ମୁମ୍ବାଇ: ଅଭିନେତ୍ରୀ ତଥା ଏମ୍ପି କଙ୍ଗନା ରାଣାୱତଙ୍କ ଫିଲ୍ମ ‘ଏମର୍ଜେନ୍ସି’ର ଦ୍ୱିତୀୟ ଟ୍ରେଲରକୁ ସୋମବାର ଜାରି କରାଯାଇଛି। ପ୍ରଥମ ଟ୍ରେଲର ତୁଳନାରେ ଦ୍ୱିତୀୟ ଟ୍ରେଲରରେ ବିରୋଧୀ ନେତାଙ୍କ ସହ ଭାରତର ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କର ରାଜନୈତିକ ତିକ୍ତତାକୁ ଅଧିକ ତୀବ୍ରତର ସହ ଦେଖିବାକୁ ମିଳିଛି। ୧୯୭୫ରେ ‘ଏମର୍ଜେନ୍ସି’ ଲାଗିବା ପରେ ଦେଶ ମଧ୍ୟରେ ଲାଗି ରହିଥିବା ଅଶାନ୍ତ ସ୍ଥିତି ଓ ବିଭିନ୍ନ ଘଟଣାକ୍ରମ ସହ ଇନ୍ଦିରା ଗାନ୍ଧୀଙ୍କ ଉକ୍ତି ‘ଇନ୍ଦିରା ଇଜ୍ ଇଣ୍ଡିଆ’କୁ ମଧ୍ୟ ଏହି ଟ୍ରେଲରରେ ସ୍ଥାନ ମିଳିଛି।
ତାଙ୍କ ସୋସିଆଲ ମିଡିଆରେ ‘ଏମର୍ଜେନ୍ସି’ର ଦ୍ୱିତୀୟ ଟ୍ରେଲରକୁ ଶେୟାର କରି ଲେଖିଛନ୍ତି, ‘ଏମର୍ଜେନ୍ସି’ର କାହାଣୀ କେବଳ ଇନ୍ଦିରାଙ୍କୁ ନେଇ ରହିଥିବା ବିଭିନ୍ନ ବିବାଦ ସମ୍ପର୍କରେ ନୁହେଁ, ବରଂ ଏହା କିଛି ଏପରି ପ୍ରସଙ୍ଗ ଉପରେ ଆଧାରିତ ଯାହାର ପ୍ରାସଙ୍ଗିକତା ଏବେ ମଧ୍ୟ ରହିଛି। ଅନେକ ଚ୍ୟାଲେଞ୍ଜରେ ପରିପୂର୍ଣ୍ଣ ଥିବା ଏହି ଫିଲ୍ମ ପରିଶେଷରେ ଆସନ୍ତା ୧୭ରେ ମୁକ୍ତିଲାଭ କରିବାକୁ ଯାଉଛି। ସାଧାରଣତନ୍ତ୍ର ଦିବସର ଠିକ୍ ସପ୍ତାହେ ପୂର୍ବରୁ ମୁକ୍ତିଲାଭ କରୁଥିବା ଏହି ଚଳଚ୍ଚିତ୍ର ମାଧ୍ୟମରେ ଦର୍ଶକମାନେ ଭାରତୀୟ ସମ୍ବିଧାନର ପ୍ରକୃତ ଶକ୍ତି ଓ ସାମର୍ଥ୍ୟ ବିଷୟରେ ଜାଣିବାକୁ ପାଇବେ। ତେଣୁ ନିଜ ପ୍ରିୟଜନଙ୍କ ସହ ‘ଏମର୍ଜେନ୍ସି’କୁ ଦେଖିବା ପାଇଁ କଙ୍ଗନା ତାଙ୍କ ପ୍ରଶଂସକଙ୍କୁ ନିବେଦନ କରିଛନ୍ତି। ‘ଏମର୍ଜେନ୍ସି’ ଫିଲ୍ମର ନିର୍ମାତା ଉମେଶ କେ.ଆର୍ ବନ୍ସଲ କହିଛନ୍ତି, ଫିଲ୍ମରେ ଭାରତୀୟ ଗଣତନ୍ତ୍ରର ଶକ୍ତି ଓ ସ୍ବାଧୀନତାର ମୂଲ୍ୟବୋଧକୁ ଦର୍ଶାଯାଇଛି। ଦର୍ଶକଙ୍କୁ ନିଶ୍ଚିତ ଏହା ପସନ୍ଦ ଆସିବ। କଙ୍ଗନା ଖୋଦ୍ ‘ଏମର୍ଜେନ୍ସି’ ଫିଲ୍ମର ସହ ନିର୍ମାତା ଓ ନିର୍ଦ୍ଦେଶକ ହୋଇଥିବାବେଳେ ଫିଲ୍ମରେ ସେ ମୁଖ୍ୟ ଭୂମିକାରେ ନଜରକୁ ଆସିବେ। ସେହିପରି ଏହି ଫିଲ୍ମରେ ଅଭିନେତା ଅନୁପମ ଖେର୍, ମିଲିନ୍ଦ ସୋମନ, ଶ୍ରେୟାସ ତଲପଡ଼େ, ଅଭିନେତ୍ରୀ ମହିମା ଚୌଧୁରୀ ଏବଂ ସ୍ବର୍ଗତ ଅଭିନେତା ସତୀଶ କୌଶିକଙ୍କୁ ମଧ୍ୟ ବିଭିନ୍ନ ଗୁରୁତ୍ୱପୂର୍ଣ୍ଣ ଚରିତ୍ରରେ ଦେଖିବାକୁ ମିଳିବ। ‘ଜି ଷ୍ଟୁଡିଓ’ ଏବଂ ‘ମଣିକର୍ନିକା ଫିଲ୍ମସ୍’ର ବ୍ୟାନରରେ ‘ଏମର୍ଜେନ୍ସି’ ଚଳଚ୍ଚିତ୍ରକୁ ନିର୍ମାଣ କରାଯାଇଛି।
