ଅହମଦାବାଦ,୧୦ ।୧: ମସ୍କୋରୁ ଗୋଆ ଆସୁଥିବା ଏକ ବିମାନରେ ବୋମା ଥିବା ଧମକ ମିଳିଥିଲା । ଏହାପରେ ଉକ୍ତ ବିମାନଟିକୁ ସୋମବାର ଗୁଜରାଟର ଜାମନଗର ବିମାନ ବନ୍ଦରରେ ଜରୁରୀ ଅବତରଣ କରାଯାଇଥିଲା । ପ୍ରାୟ ୨୦୦ ଯାତ୍ରୀଙ୍କୁ ନେଇ ଆସୁଥିବା ଏହି ବିମାନରେ ସନ୍ଦିଗ୍ଧ ପଦାର୍ଥ ଥିବାରୁ ଏହାକୁ ଏମରଜେନ୍ସି ଲ୍ୟାଣ୍ଡିଂ କରାଯାଇଥିଲା । ଏହାପରେ ପୋଲିସ, ଆମ୍ବୁଲାନ୍ସ ଓ ବମ ସ୍କ୍ୱାଡ ବିମାନ ବନ୍ଦରରେ ପହଞ୍ଚି ଯାଞ୍ଚ ଆରମ୍ଭ କରିଦେଇଛନ୍ତି ।
ମିଳିଥିବା ସୂଚନା ଅନୁଯାୟୀ, ସମସ୍ତ ଯାତ୍ରୀଙ୍କୁ ସୁରକ୍ଷିତ ବିମାନରୁ ଓହ୍ଲାଇ ଦିଆଯିବା ସହ ସେମାନଙ୍କୁ ଏୟାରପୋର୍ଟର ମୁଖ୍ୟ ବିଲଡିଂରେ ରଖାଯାଇଛି । ଘଟଣାର ଯାଞ୍ଚ ପାଇଁ ନ୍ୟାଶନାଲ ସିକ୍ୟୁରିଟଇ ଗାର୍ଡ(ଏନଏସଜି)ର ଟିମ ଲାଗିଥିବା ବେଳେ, ଦିଲ୍ଲୀରୁ ଆଉ ଏକ ଟିମ ଜାମନଗର ଆସୁଛନ୍ତି । ଏନଏସଜି ପକ୍ଷରୁ ସମ୍ପୂର୍ଣ୍ଣ କ୍ଲିୟରାନ୍ସ ମିଳିବା ପରେ ଯାଇ ବିମାନଟିକୁ ଗୋଆ ପଠାଇ ଦିଆଯିବ । ଏବେ ପର୍ଯ୍ୟନ୍ତ ବିମାନରୁ କୌଣସି ସନ୍ଦିଗ୍ଧ ବସ୍ତୁ ମିଳି ନ ଥିବା ସୂଚନା ରହିଛି ।
