ନୂଆଦିଲ୍ଲୀ: ଟେସ୍ଲା ଇଙ୍କ୍ ଏବଂ ସ୍ପେଶ୍ ଏକ୍ସର ପ୍ରତିଷ୍ଠାତା ଏଲନ୍ ମସ୍କ ଆମାଜନ ପ୍ରତିଷ୍ଠାତା ଜେଫ୍ ବେଜୋସ୍ଙ୍କୁ ଟପି ବିଶ୍ୱର ସବୁଠାରୁ ଧନଶାଳୀ ବ୍ୟକ୍ତିର ସ୍ଥାନ ହାସଲ କରିଛନ୍ତି। ଗୁରୁବାର ଟେସ୍ଲାର ଶେୟାର ୪.୮% ବଢ଼ିବାରୁ ମସ୍କ ବେଜୋସ୍ଙ୍କୁ ପଛରେ ପକାଇ ଦେଇଛନ୍ତି। ବ୍ଲୁମ୍ବର୍ଗ ପକ୍ଷରୁ ବିଶ୍ୱର ୫୦୦ ଧନଶାଳୀ ବ୍ୟକ୍ତିଙ୍କ ମଧ୍ୟରେ ଏଲନ୍ ମସ୍କ ଏବେ ପ୍ରଥମ ସ୍ଥାନରେ ରହିଛନ୍ତି। ଦକ୍ଷିଣ ଆଫ୍ରିକା ଜନ୍ମିତ ଏହି ଇଞ୍ଜିନିୟରଙ୍କ ମୋଟ ସମ୍ପତ୍ତି ୧୮୮.୫ ବିଲିୟନ ଡଲାରକୁ ବଢ଼ିଛି। ଏହା ବେଜୋସ୍ଙ୍କ ସମ୍ପତ୍ତିଠାରୁ ୧.୫ ବିଲିୟନ ଅଧିକ। ୨୦୧୭ ପରଠାରୁ ଆମାଜନ ପ୍ରତିଷ୍ଠାତା ଏହି ସ୍ଥାନରେ ରହି ଆସୁଥିଲେ। ଗତ ଗୋଟିଏ ବର୍ଷରେ ମସ୍କଙ୍କର ସମ୍ପତ୍ତି ଦ୍ରୁତ ଭାବେ ବଢ଼ିଛି। ସେ ଏହି ଅବଧିରେ ୧୫୦ ବିଲିୟନ ଡଲାର ସମ୍ପତ୍ତି ଯୋଡ଼ି ପାରିଛନ୍ତି। ଦ୍ରୁତ ଭାବେ ସମ୍ପତ୍ତି ଯୋଡ଼ିବାରେ ଏହା ଇତିହାସରେ ପ୍ରଥମ। ଗତ ଗୋଟିଏ ବର୍ଷରେ ଟେସ୍ଲା ଶେୟାର ୭୪୩% ବଢ଼ିଛି। ୪୯ ବର୍ଷୀୟ ମସ୍କ କହିଛନ୍ତି, ମଙ୍ଗଳରେ ସ୍ଥାପନ ହେବାକୁ ଥିବା ସହର ଗଢ଼ିବାରେ ଯଥାସମ୍ଭବ ସମ୍ପତ୍ତି ଦାନ କରିପାରିବେ। ସୂଚନାଯୋଗ୍ୟ, ଏଲନ୍ ମସ୍କଙ୍କ କମ୍ପାନୀ ଟେସ୍ଲା ଇଲେକ୍ଟ୍ରିକ କାର୍ ପ୍ରସ୍ତୁତ କରୁଥିବା ବେଳେ ସ୍ପେଶ୍ ଏକ୍ସ ଏକ ଘରୋଇ କମ୍ପାନୀ ଭାବେ ମହାକାଶ ଗବେଷଣା କ୍ଷେତ୍ରରେ ସକ୍ରିୟ ରହିଛି।