ଦେଖି ଲୋକେ ଭୟଭୀତ ହୋଇପଡ଼ିଥିଲେ। କୌଣସି ଅଘଟଣ ଆଶଙ୍କାରେ ଉଭୟ ପଟୁ ଲୋକେ କାର, ବାଇକ ଛାଡି ସେଠାରୁ ଦୌଡିଥିଲେ। ଫଳରେ ଜାତୀୟ ରାଜପଥରେ ପ୍ରାୟ ୩୦ମିନିଟ୍ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ଖବରପାଇ ବନ କର୍ମଚାରୀ ପହଞ୍ଚିି ହାତୀର ଗତିପଥକୁ ଅନୁସରଣ କରିଥିଲେ। ପରେ ହାତୀଦ୍ୱୟ ରାସ୍ତା ପାର ହେବା ପରେ ଯାନବାହନ ଚଳାଚଳ ସ୍ବାଭାବିକ ହୋଇଥିଲା। ସୂଚନାଥାଉ କି, ଖୋର୍ଦ୍ଧା ବନାଞ୍ଚଳ ଅନ୍ତର୍ଗତ ଜରିପୁଟ, ଦଳେଇପୁଟ, ପାନବରଜ, ଦେଉଳଟାଙ୍ଗୀ, କାଇପଦର, ବେରୁଆଁ, ଶରଧାପୁର, ଛତିପୁର ଏବଂ ଟାଙ୍ଗୀ ବନାଞ୍ଚଳର ଗୟାବନ୍ଧ, ଡମଣଭୂଇଁ, ଜଙ୍କିଆ, ବାଲିଗାଡିଆ, ମୋଟା, ଗୋଲବାଇ, ହଜ, ନାରଗୋଦା, ଟାଙ୍କୋଲ, ସିକୋ ଗ୍ରାମରେ ହାତୀ ଉପଦ୍ରବ ଲାଗିରହିଛି। ଏନେଇ ବନ ବିଭାଗ ନିକଟରେ ବାରମ୍ବାର ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁ ନାହିଁ ବୋଲି କେତେଜଣ ଗ୍ରାମବାସୀ କହିଛନ୍ତି। ଅନ୍ୟପଟେ ହାତୀ ଘଉଡ଼ାଇବା ଲାଗି ଆବଶ୍ୟକ ଉପକରଣ ନ ଥିବାରୁ ବନ କର୍ମଚାରୀମାନେ ଭୟଭୀତ ଅବସ୍ଥାରେ ରହୁଥିବା ଜଣାପଡିଛି। ହାତୀଙ୍କୁୁ ନିୟନ୍ତ୍ରଣ କରିବାରେ ବନ ବିଭାଗ ବିଫଳ ହୋଇଛିି ବୋଲି ପରିବେଶପ୍ରେମୀ ଧନେଶ୍ୱର ବିଧାର କହିଛନ୍ତି।