ନୂଆଦିଲ୍ଲୀ,୧୫।୭: ଦେଶର ସବୁଠୁ ବଡ଼ ମହାକାଶ ମିଶନ ‘ଗଗନୟାନ’ କ୍ଷେତ୍ରରେ ସୋମବାର ପାଦେ ଆଗକୁ ବଢ଼ିଛି ଇସ୍ରୋ। ଭାରତୀୟଙ୍କୁ ମହାକାଶକୁ ପଠାଇବା ପାଇଁ ପ୍ରସ୍ତୁତ ବିକାଶ ଇଞ୍ଜିନ(ଯାନ)ର ପରୀକ୍ଷା ସଫଳ ହୋଇଛି। ଏଥିଲାଗି ଭାରତୀୟ ମହାକାଶ ରିସର୍ଚ୍ଚ ଅର୍ଗାନାଇଜେଶନ (ଇସ୍ରୋ)କୁ ଗୋଟିଏ ଶବ୍ଦରେ ଶୁଭେଚ୍ଛା ଜଣାଇଛନ୍ତି ସ୍ପେସ୍ ଏକ୍ସ ମୁଖ୍ୟ ଏଲୋନ ମସ୍କ।
ଟେସଲା କମ୍ପାନୀ ମୁଖ୍ୟ ଟୁଇଟ୍ରେ ଲେଖିଛନ୍ତି ‘ଶୁଭେଚ୍ଛା’। ଏଥିସହିତ ଭାରତର ଜାତୀୟ ପତାକାର ଇମୋଜିକୁ ମଧ୍ୟ ପୋଷ୍ଟ କରିଛନ୍ତି। ଆଉ ଏକ ଟୁଇଟ୍ରେ ଲେଖିଛନ୍ତି,“ଇସ୍ରୋ ପାଇଁ ବଡ଼ ସଫଳତା। ବହୁତ ପ୍ରଭାବଶାଳୀ”।
ତାମିଲନାଡୁର ମହେନ୍ଦ୍ରଗିରି ସ୍ପେସ୍ ଏଜେନ୍ସିର ପ୍ରୋପୁଲଶନ କମ୍ପ୍ଲେକ୍ସରେ ଇଞ୍ଜିନକୁ ୨୪୦ ସେକେଣ୍ଡ୍ ପାଇଁ ଚାଲୁ କରାଯାଇଥିଲା। ଏହି ଯନ୍ତ୍ରକୁ ନେଇ ଆମ ପୂର୍ବନୁମାନ କେତେ ଦୂର ଠିକ୍, ତାହା ଜାଣିବା ଥିଲା ଏହି ପରୀକ୍ଷାର ଉଦ୍ଦେଶ୍ୟ। ଫଳାଫଳ ଓ ଆମ ଆଶା ମଧ୍ୟରେ ଅଧିକ ପାର୍ଥକ୍ୟ ନାହିଁ ବୋଲି ଇସ୍ରୋ ପକ୍ଷରୁ କୁହାଯାଇଛି।
