ପାରାଦୀପ, ୭।୧୦ (ଶରତ ରାଉତ): ଓଡ଼ିଆ ଲୋକକଥାରେ କୁହନ୍ତି, ମାଛ ଖାଇବ ଇଲିଶି ଚାକିରି କରିବ ପୋଲିସ। ଯେଉଁ ଇଲିଶି ମାଛର ସର୍ବାଧିକ ଚାହିଦା ଆମିଷାଷୀଙ୍କ ପାଖରେ ଥାଏ ତାହା ଆଉ ସମୟାନୁସାରେ ମିଳୁନାହିଁ। ଏଥିଯୋଗୁ ଏହି ମାଛର ଦାମ ଦିନକୁ ଦିନ ବଢ଼ିବାକୁ ଲାଗିଛି। ୨୦୦ରୁ ୩୦୦ ଗ୍ରାମ୍ ଓଜନ ବିଶିଷ୍ଟ ମାଛ କିଲୋ ପିଛା ପାରାଦୀପସ୍ଥିତ ଅଠରବାଙ୍କି ମାଛବଜାର ବାଲିପ୍ଲଟରେ ଶୁକ୍ରବାର ୮୦୦ରୁ ୯୦୦ ଟଙ୍କାରେ ବିକ୍ରି ହୋଇଛି। ସେହିପରି ୧ କିଲୋରୁ ଅଧିକ ଓଜନ ବିଶିଷ୍ଟ ମାଛର ମୂଲ୍ୟ କିଲୋ ପିଛା ୨ ହଜାର ଟଙ୍କାରେ ବିକ୍ରି ହେଉଛି। ଏପରି ଅବସ୍ଥା ଗତ ଶ୍ରାବଣ, ଭାଦ୍ରବ ଏବେ ଆଶ୍ୱିନ ମାସରେ ହୋଇଛି। ସାଧାରଣତଃ ଇଲିିଶି ମାଛ ଏହି ଋ଼ତୁରେ ଅଧିକ ମାତ୍ରାରେ ଧରାଯାଉଥିଲା। ଲୋକେ ଶସ୍ତାରେ କିଣି ଖାଉଥିଲେ। ଯେଉଁଦିନ ବଜାରରେ ବରଫ ଅଭାବ ଥାଏ ସେତେବେଳେ ମାଛ ଯୋଡ଼ା ହିସାବରେ ବିକ୍ରି ହୁଏ। ପାରାଦୀପ ବାଲିପ୍ଲଟରେ ଏମିତି ଘଟଣା ୨୦୧୨ ପୂର୍ବରୁ ପ୍ରାୟତଃ ହେଉଥିଲା। ତା’ପରଠାରୁ ସେଭଳି ମାଛ ଉତ୍ପାଦନ ହେଉନାହିଁ। କେବଳ ୨୦୧୮ରେ ଦୁଇଦିନ ଅଧିକ ମାଛ ବଜାରକୁ ଆସିଥିଲା ବୋଲି ବ୍ୟବସାୟୀ ପରେଶ ମଣ୍ଡଳ କୁହନ୍ତି।
ଇଲିଶି ମାଛର ଜୀବନଚକ୍ର ଅନ୍ୟ ମାଛ ଠାରୁ ଭିନ୍ନ ବୋଲି ପାରମ୍ପରିକ ମତ୍ସ୍ୟଜୀବୀ ସୁବା ରାଓ କୁହନ୍ତି। ଏହି ମାଛ ଗଭୀର ଜଳରେ ରହିଥାନ୍ତି। ପ୍ରଜନନ ପାଇଁ ମଧୁର ଜଳକୁ ଆସିଥାନ୍ତି। ନଦୀ ମୁହାଣ ଅଞ୍ଚଳରେ ଅଧିକ ବର୍ଷା କିମ୍ବା ବନ୍ୟା ସମୟରେ ଆସି ପଶି ଯାଆନ୍ତି। ଯେତେବେଳେ ଯାତାୟାତ କରନ୍ତି ପଲ ହୋଇ ଯାଇଥାନ୍ତି। ସେହି ସମୟରେ ମତ୍ସ୍ୟଜୀବୀ ଜାଲ ବିଛାଇ ବହୁଳ ପରିମାଣରେ ମାଛ ଧରିଥାନ୍ତି। ତେବେ ଇଲିଶି ମାଛ ସାମାନ୍ୟ ଗନ୍ଧ ହେଲେ ଦୂରେଇ ଯାଆନ୍ତି। ପାରାଦୀପରେ ଶିଳ୍ପ ହେବା ପରଠାରୁ ଏହି ମାଛର ଉତ୍ପାଦନ ହ୍ରାସ ପାଇଛି ବୋଲି ରାଓ କୁହନ୍ତି। ସେଥିପାଇଁ ଏହି ମାଛ କିଣି ଖାଇବା ସାଧାରଣ ଲୋକଙ୍କ ପାଇଁ ସାତସପନ ପାଲଟିଛି ବୋଲି ସେ କହିଛନ୍ତି।