ବାରିପଦା ଅଫିସ/ବୈଶିଙ୍ଗା,୧୨ା୭: ଝାଡ଼ଖଣ୍ଡି ଓ ଶିମିଳିପାଳ ହାତୀପଲ ମୟୂରଭଞ୍ଜ ଜିଲାର ଗାଁ ଗଣ୍ଡାରେ ପଶି ଉତ୍ପାତ ଚଳାଇଛନ୍ତି। କରଞ୍ଜିଆ ଓ ବାରିପଦା ବନଖଣ୍ଡ ଅଞ୍ଚଳରେ ହାତୀପଲ ପ୍ରବେଶ କରି ବ୍ୟାପକ କ୍ଷୟକ୍ଷତି ଘଟାଇଛନ୍ତି। ୫ଦିନ ମଧ୍ୟରେ ୧୦ରୁ ଊର୍ଦ୍ଧ୍ୱ ଘର ଭାଙ୍ଗିଥିବା ସୂଚନା ମିଳିଛି। ହାତୀପଲ ଦିନ ତମାମ ଗ୍ରାମ ଜଙ୍ଗଲରେ ରହୁଥିବା ବେଳେ ସନ୍ଧ୍ୟାରେ ଜନବସତି ମୁଁହା ହେବା ସହ ରାସ୍ତାରେ ଘୁରି ବୁଲୁଥିବାରୁ ଲୋକେ ଆତଙ୍କିତ ହୋଇପଡ଼ିିଛନ୍ତି। ଘର ଭାଙ୍ଗିଥିବା ଲୋକମାନଙ୍କୁ କ୍ଷତିପୂରଣ ଦିଆଯିବ ବୋଲି କରଞ୍ଜିଆ ବନଖଣ୍ଡ ଅଧିକାରୀ ଲାଡେ ଗଜାନନ ପ୍ରକାଶ କରିଛନ୍ତି।
୫ଦିନ ପୂର୍ବରୁ ଝାଡ଼ଖଣ୍ଡରୁ ଆସିଥିବା ହାତୀପଲରେ ୧୮ଟି ହାତୀ ଥିବା ବେଳେ ଶନିବାର ରାତିରେ ଆଉ ୬ଟି ହାତୀ ଆସିଛନ୍ତି। ବିଭିନ୍ନ ଦଳରେ ବିଭକ୍ତ ହୋଇ ମହୁଲିଆସୁଳି, ରାଉତାଲିପାଟ, ହଳଦିଆ, କାଶିଆ ପୋଖରିଆ, ଶିରମଣିପୁର, ଘରମାବେଡା,ସୁନାପୋଷି ଅଞ୍ଚଳରେ ଉପଦ୍ରବ ଜାରି ରଖିଛନ୍ତି। ରବିବାର ବିଳମ୍ବିତ ରାତିରେ ମହୁଲିଆସୁଳି ଗ୍ରାମର ୩ଟି, କାଶୀପାଳର ଗୋଟିଏ ଘର ଭାଙ୍ଗି ଧାନଚାଉଳ ଖାଇଛନ୍ତି। ହାତୀ ଭୟରେ ଲୋକେ ଘର ଛାଡ଼ି ପଳାଉଛନ୍ତି। ଶିମିଳିପାଳରୁ ଆସିଥିବା ଏକ ଗୋଠଛଡ଼ା ଦନ୍ତା ବେତନଟୀ ରେଞ୍ଜ ଅଞ୍ଚଳରେ ଦୀର୍ଘ ଦିନ ହେଲା ଉତ୍ପାତ ଚଳାଇଛି। ସୋମବାର ପୂର୍ବାହ୍ନରେ ବୈଶିଙ୍ଗା-ମାଣତ୍ରୀ ରାସ୍ତାର କ୍ଷୀରପଦାଠାରେ ଉକ୍ତ ଗୋଠଛଡ଼ା ଦନ୍ତା ଚଳପ୍ରଚଳ କରୁଥିବାରୁ ସାଧାରଣ ଯାତାୟାତ ବନ୍ଦ ରହିଥିଲା। ପଥଚାରୀ ଓ ଅଞ୍ଚଳବାସୀ ତାକୁ ଘଉଡ଼ାଇବା ପାଇଁ ଚେଷ୍ଟା କରୁଥିବା ବେଳେ ସେ ଉତ୍କ୍ଷୀପ୍ତ ହୋଇ ପଡ଼ିଥିବା ଦେଖିବାକୁ ମିଳିଥିଲା। ଖବର ପାଇ ବୈଶିଙ୍ଗା ବନପାଳ ହିମାଂଶୁ କୁମାର ମହାନ୍ତ, ବନରକ୍ଷୀ ଜୟନ୍ତୀ ପାତ୍ର, ବେତନଟୀ ରେଞ୍ଜର ଘନଶ୍ୟାମ ସିଂ ପ୍ରମୁଖ ଘଟଣାସ୍ଥଳରେ ପହଞ୍ଚି ହାତୀର ଗତିବିଧି ଉପରେ ନଜର ରଖିଛନ୍ତି।
